ភ្នំពេញ: កាលពីឆ្នាំ២០១៣កន្លងទៅថ្មីៗនេះ ព្រះរាជាណាចក្រកម្ពុជាបាននាំអង្ករចេញទៅក្រៅប្រទេសដោយស្ថិតនៅក្រោមប្រព័ន្ធអនុគ្រោះបានចំនួន ៣៨៥.២៩៦ តោន កើនឡើងប្រមាណ៥១ភាគរយបើធៀបនឹងឆ្នាំ២០១២ ដែល មានប្រមាណ២៥៤.៩១៣តោន។លោក កឹម ស៊ីថន រដ្ឋលេខាធិការក្រសួងពាណិជ្ជកម្ម បានថ្លែងយ៉ាង ដូច្នេះកាលពីព្រឹកថ្ងៃទី២២ ខែមករា ឆ្នាំ២០១៤ នៅសណ្ឋាគារសាន់វេ រាជធានីភ្នំពេញ ក្នុងសន្និបាតប្រចាំឆ្នាំ និងសិក្ខាសាលាយុទ្ធសាស្ត្ររបស់សហព័ន្ធអ្នកនាំចេញអង្ករកម្ពុជាដោយមានអ្នកចូលរួមប្រមាណជា ៣០០នាក់។
លោក កឹម ស៊ីថន មានប្រសាសន៍បន្តថា ដោយមានចក្ខុវិស័យច្បាស់លាស់ និងចង់ឲ្យកម្ពុជា ក្លាយជាជង្រុកស្រូវនិងជាប្រទេសនាំចេញអង្ករសំខាន់មួយ នៅទីផ្សារពិភពលោក រាជរដ្ឋាភិបាលកម្ពុជាបានកំណត់យកឆ្នាំ២០១៥ជាឆ្នាំគោលដើម្បីជំរុញការផលិតស្រូវឲ្យបានច្រើនជាង ៤ លានតោនក្នុងនោះបរិមាណអង្ករសម្រាប់នាំចេញត្រូវសម្រេចឲ្យបានយ៉ាងតិច១ លានតោន និងធ្វើឲ្យអង្ករកម្ពុជាត្រូវបានទទួលស្គាល់ជាអន្តរជាតិ។លោករដ្ឋាលេខាធិការក្រសួងពាណិជ្ជកម្ម បានលើកឡើងទៀតថា អង្ករកម្ពុជា ទទួលបានពានរង្វាន់ពិភពលោក ជាអង្ករល្អបំផុត គឺអង្ករផ្កាម្លិះក្នុងរយៈពេលពីរឆ្នាំ ជាប់គ្នា នៃការប្រកួតប្រជែងអង្ករ មានរសជាតិឆ្ងាញ់ជាងគេនៅកោះបាលី(ឆ្នាំ២០១២)និងនៅហុកុង
(ឆ្នាំ២០១៣)។ឆ្លៀតឱកាសនោះដែរ លោកក៏បានស្នើដល់សហព័ន្ធអ្នកនាំចេញអង្ករកម្ពុជា រក្សាកិច្ចសហការល្អប្រសើរជាបន្ថែមទៀត ជាពិសេស
១.យកចិត្តទុកដាក់ត្រួតពិនិត្យ គុណភាពអង្ករ សម្រាប់ការនាំចេញ។
២. ត្រូវគ្រប់គ្រងការពារអង្ករខ្មែរ សម្រាប់ការនាំចេញ ដើម្បីធានាថា មិនមានការក្លែងបន្លំ ដែលអាចធ្វើឲ្យបាត់បង់ទីផ្សារអង្ករ ដែលកំពុងទទួលបានភាពអនុគ្រោះពន្ធនៅសហគមន៍អឺរ៉ុប។
៣. ត្រូវការពារចំណាត់ថ្នាក់កេរ្តិ៍ឈ្មោះអង្ករផ្កាម្លិះ របស់ព្រះរាជាណាចក្រកម្ពុជា នៅលើទីផ្សារពិភពលោកឲ្យបានស្ថិតស្ថេរ និង
៤.ធ្វើឲ្យវិស័យស្រូវ-អង្ករ នៅព្រះរាជាណាចក្រកម្ពុជា អាចទទួលបាននូវការប្រកួតប្រជែង ទាំងនៅទីផ្សារតំបន់និងសកលលោក។
សូមបញ្ជាក់ថាវិស័យពាណិជ្ជកម្ម បានបន្តជំរុញគ្រប់សកម្មភាព ដើម្បីរួមចំណែកពង្រីកទំហំពាណិជ្ជកម្ម និងបន្តរក្សាកំណើនក្នុងការនាំចេញផលិតផល របស់កម្មទៅទីផ្សារបរទេសដែលជាកត្តារួមផ្សំដ៏សំខាន់នៅក្នុងកំណើនសេដ្ឋកិច្ច ដូចក្នុងឆ្នាំ២០១២ សម្រេចបាននូវកំណើន ៧,៣ ភាគរយ និងព្យាករណ៍ឆ្នាំ២០១៣ អាចនឹងសម្រេចបានប្រមាណ ៧,៦ ភាគរយ ដែលរួមចំណែកដល់ការធានាស្ថិរភាពម៉ាក្រូសេដ្ឋកិច្ច របស់ព្រះរាជាណាចក្រកម្ពុជា៕ ភីន រ៉ា