ភ្នំពេញ៖លេខាធិការដ្ឋាននៃអនុគណៈកម្មាធិការSME នៅព្រឹកថ្ងៃអង្គារិ៍ទី០២មេសានេះបានធ្វើការបង្ហាញជូន
អ្នកប្រើប្រាស់អំពីមុខម្ហូមដែលមានសុវត្ថិភាពនិងមុខម្ហូបដែលពុំទាន់មានសុវត្ថិភាព។ ក្នុងនោះមន្រ្តីក្រសួង
ឧស្សាហកម្មរ៉ែនិងថាមពលផ្តោតលើមុខម្ហូបអាហារចំនួន៣ប្រភេទដែលផលិតនៅភ្នំពេញគឺគុយទាវទឹក
ស៊ីអ៊ីវនិងទឹកម្ទេសដើម្បីផ្សព្វផ្សាយជូនអ្នកប្រើប្រាស់ឲ្យបានជ្រាបច្បាស់អំពីសុវត្ថិភាពនិងសុខភាពម្ហូប
អាហារដែលកំពុងធ្វើចរាចរនៅក្នុងរាជធានីភ្នំពេញ។
អគ្គនាយក នៃអគ្គនាយកដ្ឋានឧស្សាហកម្ម របស់ក្រសួងឧស្សាហកម្ម រ៉ែ និង ថាមពេល លោក ម៉េង សក្កិធារ៉ា
បានមានប្រសាសន៍នៅក្នុងវេទិកា អ្នកប្រើប្រាស់ ស្តីពីសុវត្ថិភាព និងសុខភាពជាចំបងថា លទ្ធផលនៃការសិក្សា
ស្រាវជ្រាវទីផ្សារកម្ពុជារបស់ក្រុមការងារអន្តរក្រសួង លើ ផលិតផលម្ហូបអាហារ យើងរកឃើញថា ផលិតផល
ចំនួន៣ប្រភេទ ដែលមាន គុយទាវ ទឹកស៊ីអ៊ីវ និងទឹកម្ទេស ដែលកំពុងដាក់ចរាចរ ក្នុងរាជធានីភ្នំពេញ ភាគច្រើន
គឺមានសុវត្ថិភាព និងគុណភាពល្អ ប៉ុន្តែផលិតផលទាំងនេះ ក៏នៅមានមួយចំនួនតូចដែលបានប្រើប្រាស់នូវសារ
ធាតុហាមឃាត់បង្ករឲ្យប៉ះពាល់ដល់សុខភាពមានន័យថា មិនទាន់បានអនុលោមតាមស្តង់ដាជាតិ និងស្តង់ដា
ក្នុងតំបន់ ឲ្យមានសុវត្ថិភាពល្អប្រសើរនៅឡើយ ហើយទាមទារឲ្យមានការជួយផ្សព្វផ្សាយពីបណ្តាញសារព័ត៌
មានក្នុងស្រុកដើម្បីណែនាំឲ្យប្រជាពលរដ្ឋ មានការប្រុងប្រយ័ត្នខ្ពស់មុននឹងទិញនូវផលិតផលអ្វីមួយយក
មកទទួលទាននោះ។
លទ្ធផលនៃការស្រាវជ្រាវបានបង្ហាញអំពីឈ្មោះសំណាកទឹកស៊ីអ៊ីវដែលពិនិត្យឃើញថាមិនមានសុវត្ថិភាពមាន
សារជាតិ 3-MCPD លើសកំរិតអនុញ្ញាត ក្នុងនោះមាន ទី១ទឹកស៊ីអ៊ីវដបជ័រគ្រួសាររីករាយ សញ្ញាភ្នំពេជ្រ ប៊ុនឃា
រូបត្រី និងមាន់ , ទី២ ដបកែវ ង៉ូវ ហេង សញ្ញាផែនដី ,ទី៣ដបកែវក្បាលគោពីរ ,ទី៤ សណ្តែកសៀង ម៉េងប៊ីហ៊ាង
,ទី៥ រូបក្របីឃ្លៀច ថៃហុងគៀត និងទី៦សញ្ញាព្រាបស។
លោកអគ្គនាយកបានបន្តថាជាដំណឹងល្អសម្រាប់អ្នករស់នៅទីក្រុងភ្នំពេញគឺគុយទាវទាំងអស់បច្ចុប្បន្ននេះ
អត់មានជាតិបូរ៉ាក់(Borax)ទៀតទេ។ កាលពីដើមគុយទាវផលិតនៅកម្ពុជាទាំងអស់មានប្រើប្រាស់ជាតិ
បូរ៉ាក់ដើម្បីឲ្យស្វិតហើយឆ្ងាញ់ប៉ុន្តែនៅពេលនេះយើងធ្វើការកែប្រែគុយទាវទាំងអស់ដែលផលិតនៅក្នុងទី
ក្រុងភ្នំពេញមាន១៤មូលដ្ឋាននៃរោងចក្រសិប្បកម្មដែលផលិតសរសៃគុយទាវនេះលែងមានប្រើប្រាស់ជាតិ
បូរ៉ាក់តទៅទៀតហើយ។
លោកអគ្គនាយកបានព្រមានថា នឹងចាត់វិធានការយ៉ាងម៉ឺងម៉ាត់(ទុនភ្លន់តែមិនទុនជ្រាយ)ចំពោះបណ្តារោង
ចក្រសហគ្រាសទាំងឡាយណាដែលមិនបានអនុវត្តឲ្យបានត្រឹមត្រូវនូវមូលដ្ឋានគុណភាពត្រឹមត្រូវដោយ
ប្រើយន្តការទន់ភ្លន់តែម៉ឺងម៉ាត់នេះតាមរយៈការចេញវិធានការរដ្ឋបាលដែលបង្កឱកាសឲ្យពួកគេកែប្រែខ្លួន
ដោយចាត់មន្រ្តីឲ្យចុះធ្វើអធិការកិច្ចធ្វើការត្រួតពិនិត្យដោយធ្វើការពន្យល់ណែនាំនិងចេញលិខិតណែនាំម្តង
ហើយៗដើម្បីឲ្យពួកគេធ្វើការកែលំអប៉ុន្តែប្រសិនបើមិនធ្វើការកែប្រែទេនោះនឹងចេញផែនការមួយទៀតគឺឲ្យពួកគេផ្អាកជាបណ្តោះអាសន្ន៣ខែឬ៦ខែ។ បើពួកគេនៅតែមិនធ្វើការកែប្រែទៀតអាជ្ញាធរនឹងដកហូតអាជ្ញា
ប័ណ្ណហើយប្រកាសបញ្ឈប់អាជីវកម្ម រោងចក្រសិប្បកម្មទាំងនោះតែម្តង៕
