ភ្នំពេញៈ ក្នុងក្របខណ្ឌក្រសួងព័ត៌មាន និងដោយបានការឧបត្ថម្ភពីគណៈកម្មាធិការជាតិ យូណេស្កូ អគ្គនាយកដ្នាន​ទីភ្នាក់​ងារ​សារ​ព័ត៌មានកម្ពុជា AKP បានបើកវគ្គបណ្តុះបណ្តាល​មួយ ស្តីពីការគ្រប់គ្រងបណ្ណាសារ ក្រោមវត្តមានលោករដ្ឋមន្ត្រីក្រសួង​ព័ត៌​មានខៀវ កាញារីទ្ធ។លោកស្រី សុខ មុំនិមល អគ្គនាយិការទីភ្នាក់ងារសារព័ត៌មានកម្ពុជា AKP បានលើក​ឡើងថា វគ្គសិក្សា​នេះ​មានរយៈពេល​៤ថ្ងៃ​គិត​ចាប់​ពីថ្ងៃ០៥ដល់ថ្ងៃទី០៨ ខែ វិច្ឆិកា ឆ្នាំ២០១៣ ដោយ​មានសិក្ខាកាមសរុបចំនួន៣០នាក់ សុទ្ធសឹងជា​មន្ត្រីគ្រប់គ្រង​ព័ត៌មាន​ឯក​សារមកពី​គ្រប់​អគ្គនាយកដ្ឋានចំណុះក្រសួងព័ត៌មាន និងមកពីមន្ទីរព័ត៌មានរាជធានី-ខេត្តចំនួន​១៦នាក់​។

ក្នុងនោះមកពីខេត្តកំពង់ឆ្នាំង បន្ទាយមានជ័យ បាត់ដំបង សៀមរាប ព្រះសីហនុ កំពង់ធំ ក្រចេះ ស្ទឹងត្រែង ព្រះវិហារ កំពង់ចាម តាកែវ ស្វាយរៀង កំពត រាជធានីភ្នំពេញ កំពង់ស្ពឺ និងខេត្តកណ្តាល។វគ្គសិក្សានេះបង្រៀនដោយ​មន្ត្រីជំនាញ​មក​ពីនាយកដ្ឋាន​តំកល់ឯកសារជាតិ នៃទីស្តី​ការ​គណៈរដ្ឋមន្ត្រី ហើយផ្តោតជាសំខាន់លើការគ្រប់គ្រងឯកសារនានា ការងារចងក្រងសំណុំ​លិខិត ការងាររៀបចំនិងការងារកែសម្រួលឯកសារ ការងារស្ថិតិត្រួតពិនិត្យបណ្ណាសារ ការងារ​គ្រប់​គ្រង និងរក្សាឯកសារការរៀបចំ និងការថែរក្សាបណ្ណាសារ ជាពិសេសពីបច្ចេកទេសថែ​រក្សា​ហ្វីល ឬ ឯកសាររូបថត។

 រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានបញ្ជាក់ថា ការងារឯកសារនេះ​សំខាន់ណាស់ ពិសេសចំពោះផ្នែកសារព័ត៌មាន​បណ្ណា​សារ ពិតជាសំខាន់ណាស់ ដែលគ្រប់​អង្គភាពទាំងអស់ត្រូវយកចិត្តទុកដាក់ ព្រោះបណ្ណាសារវាជាខួរក្បាល​ធ្វើឲ្យយើងចេះ​
គិ​ត​​គូរ ចេះឆ្លើយ ហើយអាចដោះស្រាយសភាពការណ៍បានទាន់ពេលវេលា​នៅពេលដែលយើង​ត្រូវ​ការបន្ទាន់។

លោករដ្ឋមន្ត្រីបន្តថានៅកម្ពុជាយើងច្រើនធ្វេសប្រហែសមិនសូវជាចេះថែរក្សាឯកសារហើយបញ្ហានេះវាក្លាយជាទំលាប់មិនល្អមួយ ប៉ុន្តែការរៀបចំជាលក្ខណៈវិទ្យាសាស្ត្រ ដែលអាច​ថា​ពីជំនាន់មួយ ទៅជំនាន់មួយ ដែលអាចឲ្យយើងរកបានភ្លាមនោះ វាជាការ​លំ​បាក​​មួយ។ ដូច្នេះទើបបច្ចុប្បន្ននេះ យើងចាប់ផ្តើមយកចិត្តទុកដាក់ឡើងវិញ ជាពិសេសនៅតាមខេត្ត ដែលពុំសូវមាន​មន្ត្រីជំនាញ​ច្រើន​នោះ ទើបថ្ងៃនេះដោយបានសហការជាមួយអង្គការ​យូណេ​ស្កូនិងអគ្គនាយកដ្ឋានទីភ្នាក់ងារសារព័ត៌មានកម្ពុជា AKP រៀបចំ​បង្កើតវគ្គសិក្ខាសាលានេះ ដើម្បី​ឲ្យមន្ត្រីយើងគាត់មានបទពិសោធន៍ ហើយមានលក្ខណៈមួយយកចិត្តទុកដាក់ចេះរៀបចំ​ថែ​រក្សា​ឯក​សារ បានត្រឹមត្រូវតាមបច្ចេកទេសដូចៗគ្នា​ ដោយចាប់ផ្តើមពីក្រសួងព័ត៌មាននេះ​ទៅ៕ ដោយ៖ សស្អាត