ភ្នំពេញៈ សម្តេច ហេងសំរិន ប្រធានរដ្ឋសភាកម្ពុជាបានអនុញ្ញាតឲ្យលោក ប៉ាន ក្វាងសៀ ឯកអគ្គរដ្ឋទូតចិន ចប់អាណាត្តិចូលជួបសម្តែងការគួរសមនិងជម្រាបលាកាលពីថ្ងៃទី៣០ ខែមេសា ឆ្នាំ ២០១៣ នៅវិមានរដ្ឋសភា។
ក្នុងជំនូបនោះសម្តេចប្រធានរដ្ឋសភាបានសម្តែងនូវការស្វាគមន៍ យ៉ាងកក់ក្តៅចំពោះលោក ប៉ាន ក្វាងសៀ ដែលបានមកសម្តែងការការគួរសម និង ជម្រាបលានៅពេលលោកត្រូវបានចប់អាណាត្តិជាឯកអគ្គរដ្ឋទូតវិសាមញ្ញ និងពេញ សមត្ថភាព នៃសាធារណរដ្ឋប្រជាមាតិចិនប្រចាំកម្ពុជា។
សម្តេចបានវាយតម្លៃខ្ពស់ចំពោះកិច្ចការការងារបំពេញការទូតយ៉ាងសកម្មនៅប្រទេសកម្ពុជាក្នុងអាណត្តិការទូតអស់រយៈពេលជាង៣ឆ្នាំកន្លងមកនេះ។ ក្នុងពេលលោកបំពេញការទូតលោកបានសហការល្អជាមួយ ស្ថាប័ននីតិបញ្ញាត្តិ ស្ថាប័ននីតិប្រតិបត្តិ ព្រមទាំងបណ្តាក្រសួង រាជធានី គ្រប់ខេត្តក្រុងទូទាំងប្រទេស និងជម្រុញឲ្យទំនាក់ទំនងចំណងសាមគ្គីភាព មិត្តភាពពិសេសនិងកិច្ចសហប្រតិបត្តិការទ្វេភាគីរវាងប្រជាជន និងប្រទេសទាំងពីកម្ពុជា‑ចិន ឲ្យកាន់តែល្អប្រសើរនិងរឹងមំាខ្លាំក្លាឡើងឥតឈប់ឈរ។
សម្តេចបានបន្តទៀតថាសាធារណរដ្ឋប្រជាមានិតចិនកំពុងមានតួនាទីយ៉ាងសំខាន់ នៅក្នុងប្រទេសកម្ពុជាទាំងទំនាក់ទំនងការទូត និងទំនាក់ទំនងសេដ្ឋកិច្ច សង្គមកិច្ច វប្បធម៌ សុខាភិបាល និងយោធា និយាយរួមលើគ្រប់វិស័យ។សម្តេចបានចូលរួមអបអរសាទ ការប្រារព្ធខួបលើកទី៥៥ឆ្នាំ នៃការបង្កើតទំនាក់ទំនងការទូតកម្ពុជា‑ចិនដែលភាគីទាំងពីរកំណត់ថា ជាឆ្នាំមិត្តភាពកម្ពុជា‑ចិន តាមរយៈកំណត់នេះបានធ្វើឲ្យកម្ពុជា-ចិនរៀបចំសកម្ម ភាព នានា ដើម្បីអបអរខួបអនុស្សាវរីយ៍ឲ្យកាន់តែអធិកអធម ។
សម្តេចប្រធានបានលើកឡើងផងឌេរថានាពេលថ្មីៗនេះសម្តេចនាយករដ្ឋមន្ត្រី ហ៊ុន សែន បានដឹកនាំគណៈប្រតិភូកម្ពុជាទៅទស្សកិច្ចនៅប្រទេសចិនហើយមិត្តចិនបានប្រកាសផ្តល់ជំនួយឥតសំណងដល់កម្ពុជាចំនួន៣០០យ័ន និងប្រាក់កម្ចីសម្បទានក្នុងកម្រិតការទាបចំនួន៥០០លានដុល្លាអាមេរិក សម្រាប់ការអភិវឌ្ឍប្រទេស។ ក្នុងរយៈពេលប្រមាណ១០ឆ្នាំ កន្លងមកនេះចិនជាអ្នកផ្តល់ជំនួយធំជាងគេសម្រាប់ការកសាងផ្លូវ ស្ពាន នៅកម្ពុជា ។
អ្នកនាំពាក្សសម្តេចប្រធានរដ្ឋសភា លោក គាំម កុសលប្រាប់ឱ្យដឹងថានៅក្នុងជំនូបសវនាការលោក ប៉ាន ក្វាងសៀ អគ្គរដ្ឋទូតនៃសាធារណៈរដ្ឋប្រជាមានិតចិនបានថ្លៃងអំណគុណសម្តេចប្រធានដែលបានបានអនុញ្ញាតឲ្យរូបលោកចូលជួបសម្តែងការគួរសម និងជម្រាបលាកន្លងមកសម្តេចតែងតែជួយគាំទ្រដល់បេសកម្មរបស់លោករហូតទទួលបានជោគជ័យក្នុងការពង្រីកទំនាក់ទំនងកិច្ចសហប្រតិបត្តិការរវាងកម្ពុជា‑ចិន។លោកមានសេចក្តីរីករាយចំពោះការរីកចំរើននិងការអភិវឌ្ឍរបស់ប្រទេសកម្ពុជាដែលនឹកស្មានមិនដល់។
លោកគាំម កុសល បន្តថាគោលបំណងសំខាន់នាថ្ងៃនេះគឺចូលសម្តែងការអគុណ និងជម្រាបលាដើម្បីធ្វើមាតុភូមិនិវត្តទៅមាតុប្រទេសវិញ។ លោកក៏បានបញ្ជាក់ថានៅថ្ងៃទី១៤ ខែឧសភា ឆ្នាំ២០១៣ នៅស្ថានទូតចិន នឹងប្រារព្ធពិធីមួយដើម្បីអបអរខួបលើកទី៥៥ឆ្នំានៃទំនាក់ទំនងការទូតកម្ពុជា‑ចិន ហើយលោកក៏បានអញ្ជើញសម្តេចប្រធានចូលរួម។តបតាមការអញ្ជើញពីឯកអគ្គរដ្ឋទូត សម្តេច ប្រធាន រដ្ឋសភាក៏បានយល់ព្រមចូលរួមនៅក្នុងពិធីនោះ។
លោកឯកអគ្គរដ្ឋទូតក៏បានសន្យាថាទោះបីលោក បានចប់អាណត្តិការទូតនៅកម្ពុជាក្តី ឬបំពេញជាឯកអគ្គរដ្ឋទូតនៅ ប្រទេសផ្សេងៗក្តី ឬនៅស្ថាប័នផ្សេងទៀតក្តីលោកនៅតែបន្តជម្រុញកិច្ចសហប្រតិបត្តិការរវាងប្រទេសទាំងពីកម្ពុជា‑ចិនឲ្យកាន់ខ្លាំក្លាថែមទៀត៕
ដោយ៖ សំអាត