ភ្នំពេញ៖ នៅថ្ងៃព្រហស្បត្តិ៍នេះ អគ្គនាយកដ្ឋានពន្ធនាគារ ក្រសួងមហាផ្ទៃ បានបញ្ជាក់ថា ជនជាប់ចោទ ទាំង២៣នាក់ រួមទាំងលោកវន់ ពៅ ប្រធានសមាគមប្រជាធិបតេយ្យ នៃសេដ្ឋកិច្ចក្រៅប្រព័ន្ធ មានសុខភាពជាធម្មតា និងគ្មានជំងឺបៀតបៀននោះទេ ដោយគ្រាន់តែមានរបួសស្នាមបន្តិចបន្តួច ដែលបណ្តាលមកពីការប៉ះទង្គិចគ្នានោះ។ បើទោះជាយ៉ាងនេះក្តី ខាងពន្ធនាគារ បានយកចិត្តទុកដាក់ព្យាបាល របួសភ្លាមៗ និងបន្តព្យាបាលតទៅទៀត។ ការអះអាងបែបនេះ បានធ្វើឡើងបន្ទាប់ពីក្រុមគ្រួសារសាច់ញាតិជនសង្ស័យបានលើកឡើងថា លោក វន ពៅនិងមនុស្សមួយចំនួនទៀតមានសុខភាពធ្ងន់ធ្ងរ។
.jpg)
លោកលោក គុយ ប៊ុនសន អគ្គនាយកដ្ឋានពន្ធនាគារ ក្រសួងមហាផ្ទៃ បានឲ្យដឹងថា ក្រុមគ្រួសារសាច់ញាតិទាំងអស់នៃជនជាប់ចោទ អាចជួបសួរសុខទុក្ខជនជាប់ចោទ ដោយមិនចាំបាច់ទាក់ទងមក អគ្គនាយកដ្ឋានពន្ធនាគារ ក្រសួងមហាផ្ទៃនោះទេ ដោយគ្រាន់តែទៅជួបប្រធានពន្ធនាគារដើម្បីផ្តល់ព័ត៌មាននិងសុំព័ត៌មានសម្រាប់ចូលជួបគ្រួសារសាច់ញាតិ។អគ្គនាយកដ្ឋានពន្ធនាគាររូបនេះបានឲ្យដឹងទៀតថា ជនជាប់ចោទ ដែលបង្ករអំពើហិង្សា និងបំផ្លិចបំផ្លាញ ទ្រព្យសម្បត្តិសាធារណៈ និងទ្រព្យសម្បត្តិឯកជន នៅតំបន់សេដ្ឋកិច្ចពិសេស ផ្លូវជាតិលេខ៤ និងនៅតំបន់សួនឧស្សាហកម្មកាត់ដេរ កាណាឌីយ៉ា នៅផ្លូវវេងស្រេង កាលពីថ្ងៃទី៣ និងថ្ងៃទី៤ ខែមករា ឆ្នាំ២០១៤ ទាំង២៣នាក់ រួមទាំងលោក វន ពៅ ផងនោះ ត្រូវបានបញ្ជូនខ្លួនទៅឃុំនៅមណ្ឌលអប់រំ កែប្រែទី៣ ឬពន្ធនាគារ ម៣ នៅត្រពាំងផ្លុង ខេត្តកំពង់ចាម។
.jpg)
លោកបានបញ្ជាក់ថា ចាប់តាំងពីថ្ងៃទី៣ ខែមករា ឆ្នាំ២០១៤ មណ្ឌលអប់រំកែប្រែទី៣ ឬពន្ធនាគារ ម៣ នៅត្រពាំងផ្លុង បានទទួលឃុំខ្លួន ជនជាប់ចោទបង្ករអំពើហិង្សាជាបន្តបន្ទាប់ ដោយនៅថ្ងៃទី៣ ខែមករា ឆ្នាំ២០១៤ ទទួលចំនួន ១០នាក់ ថ្ងៃទី៤ ខែមករា ឆ្នាំ២០១៤ ទទួលចំនួន ១០នាក់ និងថ្ងៃទី៥ ខែមករា ឆ្នាំ២០១៤ ទទួលចំនួន៣នាក់ទៀតសរុបចំនួន២៣។ពាក់ព័ន្ធទៅនឹងស្ថានភាពសុខភាពរបស់ជនជាប់ចោទទាំង២៣នាក់នេះ អគ្គនាយកនៃអគ្គនាយកដ្ឋានពន្ធនាគារ ក្រសួងមហាផ្ទៃ បានអះអាងថា សុខភាពនៃជនជាប់ចោទទាំងនោះ មានស្ថានភាពធម្មតា គ្មានជម្ងឺបៀតបៀននោះទេ ដោយគ្រាន់តែមានរបួសស្នាមបន្តិចបន្តួច ដែលបណ្តាលមកពីការប៉ះទង្គិចគ្នានោះ។បើទោះជាយ៉ាងនេះក្តីយើងបានយកចិត្តទុកដាក់ព្យាបាលរបួសភ្លាមៗនិងបន្តព្យាបាលតទៅទៀត។
.jpg)
សូមរម្លឹកថា ជនសង្ស័យចំនួន១០នាក់រួមទាំងលោក វន់ ពៅ ត្រូវបានចាប់ខ្លួន កាលពីថ្ងៃទី២ ខែ មករា ឆ្នាំ២០១៤ នៅចំណុចរោងចក្រ យ៉ាក ជីន ស្ថិតនៅភូមិតាកេរ្តិ៍ថ្មី សង្កាត់កំបូល ខណ្ឌពោធិ៍សែនជ័យ ទាក់ទងការប្រើអំពើហិង្សាដោយចេតនានិងបំផ្លិចបំផ្លាញទ្រព្យសម្បត្តិសាធារណៈនិងឯកជន។ ចំណែក១៣នាក់ផ្សេងទៀត ត្រូវបានចាប់ខ្លួននៅផ្លូវ វ៉េង ស្រេង កាលពីថ្ងៃទី៣ ខែមករា ឆ្នាំ២០១៤បន្ទាប់ពីមានការប៉ះទង្គិចគ្នាជាមួយអាជ្ញាធរនោះ៕
ដោយ៖ ស.ស្អាត