ភ្នំពេញ៖ ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផល លោក ណៅ ធួក ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផល បានប្រាប់សារព័ត៌មាននគរធំតាមទូរស័ព្ទឲ្យដឹងកាលពីព្រឹកថ្ងៃទី ៤ មករា ១០១៤នេះថា រដូវត្រីប្រហុកចាប់ផ្តើមត្រូវ មាន៣ដំណាក់កាល ដំណាក់កាលទី១ត្រីបានត្រូវកាលពីដើមខែធ្នូកន្លងមក ហើយនៅតំណាក់កាលទី២ ប្រសិនបើអាកាសធាតុមិនប្រែប្រួលនោះ ត្រីនឹងចាប់ផ្ដើមត្រូវនៅថ្ងៃទី៩ ដល់ថ្ងៃទី១៥ ខែមករាខាងមុខ។
ដូច្នេះ តាមរយៈនេះ លោក សូមអំពាវនាវឲ្យបងប្អូនប្រជាពលរដ្ឋ ដែលមានបំណងចង់ធ្វើត្រីប្រហុក ផ្អក ត្រីងៀត ត្រីឆ្អើត្រូវត្រៀមលក្ខណៈ ដូចជា អំបិល ពាង ក្រឡ និងសំភារៈផ្សេងៗ សំរាប់ទុកធ្វើត្រីប្រហុកនោះ ឲ្យបានគ្រប់ គ្រាន់ និងត្រូវមកឲ្យទាន់ពេលវេលា ទើបត្រីសំបូរ ហើយតំលៃពិតជាថោក។
លោក ណៅ ធួក បានបន្ថែមទៀតថា រយៈពេលប៉ុន្មានថ្ងៃខាងមុខនេះ ត្រីចាប់ផ្តើមត្រូវប្រហែលជានៅថ្ងៃទី៩ទី១០មករា គឺបាន៤-៥ថ្ងៃទៀត និងនៅចុងដៃចាប់ផ្តើមសម្បូរម្តងទៀត គឺក្នុងថ្ងៃទី១១ រហូតដល់១៥មករាទើបរៀងស្បើយ។ ដើម្បីកុំឲ្យឱកាសនៃពេលវេលា កន្លងហួសក្នុងមួយឆ្នាំមានតែម្តងនោះ សូមបងប្អូនប្រជាពលរដ្ឋទាំងអស់នៅទូទាំងប្រទសនាំគ្នាចេញឆ្ពោះទៅគោលដៅ នៅតាមធ្នួស រុះរាន់ឲ្យបានច្រើននៅតាមដងបឹងទន្លេសាប។
លោកបានបញ្ជាក់យ៉ាងច្បាស់ថា ត្រីសម្រាប់ប្រជាពលរដ្ឋធ្វើប្រហុកនិងផ្អកនិងចុះ មកដល់ម្ដងទៀតនៅដើមខែ ឬពាក់កណ្ដាលខែក្រោយនេះ ប្រសិនបើ អាកាសធាតុមិនប្រែប្រួលនោះទេ។ ប៉ុន្ដែថ្មីៗនេះដោយ សារទឹកទន្លេមេគង្គ បានឡើងខ្ពស់បន្តិច ធ្វើទឹកទន្លេសាបកើល មិនសូវហូរ ដែលកត្ដានេះ ជាហេតុធ្វើឲ្យ មានការលំបាកចរាចរណ៍របស់ត្រីនិងប៉ះពាល់ដល់បរិមាណត្រី បន្ដិចបន្ដួចដែរ តែបញ្ហានេះលោករំពឹងថា មិនមានជួបបញ្ហាអ្វីធ្ងន់ធ្ងរនោះទេ។
ម្យ៉ាងទៀតនៅឆ្នាំនេះ បរិមាណត្រី ក៏កើនឡើងខ្ពស់ជាងឆ្នាំមុនដែរ។ ដោយឡែកការបង្ក្រាបបទល្មើសនេសាទវិញ គិតពីដើមឆ្នាំ រហូតដល់ពេលនេះសរុបបានចំនួនជាង ៣២០០ករណី។ កាលពីដើមខែធ្នូកន្លងមកនេះត្រូវប្រហុកនិងផ្អកបានចាប់ផ្ដើម ចុះមកម្ដងហើយ ប៉ុន្ដែមិនទាន់ត្រូវច្រើន រីឯបរិមាណបើធៀបទៅនឹងឆ្នាំមុន គឺមានការកើនឡើងខ្ពស់ជាង។
លោកបានបញ្ជាក់ថា ក្រោយពីកំណែទំរង់របស់រាជរដ្ឋាភិបាលក្នុងការរំលាយឡូត៍នេសាទចោលនោះធ្វើឲ្យកំ ណើន ត្រីក៏ កើន បង្កងក៏កើន ហើយប្រជាពលរដ្ឋជាអ្នកទទួលផលពីវិស័យនេសាទនេះ។ជាមួយគ្នានេះដែរ នៅឆ្នាំ ២០១៤នេះ រដ្ឋបាលជលផលមានគម្រោងចាប់ត្រីទឹកសាបចំនួន៥៥ម៉ឺនតោន ពោលគឺមានការកើនជាង ឆ្នាំមុន១០ភាគរយក្នុងនោះសម្រាប់នាំចេញទៅក្រៅប្រទេសមានចំនួន២ ម៉ឺនតោន ។ ចំណែកត្រីសមុទ្រ ទឹកប្រៃវិញ គឺរដ្ឋបាលជល ផល មានគម្រោងចាប់ចំនួន១០ម៉ឺនតោន។យោងតាមសេចក្ដីប្រកាសព័ត៌មានពីរដ្ឋបាលជលផល បានឲ្យដឹងថា ត្រីសម្រាប់ធ្វើប្រហុក និងផ្អក ដែលជាទម្លាប់របស់ប្រជាពលរដ្ឋខ្មែរ និងចាប់ផ្ដើមចុះមកដល់សារជាថ្មីទៀតនៅសប្ដាហ៍ទី២ ក្នុងខែមករា ឆ្នាំ ២០១៤ខាងមុខនេះ៕ដោយ៖ ភីនរ៉ា