ភ្នំពេញៈ បន្ទាប់ពី នីកូ បានបញ្ចេញឥទ្ធិពលដ៏មហិមានៅស្ថានីយ៍ទូរទស្សន៍បាយ័ន បណ្តាលឱ្យខ្ទាតតំណែងរបស់អ្នកដឹកនាំកម្មវិធីជើងចាស់មួយចំនួនមក ពេលនេះ ណុប សម្បត្តិនីកូ ហៅនីកូ ហាក់ស្ងប់ស្ងាត់បាត់ឈ្មោះក្នុងអាជីពចម្រៀងឈឹងតែម្តង សូម្បីតែការប្រគំតន្ត្រីធំ កាលពីថ្ងៃទី០១ ខែធ្នូ ដែលរៀបចំដោយប៉ុស្តិ៍បាយ័ន នោះ ក៏គ្មានវត្តមាននីកូ ដែរ ធ្វើឱ្យគេនិយាយថា នីកូ ធ្លាក់កូដខ្លាំង ដោយសារមិនដឹង ជាចាប់អ្វីឱ្យច្បាស់...។
កាលច្រៀងនៅផលិតកម្មM នីកូ មានកូនក្មេងតូចៗស្គាល់គ្រាន់បើ តែដល់ពេល បានធ្វើជាអ្នកកាន់កម្មវិធីនៅប៉ុស្តិ៍បាយ័ន ដោយមានការលើកបន្តុបពីបងស្រីធម៌ ស៊ឹម សូលិកា ហើយបញ្ចេញឥទ្ធិពលជ្រុលនៅបាយ័នរហូតមហាជនរិះគន់ធ្ងន់ៗនោះនីកូ កំពុងតែត្រូវបានក្មេងដែលស្គាល់គេ ថាតើតារាចម្រៀងនិយមលេងខ្លួន ដូចស្រីនេះ ចាប់អាជីពអ្វីឱ្យច្បាស់? ព្រោះអាជីពចម្រៀងមិនទាន់បានជោគជ័យផង បែរជារត់ទៅធ្វើអ្នករៀបចំ និងដឹងនាំកម្មវិធី ទាំងនៅខ្ចីបទពិសោធន៍ ធ្វើឱ្យអាជីពសិល្បៈរបស់តារាចម្រៀងរូបនេះ ធ្លាក់កូដខ្លាំង ហៅលែងឮ។
នីកូ មិនទាន់បានបង្ហាញមុខតាមឆាកតន្ត្រីធំៗ ដូចតារាល្បីៗមួយចំនួនឡើយ ដែលគេកំពុងតែត្រូវប៉ាន់កើបលុយច្រៀងតាមបណ្តាខេត្ត នានា ស្ទើររាល់ថ្ងៃនេះ ហើយបណ្តាប៉ុស្តិ៍ទូរទស្សន៍ផ្សេងៗ មិនហ៊ាន ហៅនីកូ ឱ្យច្រៀងទៀតដែរ ព្រោះតែតំណែងធំពេកនៅបាយ័ន សូម្បីតែការប្រគំតន្ត្រីរបស់ប៉ុស្តិ៍បាយ័ន ដែលរៀបចំនៅពហុកីឡដ្ឋានជាតិអូឡាំពិក កាលពីថ្ងៃទី០១ ខែវិច្ឆិកា ដោយមានតារាល្បីៗចូលរួមនោះ បែរជា បាត់មុខនីកូ ឈឹងតែម្តង ធ្វើឱ្យកូនក្មេងតូចៗ ដែលធ្លាប់ស្គាល់នីកូ នោះ បានស្រងាកចិត្តមិនតិចទេថា ហេតុអ្វីបានជាបាត់មុខនីកូ ក្នុងវេទិកា ប្រគំតន្ត្រីយុវជនដើម្បីបុព្វហេតុជាតិ នោះ? ហើយបើនៅតែអ៊ីចឹង ទៀត នីកូ ច្បាស់ជាលែងមានអ្នកណាចំណាំបានជាមិនខាន ទោះបីជា ពេលនេះ បានលោតមកទើរនៅទ្រនំធំ សាន់ដេ ក៏ដោយ តែនីកូ ត្រូវ តារាជើងខ្លាំង ខេមរៈ សិរីមន្ត និងឆាយ វីរៈយុទ្ធ ជាន់មិនឱ្យងើប រួចឡើយ។
ទាក់ទងនឹងបញ្ហាខាងលើនេះ ភ្លាមនោះ នីកូ បានចេញមុខមកបកស្រាយចម្ងាល់របស់សាធារណជន លាយឡំជាមួយនឹងសំណើចថា នោះជាការឆ្លុះបង្ហាញមិនត្រឹមត្រូវមួយ។ “ខ្ញុំបានឃើញព័ត៌មាននោះហើយបង ខ្ញុំហួសចិត្ត…តែខ្ញុំអត់ចង់តបអីទេ នាំតែវែងឆ្ងាយ!”។ តារាចម្រៀងរូបនេះ លើកឡើងទៀតថា បច្ចុប្បន្ននេះលោករវល់ដកខ្លួនមិនរួច ទាំងអាជីពចម្រៀង និងការងារទូរទស្សន៍ទៀត ដែលលោកកាន់កម្មវិធី “វិស្សមកាលតន្ត្រី” និង “តន្ត្រីយុវវ័យ។ អីចឹងនោះ ជាមូលហេតុមួយដែលនាំលោក មិនសូវបានចេញមុខតាមកម្មវិធីតន្ត្រីនានា។
ក្រៅពីអាជីពចម្រៀង និងការងារគ្រប់គ្រងកម្មវិធីទាំងពីរខាងលើរបស់ស្ថានីយទូរទស្សន៍ បាយ័ន លោក នីកូ ក៏មានអាជីពបន្ទាប់បន្សំមួយទៀតដែរ គឺការងារផ្នែករចនាសំលៀកបំពាក់។ ការងារនេះ លោកចាប់ដៃគ្នាជាមួយលោក ណុប បាយ៉ារិទ្ធ ជាបងប្រុស ក្នុងនោះសំលៀកបំពាក់តួសម្ដែងក្នុងរឿង “ម៉េចដែរ? ខ្លាចអត់?” ដែលកំពុងបញ្ចាំងនៅ Platinum Cineplex នោះ រួមទាំងម៉ូដសម្រាប់ក្រុមម៉ូដែលស្លៀកក្នុងកម្មវិធីស្រាបៀអង្គរតាម បណ្តាខេត្តជាដើមនោះ គឺបងប្អូនលោកជាអ្នករចនា។គួរបញ្ជាក់ថា អ្នកចម្រៀងណុប សម្បត្តិនីកូ កន្លងមក ត្រូវគេសង្ស័យមានស្នេហាភេទដូចគ្នាជាមួយពិធីករ អៀង វិច្ឆ័យ ដោយសារតែពួកគេស្និទ្ធស្នាលគ្នាខុសធម្មតា តែនីកូ និងវិច្ឆ័យ បានច្រានចោល។ ប៉ុន្តែភាពស្និទ្ធស្នាលគ្នារវាងតារាប្រុសទាំង២ដួង ធ្វើឱ្យទស្សនិកជននៅតែសង្ស័យ។
អ្នកស្គាល់នីកូ បាននាំគ្នានិយាយថា បើអ្នកចម្រៀងរូបនេះ មិនប្រឹងស្តារកេរ្តិ៍ឈ្មោះ វិញ ពិតជាពិបាកហើយ ព្រោះតារាស្រករគ្នា គេទៅមុខអស់ហើយ នៅឡើយតែ នីកូ ទ្រឹងនៅសាន់ដេ ហើយស្ងប់ស្ងាត់ដូចសមុទ្រស្ងប់ខ្យល់ ដែលមូលហេតុ នៃការធ្លាក់កូដរបស់តារាចម្រៀងរូបនេះ ត្រូវបានអ្នកជំនាញសិល្បៈមួយចំនួន យល់ថា ដោយសារឥទ្ធិពលនៃការរិះគន់ចំពោះអត្តចរិតរបស់តារារូបនេះ កន្លងមក រួមទាំងការចាប់យកទ្រនំ និងជំនាញសិល្បៈមិនច្បាស់លាស់ ដូចពាក្យចាស់ពោលថា “ចាប់នេះ ចាប់នោះ មិនឆ្ពោះត្រង់ណា” នោះឯង ៕ ដោយៈភីន រ៉ា