ភ្នំពេញ៖រដ្ឋាភិបាលចិនបានបញ្ជាក់ពីជំហគាំទ្រ និងជំរុញកិច្ចសហប្រតិបត្តិការវិស័យកសិកម្ម ដែលផ្តោតលើផលិតផលស្រូវ ជាមួយរដ្ឋាភិបាលកម្ពុជា តាមរយៈ គម្រោង ការសាងសង់ឃ្លាំងផ្តល់សេវាស្តុកស្រូវ និងអង្ករនៅកម្ពុជា។គម្រោងនេះមានគោលបំណងឆ្លើយតបទៅនឹងតម្រូវការជាក់ស្តែងរបស់កម្ពុជាក្នុងការលើកស្ទួយវិស័យកសិកម្មនិងបង្កើនចំណូលដល់ប្រជាជនកម្ពុជាជាពិសេសគឺកសិករ។
ក្នុងជំនួបពិភាក្សាការងារជាមួយលោក អូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក Jin Yuanទីប្រឹក្សាសេដ្ឋកិច្ច និងពាណិជ្ជកម្មនៃស្ថានទូតចិនប្រចាំកម្ពុជាដែលបានដឹកនាំគណៈប្រតិភូមួយក្រុមផងនោះ បានថ្លែងថា គម្រោងនេះនឹងជួយដោះស្រាយបញ្ហាខ្វះខាតទីផ្សារស្រូវនៅកម្ពុជា និងជំរុញការអនុវត្តគោលនយោបាយជំរុញការ
នាំអង្ករចេញរបស់រាជរដ្ឋាភិបាលកម្ពុជាឱ្យបានយ៉ាងតិច១លានតោននៅឆ្នាំ២០១៥។
ជាមួយគ្នានេះ ធនាគារអាហរ័ណ-នីហរ័ណនៃសាធារណរដ្ឋប្រជាមានិតចិន នឹងផ្តល់ឥណទានសម្បទានដល់ក្រុម ហ៊ុនចម្រុះកម្ពុជា-ចិន តាមរយៈរាជរដ្ឋាភិបាលកម្ពុជាហើយចិននឹងផ្តល់កូតាសម្រាប់ការនាំអង្ករចូល ទៅប្រទេស
ចិនយ៉ាងតិច៥សែនតោនក្នុងមួយឆ្នាំ។លោក អូន ព័ន្ធមុនីរ័ត្នបានថ្លែងថា ធនាគារអាហរ័ណ-នីហរ័ណចិន បានឆ្លើយតបជាវិជ្ជមានទៅនឹងសំណើររបស់ប្រមុខរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន ។
ដើម្បីអនុវត្តផែនការនេះ លោក រដ្ឋមន្ត្រី បានស្នើឱ្យអ្នកជំនាញនៃប្រទេសទាំងពីរបន្តជួបពិភាក្សានិងសិក្សាឱ្យបានលម្អិតបន្ថែមទៀត លើទិដ្ឋភាពនយោបាយ ក្របខណ្ឌគតិយុត្តិ និងបច្ចេកទេសសេដ្ឋកិច្ច និងហិរញ្ញវត្ថុនៃគម្រោង
ខាងលើ។លោកបានគូលបញ្ជាក់ថា រដ្ឋាភិបាលនិងប្រជាជនចិនបានគាំទ្ររដ្ឋាភិបាលកម្ពុជា និងប្រជាជនកម្ពុជាជាពិសេសការជំរុញការអនុវត្តនូវគោលនយោបាយស្រូវ-អង្កររបស់កម្ពុជានេះ៕ ដោយ ៖ រតនា