ភ្នំពេញ៖ ក្រុមហ៊ុនរដ្ឋរបស់ប្រទេសចិនឈ្មោះ Guangdong Agribusiness Group corperation (GDA) បានមកបណ្តាក់ ទុនជាច្រើនរយលានដុល្លារអាមេរិក ធ្វើសហវិនិយោគជាមួយក្រុមហ៊ុន ម៉ុង ឫទ្ធី គ្រុប ពង្រីកវិស័យឧស្សាហកម្ម ចិញ្ចឹមជ្រូកនៅក្នុងប្រទេសកម្ពុជា ឲ្យកាន់តែធំនិងអាចទប់ស្កាត់ការនាំសត្វជ្រូកចូលពីបរទេស។
លោកឧកញា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានមានប្រសាសន៍ថា តាមការសិក្សាបង្ហាញថា មាន ប្រជាជនកម្ពុជាជាង ៨០ភាគរយបរិភោគសាច់ជ្រូក ហើយជ្រូកទាំងនោះគឺបាននាំចូលពីក្រៅប្រទេស បើសរុបជាទឹកប្រាក់ប្រមាណជា២០០លានដុល្លារក្នុង១ឆ្នាំៗហើយការបរិភោគជ្រូកនាំចូលនេះធ្វើឲ្យប៉ះពាល់ដល់សេដ្ឋកិច្ច
គ្រួសារ និងប៉ះពាល់ដល់សុខភាព និងសង្គម ព្រោះជ្រូកនាំចូលភាគច្រើនជាជ្រូកមានបញ្ហានាំមកនូវជម្ងឺឆ្លងផ្សេងៗ។
លោកឧកញាបន្តថា (GDA) បានមើលឃើញពីតម្រូវការរបស់ប្រជាជនកម្ពុជា ទើបក្រុមហ៊ុនដ៏ធំមួយនេះបានសម្រេចចិត្តធ្វើសហវិនិយោគជាមួយក្រុមហ៊ុន ម៉ុង ឫទ្ធី គ្រុបលើការចិញ្ចឹមជ្រូក ដែលជំហានដំបូង (GDA) បាន
បោះទុនចំនួន២០០លានដុល្លារ ហើយក្រុមហ៊ុនគ្រោងនឹងដាក់ទុនបន្ថែមជាបន្តបន្ទាប់ទៅតាមការគ្រោងទុករបស់ក្រុមហ៊ុនទាំង២។
សូមបញ្ជាក់ថា ការលើកឡើងដូច្នេះប្រាប់អ្នកយកព័ត៌មាន ក្រោយបញ្ចប់ការចូលរួម ជាអធិបតីភាព ក្នុងការបើកសិក្ខាសាលាផ្សព្វផ្សាយស្តីពី ការគ្រប់គ្រងឧស្សាហកម្មចិញ្ចឹមជ្រូក និងទស្សវិស័យរបស់ក្រុមហ៊ុន អិមភីក អេស៊ីអិមស៊ី កាលពីរសៀលថ្ងៃសៅរ៍កន្លងទៅនេះនៅសណ្ឋាគារកំាបូឌីយ៉ាណា ដែលមានការចូលរួមពីប្រជាជនអ្នកប្រកបមុខរបបចិញ្ចឹមជ្រូកជាច្រើនរយនាក់៕ ដោយ ៖ សស្អាត