ភ្នំពេញៈ គ្រោះថ្នាក់ចរាចរណ៍នៅកម្ពុជាបានធ្វើឲ្យខាតបង់សេដ្ឋកិច្ចជាតិប្រមាណជាង ៣០០លានដុល្លាសហរដ្ឋអាមេរិកជារៀងរាល់ឆ្នាំទៅក្នុងអ្វីដែលយើងទាំងអស់គ្នាអាចចូលរួមកាត់បន្ថយបាន។ ការខាតបង់នេះជាចំនួនដ៏ធំធេងហួសពីការស្មានក្នុងពេលដែលរាជរដ្ឋាភិបាល និងប្រជាជនយើងកំពុងតែតស៊ូដើម្បីកាត់បន្ថយភាពក្រីក្រ។
.JPG)
នេះជាការលើកឡើងរបស់លោកជំទាវ មឹន មាណវី រដ្ឋលេខាធិការក្រសួងសាធារណៈការ និងដឹកជញ្ជូន និងជាអនុប្រធានគណៈកម្មាធិការជាតិសុវត្តិភាពចរាចរណ៍ផ្លូវគោក ថ្លែងនៅក្នុងសិក្ខាសាលាថ្នាក់ជាតិមួយស្តីពី«កត្តាហានិភ័យនៃការបើកបរហួសល្បឿងកំណត់» នៅព្រឹកថ្ងៃទី ១៧ មីនា នៅសណ្ឋាគារ អ៊ីមភឺរៀល។
.jpg)
លោកជំទាវបន្តថា គ្រោះថ្នាក់ចរាចរណ៍គឺជាបញ្ហាសុខភាពសាធារណៈចំបងនិងបានក្លាយទៅជាប្រធានបទដ៏ក្តៅគគក់ចំពោះប្រទេសយើងនាពេលបច្ចុប្បន្ននេះ ហើយដែលត្រូវបានបណ្តាញសារព័ត៌មានផ្សព្វផ្សាយនៅលើទំព័រមុខជារៀងរាល់ថ្ងៃ។ជាក់ស្ដែង ទិន្នន័យបឋមនៃរបាយការណ៍ជនរងគ្រោះដោយគ្រោះថ្នាក់ចរាចរណ៍ឆ្នាំ២០១៣ បានបង្ហាញឲ្យឃើញថាគ្រោះថ្នាក់ចរាចរណ៍មានចំនួន ៤,៣២២ករណី មានចំនួនអ្នកស្លាប់ ១,៩៦២នាក់របួសធ្ងន់៥,៥៩៣នាក់ ។ បើប្រៀបនឹងឆ្នាំ២០១២ ចំនួនអ្នកស្លាប់មានការថយចុះ០៤នាក់របួសធ្ងន់កើនឡើង២៤៤។
លោកជំទាវរដ្ឋលេខាធិការនៃក្រសួងសាធារណៈការបញ្ជាក់ថា ការបើកបរហួសល្បឿនកំណត់នៅតែជាមូលហេតុចំបងទីមួយ ហើយការបើកបរក្រោមឥទ្ធិពលគ្រឿងស្រវឹងនៅតែជាមូលហេតុចំបងទីពីរនៃការបង្កឲ្យមានគ្រោះថ្នាក់ចរាចរណ៍។ ហើយមូលហេតុទំាងនេះគឺភាគច្រើនបង្កមកពីកត្តាមនុស្ស និយាយយ៉ាងខ្លីគឺការមិនគោរពច្បាប់របស់អ្នកប្រើប្រាស់ផ្លូវមួយចំនួន និងការបើកបរដោយមិនទទួលការខុសត្រូវដល់អាយុជីវិតរបស់ខ្លួន និងជីវិតអ្នកដទៃ។ជាការឆ្លើយតបទៅនឹងស្ថានភាពគ្រោះថ្នាក់ចរាចរណ៍ និងដើម្បីកាត់បន្ថយការស្លាប់ដែលចេះតែកើនឡើងពីមួយថ្ងៃទៅមួយថ្ងៃ ដែលអាចចៀសវាងបាននេះ គណៈកម្មាធិការជាតិសុវត្ថិភាពចរាចរណ៍ផ្លូវគោក ក្រសួងស្ថាប័នពាក់ព័ន្ធ ព្រមទាំងដៃគូអភិវឌ្ឍន៍ បានសហការគ្នាធ្វើវិសោធនកម្មច្បាប់នូវមាត្រាមួយចំនួនហើយបានបង្កើតច្បាប់ចរាចរណ៍ផ្លូវគោកថ្មី ដោយបានបង្កើនការដាក់ទោសទណ្ឌធ្ងន់ធ្ងរ និងការផាកពិន័យចំពោះបទល្មើសច្បាប់ចរាចរណ៍ជាពិសេសការបើកបរហួសល្បឿនកំណត់ បើកបរក្រោមឥទ្ធិពលគ្រឿងស្រវឹង និងការមិនពាក់មួកសុវត្ថិភាពរហូតដល់ទៅ ៥ដងនៃការផាកពិន័យបច្ចុប្បន្ន។
ជាមួយនេះដែរ លោកជំទាវ មឹន មាណវី បានជំរុញលើកទឹកចិត្តដល់ស្ថាប័នពាក់ព័ន្ធជួយធ្វើការផ្សព្វផ្សាយបន្ត និងជាពិសេសបណ្តាញសារព័ត៌មានជាតិទាំងអស់ សូមបង្កើនការសរសេរ និពន្ធអត្ថបទ និងផ្សព្វផ្សាយអំពីសុវត្ថិភាពចរាចរណ៍ប្រកបដោយគុណភាពបន្ថែមទៅលើចំនួនគ្រោះថ្នាក់ដែលបានរាយការណ៍ ដោយមានការពិភាក្សាស៊ីជំរៅអំពីការគោរពច្បាប់ ផលប៉ះពាល់ធ្ងន់ធ្ងរដល់សេដ្ឋកិច្ចសង្គមជាតិ បន្ទុកធ្ងន់ធ្ងរនៃសេវាសុខាភិបាលចំពោះជនរងគ្រោះក្នុងគោលបំណងកែប្រែឥរិយាបទ និងអាកប្បកិរិយារបស់អ្នកប្រើប្រាស់ផ្លូវដោយប្រកាន់យកនូវការគោរពច្បាប់ការទទួលខុសត្រូវនៅពេលមានគ្រោះថ្នាក់កើតឡីង និងការអធ្យាស្រ័យយោគយល់គ្នានៅពេលបើកបរជាដើម។ល។
គួរបញ្ជាក់ថាបើយោងទៅតាមការសិក្សាមួយរបស់អគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោកដែលបានធ្វើកន្លងមកនៅឆ្នាំ២០១៣ បានបង្ហាញឲ្យឃើញថាហេតុផលដែលបណ្តាលឲ្យមានការបើកបរហួសល្បឿនកំណត់ គឺបណ្តាលមកពីកត្តាបីយ៉ាង៖ ១. គឺប្រញាប់ ខ្លាចស្ទះផ្លូវ មាន ៩៤.៤៦% , ២. ភាពយុវវ័យ បើកបរវ័ក្មេង ៣.១៣% , ៣. ផ្លូវស្ងាត់ងាយស្រួលបើកបរ ១.២០%។ កត្តាទំាងអស់នេះហើយដែលបណ្តាលឲ្យមានគ្រោះថ្នាក់ ហើយគ្រោះថ្នាក់ទំាងអស់នេះ តាមពិតគឺយើងអាចបញ្ចៀសបាន ប្រសិនបើយើងទំាងអស់គ្នាចូលរួមក្នុងការអប់រំផ្សព្វផ្សាយចូលរួមក្នុងការគោរពអនុវត្តច្បាប់ចរាចរណ៍ផ្លូវគោក៕ ដោយ៖ ភីន រ៉ា