ភ្នំពេញ៖អគារការិយាល័យថ្មីចំនួន៣ខ្នងកំពស់៣ជាន់ មានតំលៃចំនួន ៧.៧០០.០០០ ដុល្លារអាម៉េរិកជាជំនួយរបស់ ប្រទេសចិន ផ្តល់ឲ្យព្រឹទ្ធសភាកម្ពុជា ត្រូវបានដាក់សម្ពោធ​ដាក់ឲ្យដំណើរការជាផ្លូវការហើយ នៅព្រឹកថ្ងៃទី២០ មករា ឆ្នាំ២០១៤នេះ ។

លោកស្រី Bu Jianguo ឯកអគ្គរដ្ឋទូតចិនប្រចាំកម្ពុជា បានមានប្រសាសន៍ក្នុងពិធីនោះថា អគារការិយាល័យ ថ្មីរបស់ ព្រឹទ្ធសភានេះ បានបើកការដ្ឋានសាងសង់នៅថ្ងៃទី២០ ខែកុម្ភៈ ឆ្នាំ២០១២ ដោយសា រមានកិច្ចសហប្រតិបត្តិ ការរ វាងក្រុមការងារនៃប្រទេសទាំងពីរ ចិន-កម្ពុជា បានសម្រេចការសាងសង់អស់ រយៈពេលជិត២ឆ្នាំ ដោយរលូននិង សម្រេចបានជោគជ័យ ។

លោកស្រីបន្តថា តាមរយៈការផ្តល់ជំនួយអគារនេះពិតជាមានសារៈសំខាន់​ដែលភាគីចិន បាន​គាំ​ទ្រដល់ព្រឹទ្ធសភា  កម្ពុជា ក្នុងអាណត្តិទី៣ហើយក៏ជាការបង្ហាញម្តងទៀត នៃកិច្ចសហ​ប្រតិបត្តិការមេត្រីភាពទ្វេភាគី នឹងបន្តជារៀង រហូត។ជានិច្ចកាល ប្រទេសចិនបាន​ចាត់ទុក​ប្រទេសកម្ពុជាជាបងប្អូន ជាមិត្តភ័ក្តដ៏ស្មោះត្រង់ និងបានសាងនូវ សមិទ្ធផលជាច្រើនរួមគ្នា។

លោក សាយ ឈុំ ប្រធានស្តីទីព្រឹទ្ធសភាកម្ពុជា បានមានប្រសាសន៍ថា ចិនមានសកម្មភាព​ឈានមុខគេក្នុងការរួម ចំណែកបំពេញនូវការខ្វះខាតរបស់ព្រឹទ្ធសភាកម្ពុជា។ ជាក់ស្តែងជំនួយ​ជាបន្តបន្ទាប់របស់ចិន បានធ្វើឲ្យកន្លែងធ្វើ ការងារ ក្នុងព្រឹទ្ធសភាកម្ពុជា​កាន់តែល្អប្រសើរ​តាំងពី​បន្ទប់រហូតដល់សម្ភារៈប្រប្រាស់ទំនើបៗជាច្រើន ។

ប្រធានស្តីទីព្រឹទ្ធសភាបន្តថា កម្ពុជាបានវាយតម្លៃប្រកបដោយមោទនភាព ចំពោះការរីកធំធាត់ នៃទំនាក់ទំនងមិត្ត ភាពរវាង កម្ពុជា-ចិន ក្នុងអំឡុងពេល៥៥ឆ្នាំកន្លងទៅនេះ។ ហើយកម្ពុជា នឹងបន្តខិតខំពូនជ្រុំចំណងមិត្តភាព សាម គ្គីភាព និងកិច្ចសហប្រតិបត្តិការដ៏រឹងមាំនេះ ទុកជា​មរតក​ដល់កូនចៅជំនាន់ក្រោយ ដូចដែលព្រះករុណាព្រះបាទ សម្តេច ព្រះនរោត្តម សីហនុ ព្រះបរមរតនកោដ្ឋ បានសាងនិងបន្សល់ទុកឲ្យរៀងមក។

គួរបញ្ជាក់ថា ចាប់តាំងពីថ្ងៃបង្កើតព្រឹទ្ធសភាឆ្នាំ១៩៩៩ មកទល់នឹងពេលបច្ចុប្បន្ននេះ សាធារណៈរដ្ឋប្រជាមានិតចិន បានសម្រេចផ្តល់ជំនួយចំនួន១១លើកដល់ព្រឹទ្ធសភាកម្ពុជា គិតទាំងអគារដ៏ផូរផង់​ ដែលត្រូវដាក់ឲ្យប្រើប្រាស់ ជាផ្លូវ ការនាពេលនេះផង៕ ដោយ៖ សស្អាត