ព្រះសីហនុ៖ ក្នុងរយៈពេល២ខែដើមឆ្នាំ២០១៤នេះ ភ្ញៀវទេសចរណ៏មកលេងកំសាន្តនៅខេត្តព្រះសីហនុមានចំនួន ៣៦៤.៩៦៤នាក់ មានចំនួនកើនឡើងជាងឆ្នាំ២០១៣ កន្លងទៅ១៩.០៩%។ នេះបើតាមការអះអាងរបស់លោក សេង ខា ប្រធានមន្ទីរទេសចរណ៏ខេត្តព្រះសីហនុ។តាមរបាយកាណ៏ពីមន្ទីរទេសចរណ៏ខេត្តព្រះសីហនុបានឲ្យដឹងថា ក្នុង នោះមានភ្ញៀវជាតិ ចំនួន ២៨០.៨៣០នាក់ និងភ្ញៀវទេសចរណ៏អន្តរជាតិចំនួន៨៤.១៣៤នាក់។
បើប្រៀបធៀបរយៈពេល២ខែដូចគ្នា កាលពីដើមឆ្នាំ២០១៣ មានការកើនឡើងចំនួន ១៩.០៩%។ដោយឡែកភ្ញៀវទេសចរណ៏បរទេស ដែលធ្វើដំណើរតាមនាវា ចូលតាមច្រកកំពង់ផែសមុទ្រ អន្តរ ជាតិក្រុងព្រះសីហនុមានចំនួន ១០លើក ដែលមានភ្ញៀវទេសចរណ៏បរទេសចម្រុះជាតិសាសន៏សរុបចំនួន ៦.៦២៤នាក់។
បើប្រៀបធៀបនឹងរយៈពេល២ខែដើមឆ្នាំ២០១៣ មានការកើនឡើង ៤៨. ៨៤ % ភ្ញៀវដែលធ្វើដំណើរតាមនាវាទេសចរណ៏ចូលតាមច្រកកំពង់ផែអន្តរជាតិក្រុងព្រះសីហនុភាគច្រើនសុទ្ធតែជាមនុស្សដែលមានវ័យចំណាស់។រីឯភ្ញៀវទេសចរណ៏ដែលធ្វើដំណើរតាមយន្តហោះក្នុងខែមករា ឆ្នាំ២០១៤ មានចំនួន ៤១ជើង មានភ្ញៀវសរុប ២.៣១៨នាក់ ក្នុងនោះភ្ញៀវជាតិមានចំនួន ០៣នាក់។ បើប្រៀបធៀបទៅនឹងខែមករាឆ្នាំ២០១៣ មានចំនួនកើនឡើង ១៧ជើង ស្មើនឹង ៨៤៤នាក់។
គួរបញ្ជាក់ថា បច្ចុប្បន្នភ្ញៀវទេសចរណ៏បរទេសដែលមកកម្សាន្តនៅខេត្តព្រះសីហនុ កំពុងចាប់អារម្មណ៍ទៅទស្សនានៅតាមបណ្តាកោះមួយចំនួនក្នុងខេត្ត មានដូចជា ភូមិកោះតូច ភូមិកោះរុងសន្លឹម ភូមិសុខសាន្ត ដែលមានទីតាំងនៅសង្កាត់កោះរុង មានចម្ងាយពីដីគោក ប្រមាណជា ៣៨គីឡូម៉ែត្រ និងនៅមានកោះមួយចំនួនទៀត មានដូចជាកោះប្ញស្សី កោះព្រីង កោះយាយ កោះតា ជាដើម៕ ដោយ៖ ភីនរ៉ា