ភ្នំពេញ៖ មហាស្រពភាពយន្តអន្តរជាតិកម្ពុជា លើកទី៤ នឹងធ្វើការបង្ហាញស្នាដៃភាពយន្ត ចំនួន ៦៩ដែលមានគុណភាពនៅទៅក្រុងភ្នំពេញ ទាំងភាពយន្តរបស់កម្ពុជា និងភាពយន្ត ជុំវិញពិភពលោកដាក់បញ្ចាំងដោយឥតគិតថ្លៃ ពេញមួយសប្ដាហ៍ក្រោយ។ មជ្ឈមណ្ឌល បុប្ផាណា និងនាយកដ្ឋានភាពយន្ត រួមជាមួយរោងភាពយន្ដ ជាដៃគូចំនួន៤ រៀបចំមហោស្រពភាពយន្តអន្ដរជាតិកម្ពុជា លើកទី៤ ពីថ្ងៃទី៧ ដល់១២ ខែធ្នូខាងមុខ ដើម្បី បញ្ចាំងខ្សែភាពយន្តជូនប្រជាពលរដ្ឋកម្ពុជាចូលទស្សនាដោយឥតគិតថ្លៃ ។
មហោស្រពភាពយន្តនេះ នឹងដាក់បញ្ចាំងភាពយន្តជាតិ និងអន្ដរជាតិ ប្រកបដោយគុណភាព ចំនួន៦៩រឿង មកពី១៩ប្រទេស។ មហាស្រពភាពយន្តអន្តរជាតិកម្ពុជា លើកទី៤ នេះ ជាឱកាសសម្រាប់សមិទ្ធិករ ទាំងឡាយក្នុងការបង្ហាញទេពកោសល្យរបស់ខ្លួន។ វាជា ឱកាសដ៏ល្អមួយដែរសម្រាប់ទស្សនិកជន ក្នុងការទស្សនាភាពយន្តខ្នាតធំ ភាពយន្តខ្នាត ខ្លី និងភាពយន្តឯកសារ ដែលបានថតក្នុងនិងក្រៅ ប្រទេស ។
លោក ជាសុភាព អ្នកសម្របសម្រួលនៅមជ្ឈមណ្ឌលបុប្ផាណា បានឲ្យដឹងថា មហោស្រពភាពយន្តអន្ដរជាតិកម្ពុជា ធ្វើឡើងដើម្បីជម្រុញទស្សនិកជនខ្មែរឲ្យវិលត្រឡប់ទៅកាន់រោងភាពយន្ត និងដំកើននូវភាពយន្ត ដែលស្នាដៃ របស់យើងផង ។ភាពយន្តល្អៗមកពីបណ្ដាប្រទេសនៅក្នុងតំបន់ និងពិភពលោក ត្រូវបានប្រមែប្រមូលយកមកចូលរួម ដើម្បីចែករំលែកបទពិសោធន៍ផលិតភាពយន្តល្អៗ ដល់ផលិតករ និងសមិទ្ធិករកម្ពុជា ក្នុងគោលដៅពង្រឹង និងពង្រីក វិស័យភាពយន្តនៅកម្ពុជា ឲ្យកាន់តែរីកចម្រើន។
លោកស៊ិន ចន្ទសាយ៉ា ប្រធាននាយកដ្ឋានភាពយន្ត និងផ្សព្វផ្សាយវប្បធម៌ នៃក្រសួងវប្បធម៌និងវិចិត្រសិល្បៈ បានឲ្យដឹងថា ការបង្ហាញនូវខ្សែភាពយន្តជាច្រើនប្រទេសនេះ គឺជាឱកាសផ្តល់ដល់ផលិតករវ័យក្មេង ក្នុងការបង្ហាញស្នាដៃរបស់ខ្លួនជូនសាធារណជន ពិសេសជម្រុញការផលិតភាពយន្តកម្ពុជា ឲ្យកាន់តែដើរលឿនទៅមុខទៀត ។
ភាពយន្តមានគុណភាព របស់កម្ពុជា និងភាពយន្តមកពីជុំវិញពិភពលោក ចំនួន៦៩រឿង នឹងត្រូវដាក់បញ្ចាំងដោយឥតគិតថ្លៃ ចាប់ពីថ្ងៃទី៧ ដល់ថ្ងៃទី១២ខែធ្នូនេះ ៕
ដោយ៖ អភិរក្ស