ភ្នំពេញៈ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានអំពាវនាវឲ្យក្រសួងអប់រំ យុវជន និងកីឡាបន្ត ពង្រឹងគុណ ភាព អប់រំនៅគ្រឹះស្ថានឧត្តមសិក្សា ត្រូវតែបន្តការខិតខំប្រឹងប្រែងក្នុងការបណ្តុះ បណ្តាលធនធានមនុស្ស ដែលជាកត្តាមិនអាចខ្វះ បាននៅក្នុងការអភិវឌ្ឍប្រទេសជាតិ។ការអំពាវនាវនេះខណៈដែលសម្តេចតេជោ អញ្ជើញក្នុងពិធីប្រគល់សញ្ញាបត្រដល់និស្សិត ជ័យលាភីថ្នាក់បរិញ្ញាបត្រ និងថ្នាក់បរិញ្ញ បត្រជាន់ខ្ពស់នៃសាកលវិទ្យាល័យភូមិន្ទនីតិសាស្ត្រ និងវិទ្យា សាស្ត្រ សេដ្ឋកិច្ច សរុប ចំនួន ៧.៥៧១ នាក់នៅមជ្ឈមណ្ឌលសន្និបាត និងពិព័រណ៍កោះពេជ្រ ព្រឹកថ្ងៃទី ១៧ មីនា ២០១៤នេះ។
សម្តេចតេជោ ហ៊ុន សែន មានប្រសាសន៍បន្តថា ចាប់តាំងពីថ្ងៃទីរំដោះ ៧ មករា ឆ្នាំ ១៩៧៩ រហូតមកដល់បច្ចុប្បន្ននេះ យើង កសាងប្រទេសបានពីដំណាក់កាលមួយទៅកាន់ដំណាក់កាលមួយ មិនមែនមាន ន័យថា យើងមិនបានយចិត្តទុកដាក់ទៅលើបញ្ហាធនធានមនុស្សនោះទេ ។សម្តេចនាយក រដ្ឋមន្រ្តីថ្លែងឱ្យដឹងទៀតថា ប៉ុន្តែតាមដំណាក់កាល នីមួយៗយើងបាន ឆ្លងកាត់ នូវការលំបាករាប់មិនអស់ ហើយយើងក៏បានរិះរកគ្រប់វិធីទាំងអស់ ដើម្បីបញ្ជូន និស្សិតរបស់យើងចេញទៅរៀននៅ បរទេស នៅក្នុង ដំណាក់កាលនៃការលំបាកនោះ ។
នៅក្នុងដំណាក់កាលមួយទសវត្សចុង ក្រោយនេះកំណើនសេដ្ឋកិច្ចកម្ពុជាជាងមធ្យមជាង ៨% ក្នុងមួយឆ្នាំ ដែលកំណើននេះ មិន អាចបានមកដោយសារការគ្រប់គ្រង និងដឹកនាំមិនច្បាស់លាស់នោះទេ ក៏ប៉ុន្តែបានមក អាស្រ័យដោយការដឹកនាំ និង អាស្រ័យដោយកត្តាធនធានមនុស្សរបស់យើង។
យ៉ាងណាក៏ដោយបញ្ហាធនធានមនុស្សនៅតែជាចំណោទធំ សម្រាប់យើង ។ ដូចដែលវេទិការាជរដ្ឋាភិបាល -ផ្នែកឯកជនបានឆ្លុះបញ្ចាំងអំពីភាពពាក់ព័ន្ធ គ្នារវាងម្ខាងគឺធនធានមនុស្ស និងម្ខាងទៀតការបណ្តុះបណ្តាលរបស់យើងមិនឆ្លើយតបទៅនឹងតម្រូវការទីផ្សារ។ឥឡូវនេះមិនថាពិភពលោកកំពុងមានការប្រែប្រួលយ៉ាងខ្លាំងពី ស្ថានភាពមួយទៅកាន់ស្ថានភាពមួយទៀតទេ សូម្បីតែនៅក្នុងប្រទេសកម្ពុជារបស់យើងវា ក៏មានតម្រូវការ ហើយឥឡូវនេះដំណាក់កាលនេះជាដំណាក់កាលនៃការធ្វើឯកទេសកម្ម ដែលនៅក្នុងការធ្វើឯកទេសកម្មនោះហើយ ដែលតែងតែឆ្លុះបញ្ចាំងថា និស្សិតដែលបានទទួលការងារធ្វើចំមុខជំនាញមានប៉ុន្មាន និងមិនចំមុខជំនាញមានប៉ុន្មាន ។
សម្តេចតេជោនាយករដ្ឋមន្រ្តីបានបញ្ជាក់ថា ឥឡូននេះ ការបណ្តុះបណ្តាលធន ធានមនុស្សរបស់យើងកាន់មានតម្រូវការចាំបាច់ ដើម្បីបម្រើឲ្យទីផ្សារការងារនៅពេលដែល វិនិយោគបានមកដល់ ដែលយើងត្រូវមានធនធានមនុស្សដើម្បីបម្រើការងារឲ្យគេ បម្រើឲ្យ ខ្សែសង្វាក់ផលិតកម្ម បើមិនដូច្នេះទេ យើងនៅតែរត់មិនទាន់ដំណើរក្នុងស្រុករបស់យើង ក៏ ដូចជាសមាហរណកម្មនៅក្នុងក្របខណ្ឌតំបន់ផងដែរ ។
លោក ហង់ ជួនណារ៉ុន រដ្ឋមន្ត្រីក្រសួងអប់រំបានឲ្យដឹងថា សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចជា គ្រឹះស្ថានឧត្តមសិក្សារដ្ឋ ដែលមានតួនាទីដ៏សំខាន់ក្នុងការបណ្តុះបណ្តាលធនធានមនុស្ស ដើម្បីបម្រើឲ្យការអភិវឌ្ឍ សេដ្ឋកិច្ច និងសង្គមកម្ពុជា ស្របតាមគោលនយោបាយរបស់រាជរដ្ឋាភិបាល ។ គិតមក ដល់ឆ្នាំ ២០១៤ នេះ និស្សិតដែលបានបញ្ចប់ការសិក្សាជាស្ថាពរពីសាកលវិទ្យាល័យភូមិន្ទ នីតិសាស្ត្រ និងវិទ្យាសាស្ត្រសេដ្ឋកិច្ចមានចំនួន ៣១ ៦៣៣ នាក់ ដែលនិស្សិតទាំងនោះ កំពុងបម្រើការងារនៅក្នុងស្ថាប័នរដ្ឋ និងវិស័យឯកជននានា ។ បច្ចុប្បន្នសាកលវិទ្យាល័យ មាននិស្សិតកំពុងសិក្សាគ្រប់កំរិតសិក្សាសរុប ១៥ ៦៧២ នាក់។
លោករដ្ឋមន្ត្រីបានឲ្យដឹងដែរថា សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានធ្វើសហប្រតិបត្តិការជាមួយបណ្តាសាកលវិទ្យាល័យ បរទសល្បីៗ ដោយបានចុះហត្ថលេខាជាមួយសាកលវិទ្យាល័យអន្តរជាតិជាដៃគូចំនួន ៣០ ដើម្បីផ្លាស់ប្តូរនិស្សិត សាស្ត្រាចារ្យ លើការងារសិក្សា ការងារបង្រៀន និងការស្រាវជ្រាវ ។ គិតចាប់ពីឆ្នាំ ១៩៩៣ មកដល់បច្ចុប្បន្ន សាកលវិទ្យាល័យបានបញ្ជូននិស្សិតទៅសិក្សានៅបរទេស តាមរយៈ អាហារូបករណ៍នានាបានចំនួន ១ ០៦៥ នាក់។
គួររំម្លឹកដែរថា នាបច្ចុប្បន្ននេះ កម្ពុជាមានគ្រឹះស្ថានឧត្តមសិក្សាសរុបចំនួន ១០៤ ដែលក្នុងនោះគ្រឹះ ស្ថាឧត្តមសិក្សារដ្ឋមាន ចំនួន ៣៩ និងឯកជនចំនួន ៦៥ និងមាននិស្សិត ថ្នាក់បរិញ្ញាបត្ររង ដល់បណ្ឌិតចំនួន ២២២ ១៦៤ នាក់ ។ ជាមួយគ្នានេះក៏ មានអន្តេវាសិកដ្ឋានចំនួន ៧ ខ្នង នៅរាជធានីភ្នំពេញ និងមាននិស្សិត កំពុងស្នាក់ នៅប្រមាណ ៨០៤ នាក់ក្នុងនោះស្រី ៥៧៣ នាក់ និងមាននិស្សិតបរទេស ១៤០ នាក់៕ដោយ ៖ ភីន រ៉ា