ភ្នំពេញ៖ ក្រសួងអប់រំយុវជន និងកីឡា បានបើកវគ្គបំប៉ន ស្តីពីវិធីសាស្រ្តបង្រៀន និងរៀបលើមុខវិជ្ជាបុរេសំណេរ សម្រាប់កុមារអាយុ៥ឆ្នាំ ផ្នែកមត្តេយ្យសិក្សារដ្ឋ នៅ ក្នុងមធ្យមសិក្សាគរុកោសល្យ មត្តេយ្យមជ្ឈិម។លោកស្រី គឹម សេដ្ឋានី រដ្ឋលេខាធិការក្រសួងអប់រំ បានមានប្រសាសន៍ថា ដើម្បីអភិវឌ្ឍន៍ធនធានមនុស្ស ដែលមានសមត្ថភាពពេញលេញ គឺផ្តើមចេញពីកុមារតូច និងការអប់រំកុមារតូច គឺជាផ្នែកមួយដ៏សំខាន់ក្នុងការ ផ្តល់នូវសមត្ថភាពមូលដ្ឋានគ្រឹះដ៏រឹងមាំ មុននឹងចូលរៀននៅសាលាបឋមសិក្សា ព្រមទាំងកាត់បន្ថយការរៀនមិនត្រួតថ្នាក់ និងមិនបោះបង់ការសិក្សានៅគ្រប់ភូមិសិក្សា ។
លោកស្រី បន្តថា ដើម្បីឆ្លើយតប ទៅនឹងចំណុចសំខាន់ៗខាងលើ ក្រសួងអប់រំ យុវជន និងកីឡា បានខិតខំរៀបចំកែមុខវិជ្ជា នីមួយៗ និងសម្ភារឧបទេសដោយផ្អែកតាមមូលដ្ឋាន ជាក់ស្តែង ហើយក្នុងមុខវិជ្ជាទាំងនោះ តម្រូវឲ្យយក ចិត្តទុកដាក់ លើវិធីសាស្រ្តបង្រៀន និងរៀន ដែលជាផ្នែកមួយ ជួយឲ្យកុមារទទួលបានចំណេះដឹងពេញលេញ ។
លោកស្រីរដ្ឋលេខាធិការបានបន្ថែមថា ក្រសួងអប់រំ យុវជន និងកីឡា រៀបចំវគ្គបំប៉នលើវិធីសាស្រ្តបង្រៀនមុខវិជ្ជា បុរេសំណេរ សម្រាប់កុមារអាយុ ៥ឆ្នាំ ដែលជាមុខវិជ្ជាមួយ ក្នុងការអភិវឌ្ឍន៍ផ្នែកភាសា និងមានលក្ខណៈ គោលវិធីសិស្សមជ្ឈមណ្ឌល ដើម្បីឲ្យកុមារតូចមានបំណិន លើផ្នែកទាំង៦ រួមមានបំណិន ស្តាប់ សង្កេត ធ្វើចលនា ពេលលំហ ភាសា និងទម្លាប់ឲ្យពួកគេរៀនសហការគ្នា ទៅតាមក្រុមតូច ឬធំ ឲ្យស្របតាមចតុ ស្តម្ភ គឺចំណេះដឹង ចំណេះធ្វើ បំណិន និងចេះរួមរស់នៅជាមួយគ្នាផងដែរ។
លោកស្រី គឹម សេដ្ឋានី បញ្ជាក់ថា ដើម្បីឲ្យវគ្គបំប៉ននាពេលនេះ ប្រព្រឹត្តទៅដោយជោគជ័យ សមាជិក សមាជិកាទាំងអស់ត្រូវយកចិត្តទុក ដាក់ស្តាប់ទទួលយកនូវចំណេះដឹង និងបទ ពិសោធន៍ថ្មីបន្ថែមទៀត លើវិធីសាស្រ្ត បង្រៀនមុខវិជ្ជាបុរេសំណេរ ដើម្បីយកទៅផ្សព្វផ្សាយបន្តដល់គ្រូ មត្តេយ្យសិក្សានៅតាមសាលារៀនរៀងៗខ្លួន នឹងត្រូវបញ្ចេញគំនិតយោបល់ ឲ្យបានផុលផុសទាក់ទងនឹង បទពិសោធន៍ ដែលបានអនុវត្តជាក់ស្តែង ដើម្បីផ្តល់ឲ្យគ្នាទៅវិញទៅមក ជាពិសេសត្រូវកំណត់ឲ្យបាននូវ សកម្មភាពសំខាន់ៗក្នុងមេរៀនបុរេសំណេរ ដែលជាតម្រូវការចាំបាច់ របស់គ្រូសម្រាប់បម្រើឲ្យការងារ បង្រៀន និងរៀនកាន់តែល្អប្រសើរថែមទៀត៕ ដោយៈ ភីន រ៉ា