កំពង់ចាម៖ មនុស្ស៤នាក់ស្លាប់ និងមនុស្ស៦នាក់ផ្សេងទៀតបានរងរបួសធ្ងន់ស្រាលនៅក្នុងហេតុការណ៍គ្រោះថ្នាក់ចរាចរណ៍ ដែលបណ្តាលមកពីរថយន្តពីរបុកគ្នាយ៉ាងពេញទំហំ ខណៈពេលកំពុងបើកវ៉ាគ្នា។លោកឌឹម ហ៊ូ នាយផ្នែកព្រហ្មទណ្ឌស្រុកមេមត់ បានមានប្រសាសន៍ថា រថយន្តកែឆ្នៃដាក់ទ្រុងមួយគ្រឿង បានបើកលឿនដូចហោះ ក្នុងបំណងវ៉ារថយន្តហ៊ីយ៉ាន់ដាយមួយគ្រឿងទៀតដែលស្ថិតនៅពីខាងមុខ ប៉ុន្តែវ៉ាមិនផុតទើបរេចង្កូតជ្រុលទៅបុកហ៊ីយ៉ាន់ដាយពីក្រោយយ៉ាងពេញទំហឹង ក្នុងទិសដៅស្របគ្នា បណ្តាលឲ្យមនុស្ស៤នាក់ស្លាប់ និង៦នាក់ ទៀតបានរងរបួសធ្ងន់ស្រាលផងដែរនៅក្នុងហេតុការណ៍នោះ។
លោកបន្តថា ក្នុងហេតុការណ៍គ្រោះថ្នាក់ចរាចរណ៍នោះមនុស្សរងរបួសធ្ងន់ស្រាលចំនួនមានចំនួន៦នាក់ កំពុងតែដេកសម្រាកព្យាបាលជំងឺនៅមន្ទីរពេទ្យរហូតមកដល់ពេលនេះ។ លោកបញ្ជាក់ថា៖«រថយន្តបង្កហេតុនិងរថយន្តជនរងគ្រោះ ត្រូវបានធ្វើការរឹបអូស យកទៅរក្សាទុកនៅអធិការដ្ឋានស្រុកមេមត់ ដើម្បីរង់ចាំម្ចាស់ចូលខ្លួនមកដោះស្រាយ។
បើតាមរបាយការណ៍សមត្ថកិច្ចចរាចរណ៍ខេត្តកំពង់ចាមបានឲ្យដឹងថា មានហេតុការណ៍គ្រោះថ្នាក់ចរាចរណ៍ មួយ ត្រូវបានកើតឡើង កាលពីវេលាម៉ោង៧និង៣០នាទីព្រឹក ថ្ងៃទី៩ ខែមីនា ឆ្នាំ២០១៤ នៅតាមបណ្តោយផ្លូវជាតិលេខ៧ ស្ថិតក្នុងភូមិស្លា ឃុំទន្លូង ស្រុកមេមត់ ខេត្តកំពង់ចាម ដែលបង្កឡើងដោយរថយន្ត ពីរគ្រឿងបុកគ្នាពីក្រោយ ខណៈពេលកំពុងបើកបរក្នុងស្ថានភាពវ៉ាគ្នា។
របាយការណ៍ដដែលនេះបានឲ្យដឹងថា អ្នកស្លាប់នៅក្នុងហេតុការណ៍នេះមានឈ្មោះម៉ាល់ពែក ភេទស្រី អាយុ៦៤ឆ្នាំ រស់នៅភូមិក្បុលលើ ឃុំទន្លូង ស្រុកមេមត់ ខេត្តកំពង់ចាម ទី២ ពុយ រស្មី ភេទស្រី អាយុ១ខួបកន្លះ រស់នៅភូមិពងទឹក ឃុំទន្លូង ស្រុកមេមត់ ខេត្តកំពង់ចាម ទី៣ សាត សំអ៊ុល ភេទស្រី អាយុ៥១ឆ្នំា រស់នៅភូមិពងទឹក ឃុំទន្លូង ស្រុកមេមត់ ខេត្តកំពង់ចាម និងទី៤ ចន តោ ភេទប្រុស អាយុ១៣ ឆ្នាំរស់នៅឃុំទន្លូង ស្រុកមេមត់ ខេត្តកំពង់ចាម។
លោកឌឹម ហ៊ូបានបញ្ជាក់ថា រថយន្តដឹកអ្នកដំណើរប្រភេទហ៊ីយ៉ាន់ដាយ ព័ណ៌ខៀវ ពាក់ស្លាកលេខ ដ០៧២៨ ភព២ បានបើកបរពីមុខរថយន្តបង្កហេតុ ក្នុងទិសដៅពីកើតទៅលិច លុះមកដល់ចំណុចកើតហេតុ រថយន្តបង្កហេតុបានបង្កើនល្បឿន ក្នុងបំណងបើកវ៉ារថយន្តហ៊ីយ៉ាន់ដាយដែលនៅពីខាងមុខ ខណៈពេលវ៉ាក់អើជាមួយនិងរថយន្តសាឡែនដឹកប្រេងសាំង ដែលកំពុងបើកបរច្រាសទិសគ្នា ទើបធ្វើឲ្យរថយន្តបង្កហេតុចាប់ហ្វ្រាំងមិនជាប់ បណ្តាលឲ្យបុកហ៊ីយ៉ាន់ដាយ ពីក្រោយយ៉ាងពេញទំហឹង ក្រឡាប់ចាក់មនុស្សពីលើរថយន្តស្លាប់ និងរបួសជាច្រើននាក់៕ ដោយ៖ អភិរក្ស