ភ្នំពេញ៖ អ្នកចម្រៀងល្បីឈ្មោះមួយរូបក្នុងប្រទេសកម្ពុជា លោក ណុប បាយ៉ារិទ្ឋ ត្រូវតំណាងអយ្យការអមសាលា ដំបូងរាជធានីភ្នំពេញ ធ្វើការចោទប្រកាន់ជាផ្លូវការពីបទកំហែងគំរាមនិងបរិហារកេរ្តិ៍ ដែលមានដើមបណ្តឹងឈ្មោះ ចេង រស្មីសេរីវង្ស ។
ប្រភពបានឲ្យដឹងពីដំណើររឿងថា លោក ណុប បាយ៉ារិទ្ឋ បានជួលសំអាងការរបស់ឈ្មោះ ចេងរស្មីសេរីវង្សក្នុងតម្លៃ២២០០ដុល្លារ តែអ្នកចម្រៀងរូបនេះបានប្រគល់លុយឲ្យដើមបណ្តឹង១១៨០ដុល្លារ នៅខ្វះ១០២០ដុល្លារទៀត។លុះពេលដើមបណ្តឹងទារលុយដែលនៅខ្វះ ក៏ត្រូវអ្នកចម្រៀង ណុប បាយ៉ារិទ្ឋ គំរាមកំហែងនិងជេរប្រមាថបរិហារកេរ្តិ៍ ។
មុនពេលឈានដល់ការប្តឹងនេះ លោកបានសរសេរសារមួយនៅក្នុងបណ្តាញហ្វេសប៊ុករបស់ខ្លួន ដោយបានរៀបរាប់រឿងរ៉ាវពីជនម្នាក់ ដែលបានជួលសំអាងការរបស់ខ្លួនហើយមិនឲ្យប្រាក់។ លោក ណុប បាយ៉ារិទ្ឋ បានប្រាប់បន្តថា នៅក្នុងសារនោះលោកមិនបានបញ្ចេញឈ្មោះនរណាម្នាក់ឲ្យពិតប្រាកដឡើយ ។
អ្នកចម្រៀងប្រចាំផលិតកម្មហង្សមាស រូបនេះបានឲ្យដឹងទៀតថា ទំនងជាសារដែលបានសរសេរនោះហើយ ដែលជាដើមហេតុនាំឲ្យភាគីដែលបានជួលសំអាងការរបស់លោកដាក់ពាក្យ ប្តឹងទៅ កាន់សាលាដំបូងរាជធានីភ្នំពេញ ដោយចោទប្រកាន់លោកពីបទបរិហារកេរ្តិ៍ ។
ណុប បាយ៉ារិទ្ឋ បានបញ្ជាក់បន្ថែមថា ពាក្យបណ្តឹងហាក់មិនត្រឹមត្រូវឡើយ ព្រោះបរិហារកេរ្តិ៍ទាល់តែបញ្ចេញឈ្មោះ និង រូបថត ប៉ុន្តែនៅក្នុងសារហ្វេសប៊ុករបស់លោកមិនបានដាក់ឈ្មោះនិងរូបថត នរណាម្នាក់ឡើយ។ លោក ណុប បាយ៉ារិទ្ឋ មានការងឿងឆ្ងល់ថា ហេតុអ្វីបានជាចោទលោកបែបនេះទៅវិញ ។
លោកបានរៀបរាប់ពីដំណើររឿងទៀតថា មុនដំបូងភាគីដើមបណ្តឹងនោះ បានជួលសំអាងការរបស់លោកក្នុងតម្លៃជិតពីរពាន់ដុល្លារ ហើយបានស្នើសុំលោកទៅច្រៀងនៅក្នុងពិធីការនោះថែមទៀត ប៉ុន្តែគាប់ជួននៅថ្ងៃនោះលោកជាប់រវល់ទៅច្រៀងនៅពហុកីឡាដ្ឋានជាតិអូឡាំពិក នៅថ្ងៃទី០១ធ្នូ ដោយបានអាក់ខានមិនបានទៅច្រៀងនៅក្នុងពិធីមង្គលការនោះ ។
លោក ណុប បាយ៉ារិទ្ឋបានបន្តថា ដោយសារតែមូលហេតុខាងលើនេះ ទើបម្ចាស់ដើមការមានការខឹងសម្បារនិងចង់កាត់លុយថ្លៃសំអាងការនោះ ហើយកិកកុកមិនព្រមឲ្យថ្លៃជួលសំអាងការលោក។ អ្នកចម្រៀងរូបនេះបានឲ្យដឹងដែរថា លោកបានប្រគល់កិច្ចការនេះឲ្យមេធាវីលោកចាត់ចែងដោះស្រាយហើយ ៕ ដោយ៖ ភីន រ៉ា