ភ្នំពេញៈ ក្នុងរយៈពេល ១៥ ឆ្នាំកន្លងទៅនេះសេដ្ឋកិច្ចរបស់កម្ពុជាមានកំណើនជាង៨ % ជាមធ្យមក្នុងមួយឆ្នាំ។ នេះ បើយោងតាមប្រសាសន៍របស់លោកឧបនាយករដ្ឋមន្ត្រីគាត ឈន់ កាលពីថ្ងៃទី១៩ កុម្ភៈ កន្លងទៅថ្មីៗនេះ។ លោកឧបនាយករដ្ឋមន្ត្រី បានបញ្ជាក់ថា ថា រាជរដ្ឋាភិបាលកម្ពុជាតែងយកចិត្តទុកដាក់កែលម្អជីវភាព និងសុខុមាលភាពរបស់ប្រជាជនរបស់ខ្លួន ក្នុងនោះមានទាំងកម្មករនិយោជិតផងដែរ។
ជាក់ស្តែងចុងក្រោយនេះ យោងតាមលទ្ធផលការងាររបស់គណៈកម្មការប្រឹក្សាការងារ ប្រាក់ឈ្នួលអប្បបរមាត្រូវបានដំឡើង២៥ ភាគរយ គឺពី ៨០ ដុល្លារដល់ ១០០ ដុល្លារ ក្នុងមួយខែសម្រាប់កម្មករផ្នែកវាយនភណ្ឌកាត់ដេរសម្លៀកបំពាក់ និងផលិតស្បែកជើង ដែលចាប់ផ្តើមអនុវត្តពីថ្ងៃទី០១ ខែ កុម្ភៈ ឆ្នាំ២០១៤ នេះទៅ។
គណៈប្រតិភូតំណាងជាន់ខ្ពស់ក្រុមហ៊ុនបញ្ជាទិញ និងសហជីពអន្តរជាតិ បានកត់សម្គាល់នូវការអភិវឌ្ឍនិងកំណើនសេដ្ឋកិច្ចគួរឲ្យកត់សម្គាល់របស់កម្ពុជា។ នៅក្នុងកិច្ចជំនួបនេះ គណៈប្រតិភូបានលើកឡើងនូវចំណាប់អារម្មណ៍អំពីការស្វែងយល់ពីវិធីសាស្ត្រនៃការកំណត់ប្រាក់ឈ្នួលអប្បបរមាសម្រាប់កម្មករនិយោជិតក្នុងក្របខ័ណ្ឌនៃតម្លាភាព និងដើម្បីរក្សាបាននូវបរិយាកាសនិងទំនាក់ទំនងការងារល្អក៏ដូចជា៖ ការរក្សាបាននូវចង្វាក់ផលិតកម្ម ព្រមទាំងការគិតគូរប្រាក់ឈ្នួលអប្បបរមាតាមបែបវិទ្យាសាស្រ្តដែលមានលក្ខណៈអាចព្យាករណ៍បាន ស្ថិតស្ថេរ និងអាចដាក់ឲ្យអនុវត្តបាន ព្រមទាំងបានស្នើសុំឲ្យមានការគិតគូរប្រាក់ឈ្នួលអប្បបរមានេះឲ្យបានឆាប់។
ក្រោយពីអង្គប្រជុំក៏បានផ្លាស់ប្តូរទស្សនាទាន និងព័ត៌មាននានា អំពីសភាពការណ៍ទូទៅពាក់ព័ន្ធនឹងស្ថានភាពនយោបាយការធ្វើបាតុកម្មទាមទារដំឡើងប្រាក់ឈ្នួលអប្បបរមានាពេលកន្លងមក ប្រតិភូតំណាងក្រុមហ៊ុនអ្នកបញ្ជាទិញ និងសហជីពអន្តរជាតិបានយល់ច្បាស់ពីសភាពការណ៍ដែលបានកើតឡើងនៅកម្ពុជា ហើយបញ្ជាក់ថា អ្នកបញ្ជាទិញ និងសហជីពអន្តរជាតិកំពុងស្ថិតនៅក្នុងទូកតែមួយជាមួយរាជរដ្ឋាភិបាលកម្ពុជា។ជាមួយគ្នានេះប្រតិភូតំណាងក្រុមហ៊ុនអ្នកបញ្ជាទិញ និងសហជីព បានសំដែងការមិនគាំទ្រចំពោះបាតុកម្មហិង្សា និងការបំផ្លិចបំផ្លាញទ្រព្យសម្បត្តិនានា ដែលមិនគោរពតាមច្បាប់ក្នុងអំឡុងបាតុកម្មទាំងនេះ។
គណៈប្រតិភូ ក៏បានលើកឡើងថា កម្ពុជាកំពុងស្ថិតក្នុងទីតាំងល្អក្នុងកិច្ចការអភិវឌ្ឍប្រទេសក្នុងបរិបទនៃសាកលភាវូបនីយកម្ម។ តំណាងជាន់ខ្ពស់ក្រុមហ៊ុនអ្នកបញ្ជាទិញនិងសហជីពអន្តរជាតិ បានថ្លែងអំណរគុណចំពោះរាជរដ្ឋាភិបាលកម្ពុជាដែលបានរៀបចំជំនួបដ៏មានសារៈសំខាន់នេះ និងបានសំណូមពរឲ្យមានការជួបប្រជុំពិភាក្សាការងារបន្តទៀតនៅខែឧសភា ឆ្នាំ ២០១៤ ខាងមុខ។
ឧបនាយករដ្ឋមន្ត្រី គាត ឈន់ បានឯកភាពជាគោលការណ៍ចំពោះការជួបប្រជុំគ្នានៅពេលខាងមុខនេះដោយជំនួបនេះស្ថិតក្នុងក្របខ័ណ្ឌនៃភាពជាដៃគូពិភាក្សារវាងរាជរដ្ឋាភិបាលកម្ពុជា អ្នកបញ្ជាទិញ សមាគមនិយោជក និងសហជីពនានា ក្នុងកិច្ចសហការធានានូវការអភិវឌ្ឍវិស័យឧស្សាហកម្ម និងការបន្តលើកកម្ពស់សុខុមាលភាពរបស់ប្រជាជនកម្ពុជា៕
ដោយ៖ ភីន រ៉ា