ភ្នំពេញៈ ការប្រឡងប្រណាំងរម្មណីយ៍ដ្ឋានស្អាត និងសេវាកម្មល្អប្រចាំឆ្នាំ២០១៣ កន្លងទៅនេះ មានមូលដ្ឋានអាជីវកម្ម និងសេវាកម្មប្រតិបត្តិករទេសចរណ៍ប្រមាណជាង៥៤០ ទទួលបានជ័យលាភីស្នាដៃល្អ ពីរាជរដ្ឋាភិបាលក្នុងឱកាសប្រគល់លិខិតសរសើរជូនដល់មូលដ្ឋានអាជីវកម្ម សេវាកម្ម និងប្រតិបត្តិករ ទេសចរណ៍ ដែលមានស្មាដៃល្អកាលពីថ្ងៃទី២៧ ខែកុម្ភៈ លោក ថោង ខុន រដ្ឋមន្រ្តីក្រសួងទេសចរណ៍មាន ប្រសាសន៍ថា នេះជាមោទនភាពណាស់របស់កម្ពុជាដែលបង្ហាញពីការរីកចំរើននៃ វិស័យទេសចរណ៍ ខណៈដែលចំនួនអ្នកដែលទទួលបានជ័យលាភីបានកើនឡើងរហូតដល់ជាង៥ដង បើធៀបនឹងឆ្នាំ ២០១២ ពោលគឺពីជាង១០០ស្នាដៃ កើនឡើងដល់ចំនួន៥៤៦ស្នាដៃល្អ។
ក្នុងនោះមានដូចជា៖សណ្ឋាគារ ផ្ទះសំណាក់ ភោជ្ជនីយ៍ដ្ឋានអាហារដ្ឋាន សេវាកម្សាន្តទេសចរណ៍ មគ្គុទេសទេសចរណ៍ ទីភ្នាក់ងារ ទេសចរណ៍ ក្រុមហ៊ុនដឹកជញ្ជូនទេសចរណ៍ និងសហគមន៍ទេសចរណ៍។លោករដ្ឋមន្រ្តីបញ្ជាក់ថា ការប្រឡងប្រណាំងនេះត្រូវបានវាយតម្លៃយ៉ាងម៉ត់ចត់ពីគ្រប់ភាគីពាក់ពន្ធ័ ដើម្បីឲ្យធានាថាកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញ ផ្តល់ភាពកក់ក្តៅ ដល់ភ្ញៀវមកលេងម្តងហើយចង់មកម្តង់ទៀត។
លោកជ្រាង សុផានណា តំណាងសណ្ឋាគារមីតឡេននៅរាជធានីភ្នំពេញដែលទទួលជ័យលាភី ស្នា ដៃល្អផ្នែកបរិស្ថាននិងសេវាកម្មល្អបានបង្ហាញអារម្មណ៍រីករាយព្រោះជ័យលាភីនេះនឹងជួយជំរុញឲ្យវិស័យទេសចរណ៍នៅក្នុងប្រទេសកម្ពុជាកាន់តែរីកចំរើនទៅមុខហើយក៏ជាចំនុចដែលត្រូវខិតខំបន្ថែម ទៀតដើម្បីឲ្យកាន់តែទទួលបានការគាំទ្រពីអតិថិជន។
លោកបញ្ជាក់ថា ការចូលរួមអភិវឌ្ឍវិស័យ ទេសចរណ៍វាមិនត្រឹមតែជួយពន្លឿនកណើនសេដ្ឋកិច្ចជាតិប៉ុណ្ណោះទេថែមទាំងជួយឲ្យពលរដ្ឋកម្ពុជាកាន់តែមានការងារធ្វើដូច្នេះការពង្រឹងគុណភាពផលិផលទេសចរណ៍គឺជារឿងសំខាន់បំផុតដែលអ្នកបំរើសេវាកម្មទាំងត្រូវយកចិត្តទុកដាក់ជាអាទិភាព។
កាលពីឆ្នាំ២០១៣ កន្លងទៅនេះ កម្ពុជាទទួលបានទេសចរណ៍អន្តរជាតិចំនួន៤.២១០.១៦៥នាក់ មានកំណើន១៧.៥ភាគរយធៀបនឹងឆ្នាំ២០១២ ដែលបាននាំចំណូលចូលសេដ្ឋកិច្ចជាតិប្រមាណ២.៥៤៧លានដុល្លា ស្មើនឹង១៥.៥ភាគរយនៃផលិតផលសរុបនៅទូទាំងប្រទេស។ ដោយឡែកសម្រាប់ឆ្នាំ២០១៤នេះកម្ពុជានឹងទទួលភ្ញៀវទេសចរណ៍អន្តរជាតិរហូតដល់ជាង៤លាន៧សែននាក់។ ដោយ៖ ភីន រ៉ា