ភ្នំពេញ៖យ៉ាងហោចណាស់ក៏មានអ្នកជំនួញខាងស្រូវអង្ករមកពីចិនហុងកុង៣៤នាក់ដែរ បានមកកាន់កម្ពុជាកាលពីថ្ងៃទី៤ ខែធ្នូ ឆ្នាំ២០១៣ ដែលបើកកិច្ចពិភាក្សាជាមួយអ្នកជំនួញស្រូវអង្ករខ្មែរ និងកំពុងទស្សនកិច្ចតាមតំបន់ផលិតកែច្នៃអង្ករក្រអូបកម្ពុជា។លោក ហ៊ុន ឡាក់ តំណាងសហព័ន្ធអ្នកផលិតស្រូវនិងការនាំចេញអង្ករកម្ពុជាបានឲ្យដឹងថា ពួកគេទាំង៣៤នាក់មកកាន់កម្ពុជាតាមរយ:សមាគមអ្នកជំនួញស្រូវអង្ករហុងកុង។ លោកបន្តថា អ្នកជំនួញទាំងនេះ លើកសំណួរជាច្រើនអំពីពូជស្រូវ រោងម៉ាស៊ីនកែច្នៃ ស្ថានភាព និងគុណភាពផលិត ការដឹកជញ្ជូន និងកំពង់ផែរបស់កម្ពុជាក្នុងពេលជួបពិភាក្សាគ្នានៅធនាគារអភិវឌ្ឍន៍ជនបទ។
អ្នកជំនួញអង្ករកម្ពុជារូបនេះ មានជំនឿថា បន្ទាប់ពួកគេមកកាន់កម្ពុជាស្វែងយល់អំពីសក្កដានុពលអង្ករខ្មែររួចហើយនោះសន្ទុះនៃការនាំចេញអង្ករក្រអូបកម្ពុជាទៅកាន់ទីផ្សារហុងកុងនឹងកាន់តែរីកធំ។ មិនត្រឹមតែទីផ្សារហុងកុងប៉ុណ្ណោះទេនឹងសាយភាយទៅទីផ្សារពិភពលោកថែមទៀត។ចំណែកឯ លោក ចាន់ កេននីត អគ្គនាយកសមាគមអ្នកជំនួញស្រូវអង្ករហុងកុង ដែលបានដឹកនាំគណៈប្រតិភូពីហុងកុងមកនោះ បានបញ្ជាក់ថា ការមកកាន់កម្ពុជានៅពេលនេះ ដោយសារអង្ករក្រអូបកម្ពុជាជាប់ជម្រើជាអង្ករល្អបំផុតលើពិភពលោកនៅទីក្រុងហុងកុងកាលពីសប្ដាហ៍មុន។ ចំណាត់ថ្នាក់នេះហើយដែលធ្វើឲ្យអ្នករកស៊ីអង្ករនៅហុងកុងកាន់តែចង់ដឹងឫសគល់នៃការផលិតកែច្នៃ។លោកបានបញ្ជាក់ថា បន្ទាប់ពីបញ្ចប់ដំណើរទស្សនកិច្ចនៅកម្ពុជារួច អ្នករកស៊ីពីហុងកុងទាំងឡាយនឹងបញ្ជាទិញអង្ករក្រអូបខ្មែរទៅចែកចាយជាក់ជាមិនខាន។
ក្រុមអ្នកវិនិយោគចិនហុងកុងទាំង៣៤រូប ដែលមកកម្ពុជាតាមរយ:សមាគមអ្នកជំនួញអង្ករហុងកុង នឹងទៅទស្សនកិច្ចរោងចក្រកែច្នៃអង្ករកម្ពុជាចំនួន៧ ដើម្បីសិក្សាអំពីសង្វាក់ផលិតកម្មអង្ករ។ពីរឆ្នាំជាប់ៗគ្នាហើយ ដែលអង្ករក្រអូបកម្ពុជាបានជាប់ចំណាត់ថ្នាក់ជាអង្ករល្អបំផុតលើពិភពលោក ដោយលើកទី១នៅកោះបាលីក្នុងឆ្នាំ២០១២ និងលើកទី២នៅហុងកុងថ្មីៗនេះ។
បើយោងទៅតាមទិន្នន័យរបស់រដ្ឋាភិបាលកម្ពុជាបាននាំចេញអង្ករ ២០១ ៨៩៩តោននៅក្នុងឆ្នាំ ២០១១ និងបានកើនឡើងដល់ ២០៥ ៧១៧ តោននៅឆ្នាំ ២០១២។គ្រាន់តែក្នុងរយៈពេល ១០ ខែដំបូងក្នុងឆ្នាំ ២០១៣ នេះកម្ពុជានាំចេញអង្ករបាន ២៩៤ ១៥៤ តោន ដោយសារពានរង្វាន់អង្ករលេខ១របស់ពិភពលោកនេះ។ ហើយត្រូវបានអ្នកជំនាញព្យាករណ៍ក្នុងឆ្នាំ២០១៣ទាំងមូលកម្ពុជាអាចនាំអង្ករចេញខ្ទង់៤០ម៉ឺនតោន។
គួររំលឹកដែរថា ជាក់ស្តែង អង្ករក្រអូបរបស់កម្ពុជាបានទទួលបានចំណាត់ថ្នាក់លេខ១សម្រាប់រយៈពេល២ឆ្នាំជាប់គ្នានៅក្នុងការប្រកួតប្រជែងរសជាតិឆ្ងាញ់ជាងគេនៅក្នុងពិភពលោក។គណៈប្រតិភូសហព័ន្ធអ្នកនាំចេញអង្ករកម្ពុជាពីទីក្រុងហុងកុង។ទន្ទឹមនឹងនោះ អង្ករក្រអូបកម្ពុជាបានទទួលចំណាត់ថ្នាក់លេខមួយផ្តាច់មុខ ដោយគ្មានចំណាត់ថ្នាក់លេខពីរឬលេខបីទៀតឡើយ៕ ដោយ៖ ភីនរ៉ា