ភ្នំពេញៈ ទិន្នផលស្រូវកម្ពុជាបានកើនឡើងជាង៣ម៉ឺនតោនក្នុងឆ្នាំ២០១៣ បើទោះបីជាកម្ពុជាបានជួបប្រទះនូវគ្រោះធម្មជាតិទឹកជំនន់ និងគ្រោះរាំងស្ងួតធ្ងន់ធ្ងរក៍ដោយ។
ក្នុងពិធីបិទកិច្ចប្រជុំបូកសរុបលទ្ធផលការងារឆ្នាំ២០១៣និង លើកទិសដៅឆ្នាំ២០១៤ របស់អគ្គនាយកដ្ឋានកសិកម្មនៅព្រឹកថ្ងៃ១៧មករានេះរដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ លោកបណ្ឌិត អ៊ុក រ៉ាប៊ុនបានថ្លែងថាកម្ពុជាបានរងការខូចខាតដោយទឹកជំនន់នូវស្រូវវស្សាចំនួន១២ម៉ឺន៨ពាន់៩៨១ហិចតាប៉ុន្តែទោះជាយ៉ាងណាទិន្នផលស្រូវសរុប ដែលទទួលបានក្នុងឆ្នាំ២០១៣ មានចំនួន៩លាន៣សែន៤ម៉ឺនតោន ពោលគឺកើនឡើងជាង៣ម៉ឺន៥០០០តោន ដែលពីឆ្នាំ២០១២ផលស្រូវសរុប មានចំនួន៩លាន៣ម៉ឺនតោន។
តាមរបាយការណ៍របស់ក្រសួងកសិកម្ម ក្នុងឆ្នាំ២០១៣កម្ពុជាបាននាំកសិផលសរុប៤៦មុខ ទៅក្រៅប្រទេស ដែលមានចំនួនជាង២លាន៩សែនតោន។ កសិផលទាំងនោះមានដូចជា ដំឡូងមីស្ងួតជាង១លានតោន អង្ករ ជាង ៣៧ម៉ឺនតោន ស្ករស ពោត និងគ្រាប់ស្វាយចន្ទីរជាដើម។ហើយអ្វីដែលគួរកត់សម្គាល់នោះគឺ កម្ពុជានៅសល់តែប្រមាណមួយឆ្នាំទៀតនោះទេដែលនឹងឈានដល់ការត្រូវសម្រេចគម្រោងនាំអង្ករចេញទៅលក់ ចំនួន១លានតោននៅក្រៅប្រទេសនោះ ហើយ៕ ដោយ៖ ភីន រ៉ា