ភ្នំពេញ ៖ រាជរដ្ឋាភិបាលកម្ពុជារួមជាមួយតំណាងអង្គការសង្គមស៊ីវិលនិងវិស័យឯកជនពាក់ពន្ធ័ ជាច្រើននាក់​បាន​​​​ជួប​គ្នាពិភាក្សា​និងកំណត់នូវបញ្ហាប្រឈមនានា ដែលកើតឡើងលើពលករទេសន្តប្រវេសន៍​ ដើម្បីដាក់​ជូន​ប្រមុខរដ្ឋនិងប្រមុខរដ្ឋាភិបាលអាស៊ានដោះស្រាយ នៅក្នុងកិច្ចប្រជុំកំពូល​អាស៊ានលើកទី៦ដែលនឹង​ប្រ​ព្រឹត្ត​ទៅនាចុងខែវិច្ឆិកាឆ្នាំ២០១៣ខាងមុខនេះ។

ព្រឹកថ្ងៃទី០៣ខែកញ្ញាឆ្នាំ២០១៣នេះ ក្រសួងការងារ និងបណ្តុះបណ្តាលវិជ្ជាជីវៈ ព្រមទាំងមានការចូលរួមជា​ច្រើន​ពីភាគីពាក់ពន្ធ័ អង្គការសង្គមស៊ីវិល តំណាងនិយោជក តំណាងកម្មករនិយោជិត និងដៃគូអភិវឌ្ឍបាន​បើក​កិច្ចប្រជុំគ្នាមួយដើម្បីពិភាក្សាត្រៀមនូវរបៀបវារៈសំខាន់ៗសម្រាប់ដាក់ជូនទៅក្នុង​វេទិកា អាស៊ានស្តីពី​ពលករ​ទេសន្តរប្រវេសន៍លើកទី៦ ដែល​គ្រោងនឹងរៀបចំឡើងនៅថ្ងៃទី២៦-២៧ខែវិច្ឆិកា ឆ្នាំ២០១៣​ខាងមុខ​នេះ​​​នៅប្រទេសប្រ៊ុយណេដារ៉ហ្សាឡឹម។

លោក Manual Imsonអ្នកសម្របសម្រួលគម្រោងត្រីកោណអាស៊ាន (Project Coordinator of ASEAN Triangle​​​ Project)​​​​​នៃអង្គការអន្តរជាតិផ្នែកការងារ បានថ្លែងនៅក្នុងកិច្ចប្រជុំនោះថា នេះជាវេទិការដែលបើក​ចំហ​​​​ដោយ​​​មានសារៈសំខាន់បំផុត ក្នុងការផ្លាស់ប្តូរមតិយោបល់ពាក់ពន្ធ័ទៅនឹងបញ្ហាប្រឈមនានារបស់​ពល​កល​​​​​​​​ទេសន្តរ​ប្រវេសន៍នៅក្នុងតំបន់​អាស៊ីអាគ្នេយ៍។ ក្រៅពីនេះនឹងត្រួតពិនិត្យលើការអនុវត្តរបស់ភាគីពាក់ពន្ធ័​​ជុំវិញ​​​ការ​​ធ្វើឲ្យប្រសើរឡើង នៃការលើកកម្ពស់សិទ្ធិ និងការការពារពលករទេសន្តរ​ប្រវេសន៍ ​ពិសេសគ្រប់គ្រង​ឲ្យបានច្បាស់លាស់ពីទិន្នន័យពលករទេសន្តរប្រវេសន៍។

លោក Manual Imsonបន្តថា ពលករទេសន្តរ​ប្រវេសន៍ក្នុងតំបន់អាស៊ានកំពុងតែមានកំណើន ក្នុងនោះមាន​​ចេញ​​ដំណើរ​​ពីកម្ពុជា វៀតណាម ថៃ និងប្រទេសភូមា ហើយឆ្ពោះទៅកាន់ប្រទេសមួយចំនួនមានដូចជា ប្រទេស​ម៉ាឡេស៊ី សិង្ហបូរី ថៃ កូរ៉េ និង ប្រទេសប៊ុ្រយណេ។

លោកបញ្ជាក់ថា ទន្ទឹមនឹងកំណើនទេសន្តរប្រវេសក្នុងតំបន់ ក៏វាបាននាំមកនូវបញ្ហាប្រឈម​ជាច្រើនដូចជាការ​ធ្វើ​ចំណាក់ស្រុកមិនស្របច្បាប់ដែលប្រឈមនឹងភាពងាយរងគ្រោះ និងការកេងប្រវ័ញ្ចឬការរំលោភ​បំពាន​ផ្សេងៗ​ ។

លោក អ៊ុំ មាន រដ្ឋលេខាធិការក្រសួងការងារ​ បណ្តុះបណ្តាលវិជ្ជាជីវៈ បានលើកឡើងនៅក្នុងកិច្ចប្រជុំនោះ​ថា តាមរយៈការ​គ្រប់គ្រងនិងបញ្ជូនពលករទៅធ្វើការនៅបរទេសនេះ រាជារដ្ឋាភិបាលបានចាត់វិធានការណ៍​សម​​ស្រប​​ជាច្រើន សំដៅការពារនិងទប់ស្កាត់ការជួញដូរមនុស្ស ការរត់ពន្ធ័មនុស្ស និងការរំលោភបំពានពីគ្រប់ រូប​ភាព ក្នុងនោះបានបង្កើតគណៈកម្មការជំនាញជាច្រើនដើម្បីអនុវត្តកិច្ចការនេះ ដែលជាការលើក កម្ពស់សិទ្ធិ​របស់​​​​ពលករ។

លោករដ្ឋលេខាធិការបន្តថា ទេសន្តប្រវេសន៍កាងារឆ្លងដែនពីប្រទេសមួយទៅប្រទេសមួយ សម្រាប់កម្ពុជា​បាន​កើត​ឡើងជាយូរមកហើយ ពិសេសទៅលើបណ្តាប្រជាពលរដ្ឋក្រីក្រ ដែលពួកគេចាត់ទុក​ជាជម្រើសមួយ​ក្នុង​ការរំដោះខ្លួនចេញពីភាពក្រីក្រ។

សូមបញ្ជាក់ថា ​​​គិតចាប់ពីឆ្នាំ១៩៩៨ រហូតមកដល់ពេលបច្ចុប្បន្ននេះ មានពលករកម្ពុជាចំនួនជាង២០ម៉ឺននាក់ ត្រូវបានបញ្ជូនទៅបំរើការងារនៅប្រទេសចំនួន៤ ក្នុងនោះមានប្រទេសថៃ ប្រទេសម៉ាឡេស៊ី សាធារណៈរដ្ឋ​កូរ៉េ​​ និង​ប្រទេស​ជប៉ុន ៕

ដោយ ៖ សស្អាត