ភ្នំពេញៈ រដ្ឋបាលព្រៃឈើ បានសហការជាមួយមជ្ឈមណ្ឌលសម្រាប់មនុស្ស និងព្រៃឈើ (RECOFTC) និងក្រសួងពាក់ព័ន្ធ បាននាំគ្នាពិភាក្សាគ្នារៀបចំគោលនយោបាយ និងលិខិតបទដ្ឋានច្បាប់ដែលមានការពាក់ព័ន្ធ ដើម្បីជំរុញឱ្យមានគ្រប់គ្រងព្រៃឈើសម្រាប់ការចិញ្ចឹមជីវិតប្រកបដោយនិរន្តរភាពស្តីពី «មនុស្ស និងព្រៃឈើ» រយៈពេល២ថ្ងៃ ចាប់ពីថ្ងៃទី២៥-២៦ ខែកុម្ភៈ ឆ្នាំ២០១៤ ដោយមានអ្នករួមប្រមាណជា១៥២នាក់។
លោកបណ្ឌិត ជា សំអាង អនុប្រធានរដ្ឋបាលព្រៃឈើ បានប្រកាសនៅក្នុងវេទិកាជាតិនោះថ្ងៃទី ២៥ កុម្ភៈ ថា ការចូលរួមគ្រប់គ្រងព្រៃឈើ នៅក្នុងសហគមន៍ ដើម្បីឲ្យព្រៃឈើអាចផ្តល់ប្រយោជន៍សម្រាប់ជីវិតមនុស្សដោយនិរន្តរភាព។ ហើយតាមរយៈការជំរុញលើកទឹកចិត្តឲ្យសហគមន៍បង្កើនការអនុវត្តច្បាប់ គឺដើម្បីការពារព្រៃឈើឲ្យបានគង់វង្ស ដែលប្រជាពលរដ្ឋអាចទាញយកផលមកចិញ្ចឹមជីវិត។
លោកបានបញ្ជាក់ទៀតថា រដ្ឋាភិបាលបានផ្តល់តួនាទី ដល់សហគមន៍ព្រៃឈើ នៅក្នុងការការពារព្រៃឈើ តាមរយៈការបង្កើតបានសហគមន៍ព្រៃឈើ ចំនួន៤៥៧កន្លែងគ្របដណ្តប់ លើផ្ទៃដីព្រៃចំនួនជាង ៤០០ពាន់ហិកតា នៅក្នុង២១ខេត្ត។លោកបានបន្ថែមថា ដើម្បីសម្រេចបាននូវទិសដៅនៃគោលនយោបាយដែលបានដាក់ចេញ ក្រសួងកសិកម្ម រុក្ខាប្រមាញ់ និងនេសាទ បានរៀបចំនូវគោលនយោបាយអភិវឌ្ឍវិស័យកសិកម្ម សម្រាប់អនុវត្តក្នុងអាណត្តិទី៥នេះ ដោយបានសម្រួចទិសដៅគោលនយោបាយចំនួន៣ចំណុចសំខាន់ៗគឺ ទិ១-ការបង្កើនផលិតភាព ពិពិធភាវូបនីយកម្ម និងពាណិជ្ជកម្មបនីយកម្មកសិកម្ម ទី២-ការលើកកម្ពស់ការចិញ្ចឹមសត្វ និងទី៣-ការគ្រប់គ្រងធនធានព្រៃឈើ និងជលផលដោយចីរភាព។
លោកអនុប្រធានរដ្ឋបាលព្រៃឈើ បានចាត់ទុកវេទិកាថ្នាក់ជាតិលើកទី១ ស្តីពីមនុស្ស និងព្រៃ ឈើ ក្រោមប្រធាន «វិថីឆ្ពោះទៅកាន់ការគ្រប់គ្រងព្រៃឈើ និងការចិញ្ចឹមជីវិតប្រកបដោយនិរន្តរភាព»ថា ពិតជាបានឆ្លុះបញ្ចំងឱ្យឃើញពីការចូលរួមអនុវត្តនូវគោលនយោបាយរបស់រាជរដ្ឋាភិបាលពីភាគីពាក់ ព័ន្ធទាំងអស់កន្លងមក និងសម្រាប់ការបន្តគាំទ្រដល់ការគ្រប់គ្រងធនធានធម្មជាតិប្រកបដោយចីរភាព ដើម្បីឆ្លើយតបទៅនឹងប្រធានខាងលើ។ ហើយជាពិសេសស្វែងរកយុទ្ធសាស្រ្តក្នុង ការគំាទ្រដល់ការអនុវត្តគោលនយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលកម្ពុជា។
ក្រុមគាំពារជនតំបន់ភ្នំ បានឲ្យដឹងថា ព្រៃឈើបានផ្តល់អនុផលជាច្រើនដល់ប្រជាពលរដ្ឋ ដើម្បីចិញ្ចឹមជីវិត ដូចជា៖ ផ្តៅ ទឹកឃ្មុំ ផ្សិត រុក្ខជាតិឱសថ ជាដើម។ ៨០ភាគរយ នៃប្រជាពលរដ្ឋ តំបន់ភ្នំបានទទួលប្រយោជន៍ពីអនុផលទាំងនេះ។ តែទោះជាយ៉ាងណាក្តី ព្រៃឈើប្រទេសកម្ពុជាបាននិងកំពុងរងនូវសកម្មភាពកាប់ដោយខុសច្បាប់ ជាពិសេសេ ព្រៃឈើនៅក្រៅសហគមន៍។
បើយោងតាមរបាយការណ៍របស់ ITTO បានឱ្យដឹងថា ព្រៃឈើនៅតំបន់ត្រូពិកតិចជាង ១២% នៅក្នុងតំបន់អាស៊ី -ប៉ាស៊ីហ្វិក ស្ថិតក្រោមការគ្រប់គ្រងដោយនិរន្តរភាព។ ប៉ុន្តែបើទោះជាមានការស្តារ ព្រៃឈើទាំងនោះឡើងវិញដោយជោគជ័យនៅតាមកន្លែងខ្លះក៏ដោយ ព្រៃធម្មជាតិជាច្រើននៅតែបន្ត បាត់បង់ជារៀងរាល់ឆ្នាំ៕ ដោយៈភីន រ៉ា