ភ្នំពេញៈពាក់ព័ន្ធទៅនឹងការចុះបញ្ជីពាណិជ្ជកម្មបើកអាជីវកម្មក្រុមហ៊ុនថ្មីៗនៅកម្ពុជាវិញឃើញថានៅក្នុងឆ្នាំ២០១៣ កន្លងមកនេះ បានធ្លាក់ចុះយ៉ាងខ្លាំងប្រមាណ ១២% បើប្រៀបធៀបនឹងឆ្នាំ ២០១២ បញ្ហាទាំងអស់នេះត្រូវបានស្តីបន្ទោសដោយសារតែការ ជាប់គាំងនយោបាយតែមូយគត់ដែលដើមចមធ្វើវិនិយោគិនមិនហានប្រថុយប្រថានវិនិយោគនៅទីនេះ ។
យោងតាមរបាយការណ៍ពីក្រសួងពាណិជ្ជកម្មដែលយើងទទួលបាននោះ បង្ហាញថា កម្ពុជាតាមរយៈ ក្រសួងពាណិជ្ជកម្មកម្ម បានផ្តល់លិខិតអនុញ្ញាតទៅឲ្យក្រុមហ៊ុនថ្មីៗចំនួន ២ពាន់ ៩៨៦ក្រុមហ៊ុននៅក្នុងឆ្នាំ ២០១៣ តួលេខនេះបានធ្លាក់ចុះ ១២ ភាគរយបើ ធៀបទៅនឹងរយៈពេលដូចគ្នាកាលពីឆ្នាំ ២០១២ ដែលចំនួន ៣៣៨៦ ក្រុមហ៊ុន ដែលត្រូវបានចុះបញ្ជីពាណិជ្ជកម្មបើកក្រុមហ៊ុននៅកម្ពុជា។
របាយការណ៍ដដែលបង្ហាញទៀតថាគិតចាប់ពីខែមករារហូតដល់ខែ ធ្នូ ឆ្នាំ ២០១៣ ក្រសួងពាណិជ្ជកម្មបានទទួលចុះបញ្ជីក្រុមហ៊ុនបរទេសចំនួន ១ពាន់ ៤៤៨ ក្រុមហ៊ុន បានធ្លាក់ចុះ ៩ភាគរយ និងក្រុមហ៊ុនក្នុង ស្រុករបស់កម្ពុជាបានចុះបញ្ជីចំនួន ១ពាន់ ៥៤០ ក្រុមហ៊ុន ពោលធ្លាក់ចុះ ១៤ភាគរយ បើធៀបទៅនឹង រយៈពេលដូចគ្នាកាលពីឆ្នាំ ២០១២កន្លងទៅ។
ករណីនេះដែរ ក្រុមអ្នកតាមដានសេដ្ឋកិច្ចសង្គមបានអះអាងថាការធ្លាក់ចុះនៃ ការចុះបញ្ជីពាណិជ្ជកម្មនេះ បណ្តាលមកពីការអូសបន្លាយនៃការជាប់គាំងផ្នែកនយោបាយនៅកម្ពុជាចាប់តាំងពី ខែកក្កដាឆ្នាំ២០១៣កន្លងមកនេះ បញ្ហាអស់នេះហើយដែលធ្វើឲ្យអ្នកវិនិយោគមួយចំនួននៅតែរង់ចាំអ៊ុត មើលស្ថានការណ៍ ដើម្បីធ្វើការវិនិយោគជាបន្តទៀត។ ដូច្នេះការជាប់គាំងនយោបាយយូរប្រាកដណាស់ នឹងធ្វើឲ្យប៉ះពាល់សេដ្ឋកិច្ចជាតិជាមិនខាន។
គួរបញ្ជាក់ថា ក្រុមហ៊ុនបរទេសដែលមកវិនិយោគនៅកម្ពុជា ភាគច្រើនមកពីប្រទេសចិន, កូរ៉េខាងត្បូង, ជប៉ុន, ម៉ាឡេស៊ី, និង វៀតណាម។ ក្រុមអ្នកវិនិយោគទាំងនោះ បានដំណើរការពាណិជ្ជកម្ម របស់ខ្លួន ទៅលើវិស័យសំខាន់ៗមួយចំនួនដូចជា វាយនភណ្ឌកាត់ដេរ, ស្បែកជើង, កសិកម្ម, កសិ-ឧស្សាហកម្ម, ទេសចរណ៍, និងសំណង់ អចលនទ្រព្យ….ជាដើម៕ ដោយ៖ ភីន រ៉ា