ភ្នំពេញៈ ពិធីបុណ្យចូលឆ្នាំប្រពៃណីខ្មែរ ឆ្នាំមមី ឆស័ក ពុទ្ធស័ករាជ២៥៥៨ នឹងចូលមកដល់មិនលើសពីមួយអាទិត្យទៀតទេ។ ក្រសួងមហាផ្ទៃតែងជូនដំណឹងដល់ថ្នាក់ដឹកនាំសមត្ថកិច្ចនៅទូទាំងរាជធានី/ខេត្ត ក្នុងការរក្សាសន្តិសុខសណ្តាប់ធ្នាប់ដល់ប្រជាពលរដ្ឋ គ្រប់មូលដ្ឋានទាំងអស់ មិនថានៅរាជធានី ឬនៅតាមបណ្តាខេត្ត ទូទាំងប្រទេសកម្ពុជា។ លោក ខៀវ សុភ័គ អ្នកនាំពាក្យក្រសួងមហាផ្ទៃ បានថ្លែងប្រាប់ឱ្យដឹងថា ក្រសួងមហាផ្ទៃ បានជូនដំណឹងដល់ថ្នាក់ដឹកនាំកងកម្លាំងសមត្ថកិច្ចរួចរាល់ហើយដើម្បីត្រៀមរៀបចំសណ្តាប់ធ្នាប់នៅថ្ងៃបុណ្យចូលឆ្នាំខ្មែរ។ លោកក៏បានក្រើនរំលឹកដល់ប្រជាពលរដ្ឋខ្មែរទាំងអស់ថា ក្នុងឱកាសបុណ្យចូលឆ្នាំប្រពៃណីជាតិខាងមុខ សូមប្រជាពលរដ្ឋប្រុងប្រយ័ត្ន ចំពោះការដុត ទៀន ធូប ឲ្យបានគ្រប់ៗគ្នា។ ចំណែកឯ ទាក់ទងនឹងគ្រោះថ្នាក់ចរាចរណ៍វិញ នៅពេលស្រវឹងកុំបើកបរ ជៀសវាងហេតុការណ៍គ្រោះថ្នាក់ណាមួយ ដែលអាចកើតឡើងជាយថាហេតុ។ គួរបញ្ជាក់ថា បុណ្យចួលឆ្នាំប្រពៃណីខ្មែរ នៅឆ្នាំ២០១៤នេះ នឹងប្រារព្ធធ្វើរយៈពេលបីថ្ងៃ ពោលគឺនៅថ្ងៃទី១៤ ១៥ និង១៦ ខែមេសាខាងមុខ។ ជារយៈពេល ដែល ប្រជាពលរដ្ឋខ្មែរ បានជូបជុំក្រុមគ្រួសារ និងបង្កើនបរិយាកាស សប្បាយរីករាយនៅក្នុងឱកាសនោះផងដែរ៕ ដោយៈ ភីនរ៉ា