ភ្នំពេញៈ ក្រសួងបរិស្ថានប្រកាសស្វែងរកជំនួយពីដៃគូអន្តរជាតិបន្ថែមទៀតដើម្បីយកទៅអនុវត្តគម្រោងការពារ ធនធានធម្មជាតិនានានៅក្នុងប្រទេសកម្ពុជាខណៈដែលធនធានដ៏មានតម្លៃទាំងនេះកំពុងតែទទួលរងការ គំរាម កំហែង យ៉ាងធ្ងន់ធ្ងរ។ក្រុមការងារអភិរក្សធនធានធម្មជាតិ និងជីវៈចម្រុះនៃក្រសួង បរិស្ថានបានបង្ហាញ ឯកសារ ដើម្បីសុំការគាំទ្រពីដៃគូអភិវឌ្ឍនានាសម្រាប់យកទៅកសាងសមត្ថភាពក្នុងការអនុវត្តអនុសញ្ញារីយូទាំង៣របស់អង្គការសហប្រជាជាតិស្តីពីបរិស្ថានឲ្យមានប្រសិទ្ធិភាពខ្ពស់។អនុសញ្ញាទាំងនេះគឺផ្តោតសំខាន់លើបញ្ហាជីវៈចម្រុះ
, ការប្រែប្រួលអាកាសធាតុ និងការប្រយុទ្ធប្រឆាំងទីរហោស្ថាន។
ថ្លែងនៅក្នុងសិក្ខាសាលាថ្នាក់ជាតិនៅព្រឹកថ្ងៃទី២៤ ខែមករា នេះ លោកស្រី ចាន់ សុម៉ាលី ប្រធាននាយកដ្ឋានសហប្រតិបតិ្តការអន្តរជាតិនៃក្រសួងបរិស្ថានបានឲ្យដឹងថា គម្រោងដ៏មានសារៈសំខាន់នេះ ត្រូវការថវិកាប្រមាណជាង២លានដុល្លាសហរដ្ឋអាមេរិក ប៉ុន្តែមកទល់ពេលនេះមូលនិធិបរិស្ថានពិភពលោកបានគាំទ្រថវិកាជាង1លានដុល្លាហើយ ចំណែកនៅសល់ជាង១លានដុល្លាទៀតកំពុងស្វែងដៃគូបន្ថែម។
លោកស្រីបានបញ្ជាក់ថា ថវិកាទាំងនេះនឹងត្រូវប្រើប្រាស់រយៈពេល៣ឆ្នាំសម្រាប់មន្រ្តី ជំនាញចុះសិក្សាស្រាវជ្រាវពីតំបន់ធនធានធម្មជាតិនិងតំបន់ជីវៈចំរុះនានានៅទូទាំងប្រទេស ដើម្បីរៀបចំផែនការយុទ្ធសាស្រ្តការការពារនិងអភិរក្ស ដើម្បីដាក់ជូនអ្នកតាក់តែងគោលនយោបាយនិង អ្នកប្រើប្រាស់ផ្សេងទៀត។
លោក ទិន ពន្លក អគ្គនាយករងរដ្ឋបាលការពារ និងអភិរក្សធម្មជាតិ នៃក្រសួងបរិស្ថានមានប្រសាសន៍ថា កិច្ចការពារបរិស្ថាននិងការគ្រប់គ្រងធនធានធម្មជាតិអាចទទួលជោគជ័យបានអាស្រ័យដោយមានការចូលរួមទាំងអស់គ្នា ក្នុងនោះរួមមានឆន្ទះនយោបាយសមត្ថភាពជំនាញការទទួលបានព័ត៌មានការអុវត្តបទដ្ឋានច្បាប់ដ៏មានប្រសិទ្ធិភាព។លោកបន្ថែមទៀតថា ការរៀបចំឲ្យមានព័ត៌មានស្តីពីការអភិរក្សធនធានធម្មជាតិ និងធនធានជីវៈចម្រុះនេះមានសារសំខាន់ណាស់ ដែលជាយន្តការរួមគ្នាការពារ ព្រោះវាបានជួយធានានូវលំនឹងបរិស្ថានធម្មជាតិនិយត័កម្មរបបទឹកកាត់បន្ថយការប្រែប្រួលអាកាសធាតុផ្តល់ប្រភពថាមពលនិងផលិតផលផ្សេងៗសម្រាប់ជួយទ្រទ្រង់សេដ្ឋកិច្ចបានយ៉ាងច្រើន ឥតគណនា ពិសេសក្នុងគោលដៅកាត់បន្ថយភាពក្រីក្រនៅជនបទ។
តំណាងកម្មវិធីអភិវឌ្ឍសប្រជាតិ យូអ៊ិនឌីភីប្រចាំកម្ពុជា លោក ណាប៉ូឡេអុង ណាវ៉ារ៉ូ បានស្វាគមន៍ ចំពោះគម្រោងនេះ ហើយបានវាយតម្លៃខ្ពស់ចំពោះរាជរដ្ឋាភិបាលដែលមានឆន្ទះមោះមុតក្នុងកិច្ច ការពារបរិស្ថាន និងការអភិរក្សជីវៈចម្រុះ ដែលនេះជាការវិនិយោគដ៏មានតម្លៃសម្រាប់រក្សាបាននូវ ស្ថេរភាពនៃការអភិវឌ្ឍន៍សេដ្ឋកិច្ចជាតិ។លោកបានបញ្ជាក់ថា យូអ៊ិនឌីភីនឹងបន្តគាំទ្រដ៏ប្រទេសកម្ពុជា ព្រោះវាមិនត្រឹមតែបានការពារបញ្ហាបរិស្ថានសម្រាប់ប្រទេសកម្ពុជាតែមួយនោះទេ គឺសម្រាប់ពិភព លោកទាំងមូល៕ ដោយ៖ ភីន រ៉ា