ភ្នំពេញ៖ រដ្ឋាភិបាលដែលមានក្រសួងសេដ្ឋកិច្ច ជាសេនាធិការ បានបើកកិច្ចប្រជុំមួយ ជាមួយស្ថាប័នពាក់ព័ន្ធ របស់រដ្ឋាភិបាល ធនាគារពាណិជ្ជ ព្រមទាំងវិស័យឯកជនដែលជាប្រតិបត្តិករផ្ទាល់ ក្នុងវិស័យស្រូវ អង្ករ ដើម្បីជួយជំរុញឱ្យសម្រេចមហិច្ឆិតារបស់រាជរដ្ឋាភិបាល ក្នុងការនាំអង្ករចេញយ៉ាងតិចឱ្យបាន១លានតោនក្នុងឆ្នាំ២០១៥។
ក្នុងកិច្ចប្រជុំកាលពីម្សិលមិញ លោក អូន ព័ន្ធមុនីរ័ត្ន បានមានប្រសាសន៍ថា គោលបំណងនៃការប្រជុំនេះ គឺដើម្បីធ្វើការពិភាក្សាឱ្យមានការយល់គ្នា រវាងគ្រប់តួអង្គពាក់ព័ន្ធ អំពីស្ថានភាពហិរញ្ញប្បទាន សម្រាប់វិស័យស្រូវ អង្ករថាតើក្រុមហ៊ុនប្រមូលទិញកែច្នៃស្រូវ និងអ្នកនាំចេញអង្ករ ដែលជាអ្នកត្រូវការឥណទានមានការខ្វះខាតឥណទានកម្រិតណា ?
ហើយធនាគារពាណិជ្ជ ដែលជាអ្នកផ្តល់ឥណទាន តើបានផ្តល់កម្រិតណាហើយ ហើយតើអាចរកមធ្យោបាយយ៉ាងដូចម្តេចទៀត ដើម្បីបង្កើនការផ្តល់ឥណទានបន្ថែម ដោយរាជរដ្ឋាភិបាលដែលជាអ្នករៀបចំក្របខណ្ឌរួមខាងផ្នែកគោលនយោបាយ និងខាងនិយ័តកម្ម នឹងខិតខំជួយសម្រួល ដើ ម្បី រួមសហការ និងពួតដៃគ្នារកជម្រើសសមស្រប សម្រាប់អនុវត្តតទៅមុខ ដើម្បីឈ្នះ ឈ្នះទាំងអស់គ្នា ឆ្ពោះទៅសម្រេចគោលដៅនាំអង្ករចេញ១លានតោន ក្នុងឆ្នាំ២០១៥។
លោក បានសង្កត់ធ្ងន់ថា គោលនយោបាយស្តីពីការជំរុញផលិតកម្មស្រូវ និងការនាំអង្ករចេញមានការងារច្រើនដែលត្រូវអនុវត្តទៅតាមខ្សែសង្វាក់តម្លៃ ចាប់តាំងពីការដាំដុះរហូតទៅដល់ការនាំចេញទៅកាន់ទីផ្សាដូចមានកំណត់ជាវិធានការគោលនយោបាយជាកញ្ចប់គ្រប់ជ្រុងជ្រោយ ដោយមានការចង្អុលតួនាទីរបស់ក្រសួងស្ថាប័នដែលមានការពាក់ព័ន្ធ ដែលក្នុងនោះ ក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា មានតួនាទីក្នុងការសម្របសម្រួលពាក់ព័ន្ធនឹងបញ្ហាហិរញ្ញប្បទាននេះ ជាផ្នែកមួយនៃការអនុវត្តគោលនយោបាយស្រូវ អង្ករ។
ហេតុនេះហើយ ទើបបានជាក្រសួងសេដ្ឋកិច្ច និងហិរញ្ញវត្ថុបានរៀបចំផ្តួចផ្តើមឱ្យមានកិច្ចប្រជុំនេះឡើង ដើម្បីលើកយកបញ្ហានេះមកដាក់ក្នុងកិច្ចប្រជុំដោយមានតួអង្គពាក់ព័ន្ធចូលរួមទាំងផ្នែកឯកជនដែលជាអ្នកនាំចេញអង្ករទាំងធនាគារដែលជាអ្នកផ្តល់ឥណទានព្រមទាំងក្រសួងស្ថាប័នពាក់ព័ន្ធរបស់រាជរដ្ឋាភិបាលដែលមានតួនាទីជួយសម្របសម្រួលដើម្បីរកមធ្យោបាយសម្រាប់ផ្តល់ឥណទានដល់រោងម៉ាស៊ីនកិនស្រូវ និងអ្នកនាំចេញអង្ករសម្រាប់ប្រើប្រាស់ជាទុនបង្វិលសម្រាប់ប្រមូលទិញ និងកែច្នៃស្រូវយ៉ាងតិចប្រមាណ ២លានតោន ដើម្បីបានចេញជាអង្ករ១ លានតោនសម្រាប់នាំចេញទៅលក់ទីផ្សារក្រៅប្រទេស។
លោក អូន ព័ន្ធមុនីរ័ត្ន បានមានប្រសាសន៍ដែរថា ការនាំចេញអង្ករមានកំណើនគួរកត់សម្គាល់ពោលគឺបានកើនឡើងពីប្រមាណជាង១២ពាន់តោន នៅក្នុងឆ្នាំ២០០៩ ឡើងដល់ប្រមាណជិត៤០ម៉ឺនតោននៅក្នុងឆ្នាំ២០១៣។
ចំណែកការផ្តល់ហិរញ្ញប្បទានរបស់ធនាគារពាណិជ្ជកម្មចំពោះវិស័យកសិកម្ម និយាយជារួម ក៏មានទំហំនិងកំណើនច្រើនគួរឱ្យ កត់សម្គាល់ផងដែរ។ទន្ទឹមនឹងនេះ រាជរដ្ឋាភិបាលក៏មានកម្មវិធីពិសេសក្នុងការផ្តល់ហិរញ្ញប្បទានដល់ស្រូវ អង្ករ តាមរយៈមូលនិធិទ្រទ្រង់និងអភិវឌ្ឍន៍វិស័យកសិកម្ម ដែលអនុវត្តដោយធនាគារអភិវឌ្ឍន៍ជនបទផងដែរ រួមទាំងមានការអនុវត្តនូវយន្តការធានាឥណទានថែមទៀត។
ប៉ុន្តែទោះយ៉ាងណាក៏ដោយ អន្តរាគមន៍របស់រដ្ឋត្រូវឈរលើគោលការណ៍ទីផ្សារ ដោយមិនចេះតែអន្តរាគមន៍នោះទេ ព្រោះវាអាចនាំឱ្យប៉ះពាល់ដល់វិស័យផ្សេងទៀតនៅក្នុងសេដ្ឋកិច្ចទាំងមូល៕
ដោយ៖ រតនា