ភ្នំពេញ៖ ឯកអគ្គរាជទូតជប៉ុនប្រចាំកម្ពុជា លោក គូម៉ាម៉ារូ យូជិ បានសន្យាថា នឹងខិតខំបន្តជំរុញអោយមានបរិយាកាសល្អ ដើម្បី ទាក់ទាញអ្នកវិនិយោគទុនជប៉ុននានា មកបណ្តាក់ទុននៅកម្ពុជាឱ្យកាន់តែច្រើន។បន្ថែមលើការគាំទ្រលើក្របខណ្ឌកិច្ចសហប្រតិបត្តិការហិរញ្ញប្បទានឥតសំណង ឥណទានសម្បទាន និងបច្ចេកទេស ក្នុងជំនួបពិភាក្សាការងារជាមួយ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃម្សិលមិញ ឯកអគ្គរាជទូតជប៉ុនបាន ស្នើសុំអោយក្រសួងសេដ្ឋកិច្ច ពិនិត្យបរិស្ថានសម្រួលដល់ការវិនិយោគ ជាពិសេសការអនុវត្តច្បាប់ពន្ធដារ និងពន្ធគយដែលធានាដល់ការប្រកួតប្រជែងក្នុងទីផ្សារប្រកបដោយសមធម៌ ដើម្បីផ្តល់ជាឱកាសដល់អ្នកវិនិយោគជប៉ុន និងក្រុមហ៊ុននានាដែលបានកំពុងបណ្តាក់ទុននិងត្រៀមមកបណ្តាក់ទុននៅកម្ពុជា។
លោក អូន ព័ន្ធមុនីរ័ត្ន បានមានប្រសាសន៍ថា ក្រសួងសេដ្ឋកិច្ចនឹង បន្តពិនិត្យលើគោលនយោបាយនានានិងបង្កអោយមានយន្តការដោះស្រាយរួមមួយ មិនមែនសម្រាប់តែអ្នកវិនិយោគទុនជប៉ុននោះទេប៉ុន្តែមានទិសដៅសម្រាប់សម្រួលដល់ការវិនិយោគទុន
របស់ដៃគូប្រទេសជាមិត្តនានា ដែលចាប់អារម្មណ៍មកបណ្តាក់ទុននៅកម្ពុជា។លោកបានបញ្ជាក់ថា រាជរដ្ឋាភិបាលកម្ពុជានៅតែបន្តពង្រឹង និងពង្រីកចំណងមិត្តភាព និងកិច្ចសហប្រតិបត្តិការនានា រវាងរដ្ឋាភិបាលនិងប្រជាជននៃប្រទេសទាំងពីរ កម្ពុជា ជប៉ុន អោយរឹតតែប្រសើរជាងនេះ និងសូមថ្លែងអំណរគុណយ៉ាងជ្រាលជ្រៅផងដែរដល់ប្រជាជន និងរដ្ឋាភិបាលជប៉ុនចំពោះជំនួយសង្គ្រោះបន្ទាន់ជា សម្ភារៈ បរិក្ខារ គិតជាទឹកប្រាក់ប្រមាណ៣២០ ០០០ដុល្លារអាមេរិកក្នុងគ្រាដែលប្រទេសកម្ពុជាជួបគ្រោះទឹកជំនន់ឆ្នាំ២០១៣នេះ។គួរបញ្ជាក់ថា ចាប់តាំងពីឆ្នាំ១៩៩១មក រដ្ឋាភិបាលជប៉ុន បានផ្តល់ថវិកាជាង៤៩.៩លានដុល្លារអាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាលដើម្បីអនុវត្តគម្រោងចំនួន៤៩៩គម្រោងនៅទូទាំងប្រទេស៕
ដោយ៖ រតនា