ភ្នំពេញ៖ អគ្គលេខាធិការដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ តំណាងឲ្យរាជរដ្ឋាភិបាល នៃ ព្រះរាជាណា ចក្រកម្ពុជានិងអង្គការ GIZ នឹងធ្វើជាម្ចាស់ផ្ទះតំណាងឲ្យសហគមន៍អាស៊ាននៃកម្មវិធី «និរន្តរភាពប្រព័ន្ធកសិចំណីអាហារ នៃសហគមន៍អាស៊ាន» នៅថ្ងៃទី១១ ខែមីនាស្អែកនេះ។យោងតាមសេចក្តីប្រកាសព័ត៌មានរបស់អគ្គលេខាធិការដ្ឋានកសិកម្ម គំរោងនិរន្តរភាពប្រព័ន្ធកសិចំណីអាហារនៃសហគមន៍អាស៊ាន បានជួយគាំទ្រដំណើរការអភិវឌ្ឍន៍ ការសម្របសមួ្រលគោលនយោបាយ និងយុទ្ធសាស្ត្រនានា ដើម្បីធានានិរន្តរភាពប្រព័ន្ធកសិចំណីអាហារបន្ថែមទៀតដល់ប្រទេសកម្ពុជា។
ហើយគម្រោងនេះ នឹងជួយសម្រួលលំហូរពត៌មាន ដូចជាកិច្ចសន្ទនាថ្នាក់តំបន់ទៅលើគោលនយោបាយពង្រឹងការប្រើប្រាស់ធាតុចូលប្រកបដោយនិរន្តរភាព និង ការអនុវត្តន៍គំរូល្អលើវិស័យកសិកម្ម។លោក សូខន រិទ្ធីគុណ អគ្គនាយកនៃអគ្គលេខាធិការដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានថ្លែងតាមទូរស័ព្ទនៅថ្ងៃនេះថា កម្មវិធីនៃកិច្ចប្រជុំថ្ងៃស្អែកនេះ នឹងមានអ្នកឯកទេសជំនាញល្បីៗជាច្រើនមកពីប្រទេសអាស៊ាន និងអាល្លឺម៉ង់ ហើយកម្ពុជានឹងពិនិត្យមើលមតិយោបល់ ដើម្បីសម្រេចចិត្តថាតើគួរយកតាមប្រទេសណា ដើម្បីធានាបានសុវត្ថិភាពចំណីអាហារ។
សេចក្តីប្រកាសព័ត៌មានរបស់អគ្គលេខាធិការដ្ឋានកសិកម្មបន្តថា គម្រោងក៍បានសហការជាមួយផ្នែកឯកជន ដើម្បីសាកល្បងការអនុវត្តន៍ទាំងនេះ និងការប្រើប្រាស់ធាតុចូលប្រកបដោយនិរន្តរភាព នៅលើតំបន់សាកល្បងមួយចំនួននៅ ប្រទេសកម្ពុជា ប្រទេសថៃ និងឥណ្ឌូនេស៊ីជាដើម។
គោលបំណងសំខាន់ៗនៃកិច្ចប្រជុំដៃគូរគំរោងទី៤ របស់កម្មវិធី និរន្តរភាពប្រព័ន្ធកសិចំណីអាហារនៃសហគមន៍អាស៊ាននេះ គឺដើម្បីពិនិត្យមើលរាល់សមិទ្ធិផលដែលសំរេចបានក្នុងដំណាក់កាលទីមួយនៃគម្រោង និងពិភាក្សាអំពីការអនុវត្តន៍គំរោងដំណាក់កាលទីពីរ។ សិក្ខាកាម នឹងផ្តោតការពិភាក្សាការអនុវត្តន៍គម្រោង«ក្របខ័ណ្ឌសមាហរណកម្មសុវត្ថភាពចំណីអាហារសហគមន៍អាស៊ាន - AIFS» ថ្នាក់ជាតិ ដែលមានគោលបំណងដើម្បីលើកកម្ពស់សុវត្ថភាពចំណីអាហារក្នុងរយៈពេលវែង និងលើកកំពស់ផងដែរជីវភាពកសិករនៃសហគមន៍អាស៊ានទាំងមូល ក៍ដូចជាការបង្កើនផលិតកម្មចំណីអាហារ និងបង្កើនវត្ថុធាតុដើមកសិកម្មសុវត្ថភាព។
នៅកម្ពុជាក្រុមបុគ្គលិកអនុវត្តគំរោងមានទីតាំងនៅអង្គការCEDAC ដែលសហការលើគម្រោងលើកកំពស់ផងដែរជីវភាពកសិករ និងផលិតកម្មចំណីអាហារសរីរាង្គ។ ក្នុងឆ្នាំ២០១៤ គំរោងផ្តោតជាសំខាន់លើភាពជាដៃគូជាមួយរដ្ឋបាលសាធារណៈ និងឯកជន នៅក្នុងចង្វាក់ផលិតកម្មកសិកម្ម ដែលនឹងនាំមកនូវផលចំណេញដល់កសិករខ្នាតតូច ៕ ដោយ៖ រតនា