ភ្នំពេញ៖ ធនាគារអភិវឌ្ឍន៍អាស៊ី ហៅកាត់ (ADB) បានគ្រោងនឹងផ្តល់ថវិកាជាទឹកប្រាក់ចំនួនប្រមាណ៧,៤លានដុល្លារអាម៉េរិកដល់រដ្ឋបាលព្រៃឈើ សម្រាប់អភិវឌ្ឍន៍ផែនការគម្រោងធ្វើឲ្យប្រសើរឡើងនូវសមត្ថភាពធន់ទ្រាំនិងការប្រែប្រួលអាកាសធាតុ ក្នុងវិស័យកសិកម្ម ព្រៃឈើ ផ្គត់ផ្គង់ទឹក និងធនធានតំបន់ឆ្នេររហូតដល់ឆ្នាំ២០១៩ នៅខេត្តកោះកុង និងខេត្តមណ្ឌលគិរី។
.JPG)
ថ្លែងក្នុងសិក្ខាសាលាស្តីពី «ការធ្វើឲ្យប្រសើឡើងនូវសម្ថភាពធន់ទ្រាំនឹង ការប្រែប្រួលអាកាសធាតុ» នាព្រឹកថ្ងៃទី២ ខែធ្នូ នេះ លោក សុខ ហេង ព្រៃ តំណាងឲ្យភាគីរាជរដ្ឋាភិបាល និងជាប្រធានវិទ្យាស្ថានស្រាវជ្រាវ និងអភិវឌ្ឍន៍ព្រៃឈើ-សត្វ បានមានប្រសាសន៍ថា កន្លងមក អាកាសធាតុនៅកម្ពុជា តែងតែប្រែប្រួលមិនទៀងទាត់ ដែលធ្វើឲ្យប្រជាកសិករ ជួបការលំបាកច្រើនក្នុងការបង្កបង្កើនផល។
.jpg)
លោកបន្តថា ជាការឆ្លើយតបនឹងបញ្ហាប្រែប្រួលអាកាសធាតុ ធនាគារអភិវឌ្ឍន៍អាស៊ី សហការជាមួយរដ្ឋាភិបាល សម្រេចបង្កើតគម្រោងអភិវឌ្ឍន៍ផ្សេងៗ ដូចជាការសាងសង់ប្រព័ន្ធធារាសាស្ត្រ ក្នុងការផ្តល់ភាពងាយស្រួលទៅដល់កសិករ។លោក សុខ ហេង បញ្ជាក់ថា សម្រាប់គម្រោងដែល ADB ប្រគល់ឲ្យនេះដែរ គឺធ្វើឡើងនៅក្នុងខេត្តចំនួនពីរនៃប្រទេសកម្ពុជាយើង ដែលមានធនធានធម្មជាតិច្រើនជាងគេ គឺខេត្តកោះកុង និងមណ្ឌលគិរី ដោយមានការផ្ដោតសំខាន់ទៅលើភាពបន្សាំនៃការប្រែប្រួល អាកាសធាតុ ក្នុងវិស័យកសិកម្ម ព្រៃឈើ ផ្គត់ផ្គង់ទឹក និងធន់ធានតំបន់ឆ្នេរ។
ចំណែកលោក Jack Katzfey ប្រធានវិទ្យាស្ថានស្រាវជ្រាវឧស្សាហកម្ម និងវិទ្យាសាស្ត្រនៃសហគមន៍(CSIRO) បានលើកឡើងថា គម្រោងនេះនឹងជួយលើកកម្ពស់ជីវភាពរបស់ប្រជាពលរដ្ឋ តាមរយៈចំណូលបានមកពី ការអភិរក្សធនធានព្រៃធម្មជាតិ និងការរក្សាទឹកទុកសម្រាប់បង្ករបង្កើនផល។ពាក់ព័ន្ធជាមួយនោះដែរ មន្ត្រីជំនាញបរិស្ថានក៏បានឲ្យដឹងថា គម្រោងអភិវឌ្ឍន៍ខេត្តទាំងពីរខាងលើនេះ នឹងចាប់មអនុវត្តនៅដើមឆ្នាំ២០១៤ខាងមុខនេះ។
គម្រោងនៅខេត្តមណ្ឌលគិរី នឹងផ្តោតទៅលើការការពារជម្រកសត្វព្រៃលំផាត់ ក្នុងភូមិភាគខាងជើង និងតំបន់ឆ្លងដែនឧទ្យានជាតិ យ៉ុកដុន ភាគខាងជើងប្រទេសវៀតណាម។ ចំណែកឯខេត្តកោះកុង គម្រោង នឹងផ្តោតទៅលើការពារ និងពង្រឹងប្រព័ន្ធអេកូឡូស៊ី ក្នុងតំបន់ព្រៃការពារជួរភ្នំក្រវាញកណ្តាល និងភាគខាងត្បូង និងសួនឧទ្យានជាតិបទុមសាគរ និងតំបន់ជម្រកសត្វព្រៃពៀមក្រសោបជាដើម៕ ដោយ ៖ ភីនរ៉ា