រាជរដ្ឋាភិបាល បានសម្រេចឲ្យធនាគារជាតិបោះពុម្ព និងដាក់ឲ្យប្រើប្រាស់នូវក្រដាសប្រាក់ថ្មី ប្រភេទ ១០០០ រៀល ដើម្បីឧទ្ទិសថ្វាយដល់សម្តេចព្រះមហាវីរក្សត្រ ព្រះបរមរតនកោដ្ឋ ដែលបានយាងចូលទិវង្គតកាលពីថ្ងៃទី១៥ ខែតុលា ឆ្នាំ២០១២។ អនុក្រឹត្យ ស្តីពីការចេញផ្សាយធនប័ត្រ ព្រះបរមរតនកោដ្ឋ ប្រភេទ ១០០០ រៀល ត្រូវបានចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន កាលពីថ្ងៃទី២៩ ខែមករា ឆ្នាំ២០១៣។
គំរូក្រដាស់ប្រាក់ថ្មី "ព្រះបរមរតនកោដ្ឋ" ប្រភេទ ១០០០ រៀល ត្រូវបានបោះពុម្ព ចេញប្រើប្រាស់
សម្រាប់ឧទ្ទិសថ្វាយដល់សម្តេចព្រះមហាវីរក្សត្រ ( រូបថត៖ Facebook លោក កឹម គុណវឌ្ឍ )
ការចេញផ្សាយនូវក្រដាសប្រាក់ថ្មី ប្រភេទ ១០០០ រៀល ដែលមានព្រះឆាយាល័ក្ខណ៍សម្តេចព្រះមហាវីរក្សត្រ សម្តេចព្រះ នរោត្តម សីហនុ និងម្ខាងទៀតមានរូបថតព្រះទីនាំង បុស្បុក រូបហង្សមាស ដង្ហែព្រះបរមសព ព្រះករុណា ចូលព្រះបរមរាជវាំង គឺនៅតែប៉ុន្មានថ្ងៃប៉ុណ្ណោះដែលព្រះរាជាណាចក្រកម្ពុជានឹងប្រារព្ធ ព្រះរាជពិធីដង្ហែ និងថ្វាយព្រះភ្លើង បូជាព្រះបរមសព នាថ្ងៃទី១ និងថ្ងៃទី៤កុម្ភៈ ឆ្នាំ២០១៣។
អនុក្រឹត្យ ស្តីពីការចេញផ្សាយធនប័ត្រ ព្រះបរមរតនកោដ្ឋ ប្រភេទ ១០០០ រៀល ដែលចុះហត្ថលេខាដោយសម្តេចនាយករដ្ឋមន្ត្រី ហ៊ុន សែន បានសម្រេចអនុញ្ញាតឲ្យចេញផ្សាយ ធ្វើចរាចរ និងប្រើប្រាស់ក្នុងទូទាំងព្រះរាជាណាចក្រកម្ពុជា នូវធនប័ត្រ "ព្រះបរមរតនកោដ្ឋ" ប្រភេទ ១០០០ រៀល ទន្ទឹមនឹងបណ្តាប្រភេទប្រាក់ ដែលត្រូវបានចេញផ្សាយរួចហើយ។
សូមរម្លឹកថា បន្ទាប់ពីព្រះករុណា ព្រះមហាវីរក្សត្រ សម្តេចព្រះ នរោត្តម សីហនុ បានយាងចូលទិវង្គត កាលពីថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ ៩០ ព្រះវស្សា សម្តេចនាយករដ្ឋមន្ត្រី ហ៊ុន សែន ក៏បានប្រកាសភ្លាមៗ អំពីការរៀបចំបោះពុម្ពក្រដាសប្រាក់ថ្មី ប្រភេទ ១០០០ រៀល ដើម្បីឧទ្ទិសថ្វាយដួងព្រះវិញ្ញាណក្ខន្ធរបស់ព្រះអង្គផងដែរ។
កន្លងមក ព្រះឆាយាល័ក្ខណ៍របស់សម្តេចព្រះមហាវីរក្សត្រ សម្តេចព្រះ នរោត្តម សីហនុ ត្រូវបានបោះពុម្ពលើក្រដាសប្រាក់ជាច្រើន រួមមាន ប្រភេទ ៥ ០០០ រៀល ១០០០០ រៀល និង ៥០០០០ រៀល ជាដើម។ រីឯព្រះឆាយាល័ក្ខណ៍របស់សម្តេចព្រះមហាក្សត្រ សម្តេចព្រះ នរោត្តម សីហមុនី ក៏ត្រូវបានបោះពុម្ពលើក្រដាសប្រាក់ ប្រភេទ ២០០០០ រៀល ផងដែរ៕
អត្ថបទនេះដកស្រង់ចេញពីវ៉ិបសាយ www.cen.com.kh