ភ្នំពេញៈ សម្តេចតេជោ ហ៊ុន សែននាយករដ្ឋមន្ត្រី បានអនុញ្ញាតប្រធានក្រុមហ៊ុនចិន ដាតាំងគ្រុប ដែលផលិតវារីអគ្គីសនី ចំនួន២កន្លែង ក្នុងប្រទេសកម្ពុជា ចូលជួបសម្តែងការគួរសម នៅព្រឹកថ្ងៃទី២៦មីនានេះ នៅវិមានសន្តិភាព។ក្រុមហ៊ុនចិន ដាតាំងគ្រុប គឺជាក្រុមហ៊ុនមួយ ស្ថិតក្នុងចំណោមក្រុមហ៊ុនធំៗចំនួន៥០០ ក្រុមហ៊ុន ទូទាំងពិភពលោក។ ដោយឡែកក្រុមហ៊ុន ដាតាំង បានផលិតអគ្គីសនីចំនួន១២០លាន គីឡូវ៉ាត់ នៅ ក្នុងប្រទេសចិន និងនៅក្នុងប្រទេសកម្ពុជា ក្រុមហ៊ុន ដាតាំងគ្រុបបានផលិតគំរោងវារីអគ្គីសនីចំនួន២ ក្នុងនោះ រួមមានទំនប់វារីអគ្គីសនី អាតៃ ដែលនឹងត្រូវសម្ពោធដាក់អោយប្រើប្រាស់ជាផ្លូវការនៅថ្ងៃទី២៧មីនា ស្អែកនេះ។
ប្រធានក្រុមហ៊ុន ដាតាំងគ្រុប លោក វាង យីពិញ ក្នុងឪកាសជួបសម្តែងការគួរសម ចំពោះសម្តេច នាយករដ្ឋមន្ត្រីនៅថ្ងៃទី២៦មីនានេះ បានបញ្ជាក់អំពីវត្តមានរបស់លោក ដែលនឹងត្រូវចូលរួមសម្ពោធទំនប់វារីអគ្គីសនីអាតៃ នៅក្នុងខេត្តពោធិសាត់ វេលាថ្ងៃស្អែកនេះ។ ទំនប់វារី អគ្គីសនី អាតៃ នេះ ត្រូវគេជូនដំណឹងថា បានសាងសង់ចប់មុនផែនការកំណត់ចំនួន៦ខែ។លោក វាង យីពិញ បានជំរាបសម្តេចតេជោសែន ថា លោកសង្ឃឹមថា វារីអគ្គីសនី អាតៃ ដែលនឹងសម្ពោធនៅវេលាថ្ងៃស្អែកនេះ នឹងបានចូលរួមចំណែកក្នុងការអភិវឌ្ឍន៍ព្រះរាជាណាចក្រកម្ពុជា។
សម្តេចតេជោនាយករដ្ឋមន្ត្រី បានមានប្រសាសន៍តបទៅវិញថា ជាការពិតណាស់ ក្រុមហ៊ុន ដាតាំង ពិតជាបានចូលរួមចំណែកអភិវឌ្ឍន៍ នៅក្នុងប្រទេសកម្ពុជា ជាពិសេស តាមរយៈការអភិវឌ្ឍន៍វារីអគ្គីសនី អាតៃ នេះ ដែលពីដើមមកមិនដែលមានការគិតច្រើនទេ ថាតំបន់នេះ អាចក្លាយទៅជាធុងអាគុយ របស់កម្ពុជា គឺមានតែអ្នកវិទ្យាសាស្ត្រតែប៉ុណ្ណោះ ដែលអាចគិតឃើញ ហើយពេលនេះទៀត គម្រោងនេះត្រូវបានសាងសង់ចប់មុនកាលកំណត់ថែមទៀត។សម្តេចបាន មានប្រសាសន៍កោតសរសើរ ដល់ក្រុមហ៊ុន ហើយក៏បានស្វាគមន៍ដល់ក្រុមហ៊ុនឱ្យចូលរួមអភិវឌ្ឍន៍លើគំរោងដទៃទៀត ដែលអាចមានលទ្ធភាព ជាពិសេសលើវិស័យហេដ្ឋារចនាសម្ព័ន្ធ៕ ដោយ៖ ភីន រ៉ា