កោះកុង៖ ភ្ញៀវទេសចរបរទេសនៅពេលដែលពួកគេបានធ្វើដំណើរមកដល់ សហគមន៍អេកូទេស ចរណ៍ឃុំជីផាតហើយនោះគឺតែងតែជ្រើសរើសយកការកម្សាន្ត សប្បាយជាមួយនឹងការជិះកង់ ជិះទូកទស្សនាសម្រស់ធម្មជាតិនៅតាមទីព្រៃភ្នំក្រមថ្ម និងជ្រោះជ្រលងដងអូរ។
ឃុំជីផាតគឺជាតំបន់សហគមន៍អេកូទេសចរណ៍ដ៏ស្រស់បំព្រងមួយដែល កំពុងតែ បង្អួតសម្រស់ទាក់ទាញភ្ញៀវទេស ចរនៅ ចំកណ្តាលព្រៃស្រោងនៃជួរភ្នំក្រវាញ ក្នុង ស្រុកថ្មបាំង ខេត្តកោះកុង។ អ្នកទេសចរ ទាំងអស់អាចធ្វើដំណើរទៅលេងកម្សាន្តនៅតំបន់សហគមន៍អេកូទេសចរណ៍ឃុំ ជីផាតបានដោយចេញដំណើរពីចំណុច អណ្តូងទឹកក្នុងស្រុកស្រែអំបិលកាត់តាមផ្លូវលំក្នុងព្រៃចម្ងាយប្រហែលជាង១៧ គីឡូម៉ែត្រ។
ប្រសិនបើយើងចង់ធ្វើដំណើរតាមទូកទេសចរណ៍កាត់តាមព្រែកដើម្បីចង់ ប្លែកភ្នែកជាមួយនឹងបរិស្ថានធម្មជាតិវិញនោះគឺមានចម្ងាយ២៥គីឡូម៉ែត្រដោយប្រើពេលប្រហែលជា២ម៉ោងក្នុងនោះការធ្វើដំណើរ ទស្សនាចរណ៍របស់អ្នកទេសចរមកកាន់ តំបន់ឃុំជីផាតនេះដែរភាគច្រើនពួកគាត់ ចូលចិត្តជិះទូកណាស់ ពីព្រោះបានគយ គន់ឃើញនូវសម្រស់ទេសភាពប្លែកៗជាច្រើននៅតាមដងព្រែកឬដៃសមុទ្រ។
បច្ចុប្បន្នឃុំជីផាត ត្រូវបានបង្កើតឡើងក្លាយទៅជាសហគមន៍អេកូទេសចរណ៍មួយដោយបច្ចុប្បន្នកំពុងតែមានភាព ទាក់ទាញភ្ញៀវទេសចរឲ្យមកលេងកម្សាន្ត នៅលើទឹកដីដ៏ស្រស់បំព្រងនេះភាគច្រើនជាជនបរទេសដែលមានចំ ណង់ ចំណូលចិត្តដើរកម្សាន្តតាមតំបន់ព្រៃធម្មជាតិមាន ទឹកធ្លាក់ ទឹកជ្រោះ ជ្រលងភ្នំ ទស្សនាសត្វព្រៃ ប្រភេទរុក្ខ ជាតិប្លែកៗដែលដុះនៅតាមជួរភ្នំក្រវាញ ពិសេសភ្ញៀវបរទេសចង់ឃើញការរស់នៅរបស់សត្វដំរីដែលគេកម្រនឹងជួបប្រទះ។ នៅតំបន់សហគមន៍អេកូទេសចរណ៍ឃុំជីផាតនេះដែរក៏នៅមានសត្វដំរីរស់នៅប្រមាណ៤០០ក្បាលផងដែរស្ថិតក្រោមការថែរក្សា និងអភិរក្សដោយមន្ត្រីពាក់ព័ន្ធ និងមន្ត្រីបរិស្ថាន។
នៅតំបន់សហគមន៍អេកូទេសចរណ៍ឃុំជីផាតបន្ទាប់ពីមានទេសភាព ស្រស់ត្រកាលមិនអាចដកចិត្តរួចនោះ ទីនេះក៏នៅមានបម្រើជូនសេវាផ្សេងៗសម្រាប់អ្នកទេសចរដូចជា៖ ម្ហូបអាហារ ការជិះទូកគយគន់សម្រស់ ព្រៃកោងកាង ជិះកង់ទស្សនាតាមភូមិសហគមន៍រួមទាំងព្រៃធម្មជាតិក្នុងតំបន់នេះ ទាំងមូល។
អ្វីរឹតតែអស្ចារ្យទៅទៀតនោះគឺនៅមាន ផ្ទះសំណាក់ ភោជនីយដ្ឋានបែបបុរាណបណ្តែតខ្លួនរង់ចាំទទួលស្វាគមន៍ភ្ញៀវទេសចរនៅ កណ្តាលទ្រូងព្រៃដែលមានសូរសំឡេងសត្វរៃស្រែកយំបំភ្លៃក្លាយជា តន្ត្រីបែបធម្មជាតិយ៉ាងគ្លួច។ ពិសេសជាងនេះទៅទៀតយើងអាចទស្សនាថ្ងៃរៀបលិចពីផ្ទះសំណាក់បែបបុរាណនៅឃុំជីផាតដែលរឹតតែធ្វើឲ្យអារម្មណ៍របស់យើងកាន់តែជក់ចិត្ត។
មានភ្ញៀវទេសចរកើនឡើងជាលំដាប់ ដែលក្នុងនោះមាន៨០ភាគរយជាជនបរទេសដូចជា អង់គ្លេស បារាំងនិងអាមេរិក ជាដើម ហើយពួកគេច្រើនមកជាក្រុមតាម រយៈក្រុមហ៊ុនទេសចរណ៍ពីរាជធានីភ្នំពេញ។ នៅតំបន់សហ
គម ន៍អេកូទេសចរណ៍ឃុំជីផាតបន្ទាប់ពីអំណោយផលខាងបរិស្ថាន ធម្មជាតិនោះគឺនៅមានល្អាងបុរាណ ល្អាង ប្រចៀវ សំណល់ផ្នូរមនុស្សសម័យដើម ពាងបុរាណ និងនៅមានតំបន់ទឹកធ្លាក់ចំនួន៣កន្លែងទៀតសម្រាប់អ្នក ទេសចរងូតលេង ត្រជាក់កាយយ៉ាងសប្បាយរីករាយផងដែរ។
កាលពីខែវិច្ឆិកា ឆ្នាំ២០១៣ នៅសហគមន៍ទេសចរណ៍ឃុំជីផាតហាក់ដូចជាមាន ភ្ញៀវជាតិមានតែចំនួន២៥នាក់និងបរទេសមានចំនួន១២៧នាក់ និយាយរួមនៅជីផាតគឺសម្បូរ តែភ្ញៀវបរទេសប៉ុណ្ណោះ។ដោយឡែកចំពោះភ្ញៀវទេសចរដែលស្នាក់នៅក្នុងខេត្តកោះកុងសម្រាប់ខែ វិច្ឆិកា ឆ្នាំ២០១៣ វិញភ្ញៀវជាតិ មានចំនួន៦៧៤១នាក់ និងបរទេស មាន ចំនួន២០២៨នាក់ បើប្រៀបធៀបនឹងខែ មុនមានការកើនឡើងច្រើន។
ដោយឡែក បើតាមការសង្កេតឃើញចំពោះភ្ញៀវទេសចរដែលបានធ្វើដំណើរមកលេងនៅសហគមន៍ ឃុំជីផាតនេះគឺភាគច្រើនសម្បូរតែជនបរទេសប៉ុណ្ណោះ ដោយពួកគេចូលចិត្តជាមួយនឹងការជិះកង់និងជិះទូកទស្សនានៅតាមតំបន់ដ៏ស្រស់ត្រកាល មួយចំនួនដូចជាទឹកធ្លាក់ ជ្រលង ភ្នំ តំបន់បុរាណ ភូមិដ្ឋានអ្នកស្រុក ព្រៃធម្មជាតិដែលលាតសន្ធឹងនៅតាមជួរភ្នំក្រវាញដែលទិដ្ឋភាពទាំងនេះគឺ ពិតជាអស្ចារ្យខ្លាំងណាស់សម្រាប់ពួកគេ៕ ដោយ៖ ភីនរ៉ា