ភ្នំពេញ៖ ក្រុមអ្នកប្រមូលផលត្រីទឹកសាបតាមដងទន្លេបានអះអាងថា រដូវខ្នើតឆ្នាំនេះបរិមាណផលត្រីទទួលបានច្រើនជាងឆ្នាំមុន ប៉ុន្តែប្រជាពលរដ្ឋមិនទាន់សម្រុកមកធ្វើប្រហុកផ្អក ឬត្រីឆ្អើរច្រើននៅឡើយទេ ដោយរងចំារដូវខ្នើតក្រោយ។ទោះបីជារដូវខ្នើត ឆ្នាំនេះត្រីត្រូវច្រើនជាងឆ្នាំមុនក៏ដោយ ប៉ុន្តែតម្លៃនៅថ្លៃដ៏ដែរ ហើយប្រជាកសិករដែលនៅខេត្តឆ្ងាយៗពីដងទន្លេមិនទាន់នាំគ្នាមកធ្វើប្រហុកផ្អកនៅឡើយទេ មានតែប្រជាពលរដ្ឋនៅជិតៗប៉ុណ្ណោះ។កញ្ញា ស្រី កែវ ជាម្ចាស់ដាយត្រី នៅមណ្ឌលបែងចែងផលនេសាទច្រាំងចំរះបានឲ្យដឹងនៅថ្ងៃទី១២ ខែធ្នូ នេះថា ត្រីបានចាប់ផ្តើមត្រូវតាំងពីថ្ងៃទី៨ ខែធ្នូ មកម្លេះ ដោយក្នុងមួយថ្ងៃៗអាចប្រមូលផលត្រីបានពី១តោនទៅ២តោន គឺច្រើនជាងឆ្នាំទៅ។
កញ្ញាបានបញ្ជាក់ថា ផលត្រីដែលប្រមូលបាននេះមានលក្ខណៈស្មើគ្នាទាំងប្រភេទត្រីធំ និងត្រីតូច ហើយត្រីសម្រាប់ធ្វើប្រហុកមិនទាន់សម្បូរច្រើនទេប្រហែលជាអាចត្រូវខ្លំាងនៅខ្នើតក្រោយ ដូច្នោះទើបមិនទាន់មានអ្នកមកធ្វើប្រហុកផ្អកច្រើន។ ទោះជាយ៉ាងនេះក្តីកញ្ញាអះអាងថា ត្រីសម្រាប់ធ្វើប្រហុកនៅពេលនេះមានតម្លៃទាបជាងឆ្នាំមុនពោលគឺ១គីឡូក្រាមតម្លៃត្រឹមតែ១៥០០រៀលប៉ុណ្ណោះ ចំណែកនៅឆ្នាំមុនវិញរហូតដល់ជាង២ពាន់ រៀលទៅ៣ពាន់រៀល។
អ្នកស្រី អានី ជាអ្នកជំនួញធ្វើប្រហុកផ្អកសម្រាប់លក់នៅទីផ្សារបានទទួលស្គាល់ថា រដូវនេះត្រីសម្បូរជាងឆ្នាំទៅមែន ប៉ុន្តែតម្លៃក៏នៅថ្លៃដែរ។អ្នកស្រីចង់ឲ្យតម្លៃត្រីថោកជាងនេះទៀត ដើម្បីឲ្យប្រជាពលរដ្ឋកាន់តែមានលទ្ធភាព ក្នុងការធ្វើប្រហុកផ្អកបានច្រើនសម្រាប់ជាស្បៀងបម្រុងទុកផ្គត់ផ្គង់ក្រុម គ្រួសារនៅឆ្នាំក្រោយ។លោក ណៅ ធួក ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផលបានអះអាងដែរថា មកដល់ថ្ងៃនេះ ត្រីចាប់ផ្ដើមត្រូវស្ទើគ្រប់ទីកន្លែង ដែលមានទាំងត្រីធំៗនិងត្រីសំរាប់ធ្វើប្រហុក ដែលក្នុងមួយគីឡូក្រាមតំលៃចាប់ពី៦០០រៀលដល់១.៥០០រៀល។
លោកបានបន្ថែមថា ឆ្នាំនេះ ត្រីអាចកើនឡើងពី២០ទៅ២៥% ពោលពី៤៥ម៉ឺនតោន ទៅ៥៥ម៉ឺនតោនបើប្រៀបធៀបទៅនឹងឆ្នាំមុន ដូច្នេះសូមបងប្អូនប្រជាពលរដ្ឋ នៅទូទាំងប្រទេស ដែលត្រូវការធ្វើប្រហុក ផ្អក ត្រីឆ្អើ សូមប្រញ៉ាប់រួសរាន់នាំគ្នាមកធ្វើឲ្យបានទាន់ពេលវេលា។លោក ណៅ ធួក ប្រធានរដ្ឋបាលជលផល ក៏បានបញ្ជាក់ថា ការសម្បូណ៌ត្រីច្រើននៅឆ្នាំនេះ ដោយសារទឹកទន្លេឡើងធំ ហើយក៏ជាលទ្ធផលនៃកិច្ចខិតខំប្រឹងប្រែងរបស់មន្ត្រីរដ្ឋាភិបាលដែលផ្ដោតការយកចិត្តទុកដាក់អនុវត្តច្បាប់ចុះបង្ក្រាបបទល្មើសនេសាទ និងលែងកូនត្រីពូជជាច្រើនលានក្បាល ទៅក្នុងបឹងទន្លេធម្មជាតិ និងក្នុងតំបន់អភិរក្សដែនជម្រកត្រីពូជក្នុងរដូវបិទឡូត៍នេសាទរួមទាំងការចូលរួមជួយការពារពីសហគមន៍នេសាទផងដែរ។បើតាមការព្យាករណ៍នៅដំណាក់កាលទី១នេះ ត្រីបានចាប់ផ្ដើមត្រូវកាលពីថ្ងៃទី៩ ខែធ្នូ រហូតដល់ថ្ងៃទី១៦ ខែធ្នូ ដំណាក់កាលទី២ នឹងគឺចាប់ផ្ដើមត្រូវពីថ្ងៃទី៩-១៣ ខែមករា និងតំណាក់កាលទី៣ ចាប់ ពីថ្ងៃទី១១-១៥ខែកុម្ភៈ៕ ដោយ ៖ ភីនរ៉ា