ភ្នំពេញ ៖ តារាសម្តែង និងជាតារាម៉ូដែលវ័យក្មេង មានសម្រស់ស្រស់សោភាស្ថិតនៅក្នុងក្រុម Sun Super Models កញ្ញា សុវណ្ណ លីនដា ក្រោយពីបណ្តែតខ្លួនចាប់យកការងារសិល្បៈអស់រយៈពេលជាង៥ឆ្នាំមកនេះត្រូវបានគេមើលឃើញថាភាពល្បីល្បាញរបស់នាង ទើបមានការរីកសស់សាយ ក្នុងអំឡុង ពេលជិតមួយឆ្នាំចុងក្រោយនេះតែប៉ុណ្ណោះ។ស្របពេល ដែលកេរ្តិ៍ឈ្មោះ និងការគាំទ្រកំពុងតែមានជាបណ្ដើរៗស្រាប់លេចឮដំណឹងអំពីជីវិតស្នេហា ឯកជនក្រៅសិល្បៈមកថា លីនដា កំពុងតែមានទំនាក់ទំនងស្នេហា ដ៏ផ្អែមល្ហែមជាមួយបុរសវ័យក្មេង ជាមនុស្សក្នុងចង្កោមសិល្បៈ ក្នុងទ្រនំតែមួយ។
នាងបណ្តែតជីវិតចូលប្រឡូកក្នុងពិភពសិល្បៈសំដែងដោយសារមានចិត្ត ស្រឡាញ់ចូលចិត្តតាំងពីកំណើតមក។ នៅដើមឆ្នាំ២០១០ នាងសំរេចចិត្តឈប់សិក្សាត្រឹមថ្នាក់ទី៩ ហើយចូលហាត់រៀនសំដែងនៅក្លឹបសិល្បៈពន្លឺព្រះអាទិត្យ ។ បន្ទាប់ពីហាត់រៀនបានប៉ុន្មានខែនាងមានឱកាសចូលរួមសំដែងកាយវិការ ខារ៉ាអូខេឱ្យផលិតកម្មមួយចំនួនទាំងក្នុង និងក្រៅប្រទេស ។
ក្រោយពីឈានជើងចូល ក្នុងវិស័យសិល្បៈមួយរយៈនេះ មកតារាសម្តែង និងបង្ហាញម៉ូដ សុវណ្ណ លីនដា បានព្យាយាមខិតខំ សាងកេរ្តិ៍ឈ្មោះឲ្យមានភាពល្បីល្បាញ ដោយការបញ្ចេញ សមត្ថភាពក្នុងការសម្តែងខ្សែភាពយន្ត ការថតឈុតកាយវិកាខារ៉ាអូខេ រហូតដល់មានឱកាស ទាញបានប្រជាប្រិយភាពយ៉ាងច្រើនគួរសម ពីទស្សនិកជន ។
តារាសម្តែង និងម៉ូឌែលវ័យក្មេង មានរូបសម្រស់ស្រស់សោភាមួយដួង ដែលកំពុងមានពន្លឺ លេចធ្លោឡើងលើវិថីសិល្បៈ ខណៈប្រជាប្រិយភាព និង កេរ្តិ៍ឈ្មោះរបស់នាង ក៏ត្រូវបាន មហាជនគាំទ្រច្រើន មិនចាញ់តារាស្រីវ័យក្មេងឯទៀតនោះទេ ។
ប្រភពនិយាយខ្សឹបខ្សៀវ ចេញពីរង្វង់អ្នកសិល្បៈ បានឲ្យដឹងថា កាលពីពេលថ្មីៗនេះ គេតែងឃើញកញ្ញា សុវណ្ណ លីនដា បណ្តើរគ្នាជាមួយបុរសរូបសង្ហា វ័យក្មេងម្នាក់ជាអ្នកសិល្បៈ។ ចំពោះសកម្មភាពស្និទ្ធស្នាល ល្អូកល្អឺនរវាង លីនដា និងបុរសម្នាក់នោះ ត្រូវបានប្រភពនិយាយថា ជាការបង្កើតភ្លើងស្នេហាថ្មោងថ្មី ស្ថិតក្នុងដំណាក់កាលនៃការស្វែងយល់ពីចិត្តគ្នាមុនឈានទៅដល់ជីវិតអាពាហ៍ពិពាហ៍ ។
ប្រភពដដែលបានបន្តថា ជារើយៗតារាប្រុសរូបសង្ហាគូស្នេហ៍ តារាស្រី សុវណ្ណ លីនដា គឺឧស្សាហ៍មកចាំទទួលយក តារាស្រីរូបនេះ ចេញទៅដើរកំសាន្ត លំហែកាយនៅខាងក្រៅ ជាញឹកញាប់។ ជាពិសេសពួកគេ ទាំងពីរនាក់ ក៏តែងចូលហាងអាហារ និង កន្លែងសប្បាយ ជាមួយគ្នាជាច្រើនទៀត។ តាមរយៈការបង្ហាញអត្តចរិកដ៏ស្និទ្ធស្នាល របស់អ្នកទាំងពីរនេះ គេអាចសន្និដ្ឋានថា សុវណ្ណ លីនដា កំពុងតែបញ្ឆេះភ្លើងស្នេហ៍ ក្រៅឆាកជាមួយបុរសម្នាក់នោះ ៕ដោយៈ ភីន រ៉ា