ភ្នំពេញ ៖ បន្ទាប់ពីជួបរឿងបរាជ័យក្នុងជីវិតស្នេហា អ្នកមេម៉ាយក្តៅស្រួយនាង សុខ ស្រីនាង បានផ្តើមចូលខ្លួនជាថ្មី ឡើងវិញ ជាមួយការងារសិល្បៈ។ កាលពីខែមីនា ឆ្នាំ២០១០ សុខ ស្រីនាង បានរៀបអាពាហ៍ពិពាហ៍ ជាមួយតារាចម្រៀងដូចគ្នា គឺលោក ស៊ី សុវត្ថិ ។ ប៉ុន្តែចំណងអាពាហ៍ពិពាហ៍ រវាងអ្នកទាំងពីរ ត្រូវបានបញ្ចប់ទៅវិញកាលពីចុងឆ្នាំ២០១១ ។
ក្រោយពីពពកខ្មៅ បានរសាត់ចេញទៅបាត់ពន្លឺជីវិតថ្មី ក៏បានឈានចូលមកដល់ សម្រាប់អ្នកមេម៉ាយវ័យក្មេងរូបស្រស់ សុខ ស្រីនាង បានចាប់ផ្តើមមានពន្លឺជាថ្មីម្តងទៀត ក្រោយពេលដែលអ្នកមេម៉ាយរូបនេះបានបង្ហាញខ្លួនក្នុងវិថីសិល្បៈឡើងវិញ ហើយក៏ត្រូវបានបុរស ជាអ្នកមានទ្រព្យទាំងក្នុង និងក្រៅស្រុក ប៉ងប្រាថ្នាចូលគ្រងបេះដូងព្យាបាលដំបៅស្នេហ៍ចាស់ ។ក្រោយពេលវិលត្រឡប់មកចាប់យកអាជីពជាអ្នកសិល្បៈដោយជ្រកក្រោមផលិតកម្ម សាន់ដេ ជាថ្មីរបស់អ្នកចម្រៀង មេម៉ាយរូបនេះ ត្រូវបានមហាជនមើលឃើញថាជីវិតរបស់នាងហាក់កាន់តែមានការបោះជំហានទៅមុខ ជាមួយនឹងក្តីសង្ឃឹមសាជាថ្មី។ ជាងនេះទៅទៀតវត្តមានរបស់ សុខ ស្រីនាង នៅលើវិថីសិល្បៈ ក៏អាចធ្វើឲ្យនាងសំឡឹងឃើញជាថ្មីឡើងវិញ ចំពោះការជ្រើសរើសគូអនាគតដ៏ល្អប្រសើរផងដែរ។
ស្របពេលនៃការឈោងចាប់យកអាជីពសិល្បៈឡើងវិញនេះ អ្នកមេម៉ាយចាយរូបស្រស់ សុខ ស្រីនាង ក៏ផ្តើមរងនូវព័ត៌មានអាស្រូវស្នេហាជាបន្តបន្ទាប់ មិនខុសពីតារាស្រីៗឯទៀតនោះឡើយ។ ប៉ុន្តែរឿងរ៉ាវដែលតែងលេចឡើងទាំងប៉ុន្មាននោះ មិនបានធ្វើឱ្យនាង ខ្វាយខ្វល់យកចិត្តទុកដាក់ នៅក្នុងអារម្មណ៍នោះឡើយ។ ផ្ទុយទៅវិញ បែ្រក្លាយជារឿងមួយ ធ្វើឱ្យនាងកាន់តែមានប្រជាប្រិយភាពលេចធ្លោជាងមុនទៅទៀត។
ប៉ុន្តែទោះបីជាយ៉ាងណាក្តី តែងតែគេចមិនផុតឡើយ ចំពោះពាក្យនិយាយខ្សឹបខ្សៀវគ្នា ជុំវិញការចាប់ផ្តើមសាងជីវិតស្នេហ៍ថ្មី របស់តារាស្រី ងារជាមេម៉ាយក្តៅស្រួយ សុខ ស្រីនាង ។ ថ្មីៗនេះមានប្រភពជិតស្និទ្ធនឹង សុខ ស្រីនាង បានលួចបង្ហើបឱ្យដឹងថា បច្ចុប្បន្នមានបុរសរូបសង្ហា កូនកាត់ខ្មែរ-អាមេរិក ម្នាក់វ័យជិត ៤០ឆ្នាំ បាននឹងកំពុងតែចាប់អារម្មណ៍ខ្លាំង មកលើតារា ស្រី សុខ ស្រីនាង ក្រោយពេលដឹងថា អ្នកមេម៉ាយរូបនេះ នៅពុំទាន់មានបុរសណាម្នាក់ ក្រសោបបេះដូងនៅឡើយ។
ប្រភពបាននិយាយទៀតថា បុរសអាណិកជនខ្មែរ-អាមេរិកម្នាក់នោះ បានពេញចិត្តពេញថ្លើមនាងយ៉ាងខ្លាំង ហើយរាល់ថ្ងៃក៏កំពុងតែតាមយកចិត្ត ដើម្បីសុំសេចក្តីស្រឡាញ់ពីតារាស្រីរូបនេះ ។ បុរសនោះមានបំណងចង់បាន សុខ ស្រីនាង ធ្វើជាគូគាប់ យ៉ាងពិតប្រាកដ ដោយស្របច្បាប់ ហើយកំពុងព្យាយាមតាមលួងលោម ចង់បានសេចក្តីស្រឡាញ់ ។ ក៏ប៉ុន្តែនៅត្រង់ថា តើ ស្រីនាង យល់ព្រមទទួលយក ស្នេហាជាលើកទី២ ឬមួយក៏អត់?៕ដោយ៖ ភីនរ៉ា