ភ្នំពេញៈ យោងតាមសេចក្តីប្រកាសព័ត៌មានរបស់អង្គសង្គមស៊ីវិល បានឱ្យដឹងថា យើងរៀបចំយាត្រាសន្តិភាពថ្នាក់ជាតិមួយ សំដៅជំរុញការយល់ដឹងអំពីទំនប់នេះ និង សក្តានុពលផលប៉ះពាល់របស់វា ក៏ដូចជា ជូនព័ត៌មានដល់បណ្តារដ្ឋាភិបាលនៃប្រទេសជាប់ទន្លេមេគង្គក្រោមទាំង បួន សាធារណជន ដៃគូអភិវឌ្ឍន៍ និង ភាគីពាក់ព័ន្ធផ្សេងទៀតអំពីការសាងសង់ទំនប់
លើទន្លេមេនៃទន្លេមេគង្គ ។ ជំហររបស់យើង គឺ “គ្មានទំនប់លើទន្លេមេ" លើទន្លេមេគង្គ។ យើងមានគោលបំណងដូចខាង ក្រោម៖
១. ជំរុញការយល់ដឹង និង ជូនព័ត៌មានជូនសាធារណជនទូទៅឲ្យបានជ្រាបអំពីវឌ្ឍនភាពនៃគម្រោង សាងសង់ទំនប់លើទន្លេមេនៃទន្លេមេគង្គ ដែលបង្កើតមហាផលប៉ះពាល់អវិជ្ជមានលើជីវភាព បរិស្ថាន ជីវចម្រុះ និង សេដ្ឋកិច្ចសង្គម ដែលចាប់ផ្តើមពីទំនប់សាយ៉ាប៊ូរី និង ទំនប់ដនសាហុងនៅក្នុងប្រទេសឡាវ។
២. ប្រមូលមតិឯកភាពគ្នាក្នុងចំណោមសង្គមស៊ីវិល និង សហគមន៍ទាំងឡាយដែលរស់នៅ និង ធ្វើការយ៉ាងសកម្មលើបញ្ហាទន្លេមេនៃទន្លេមេគង្គ លើប្រធានបទ “គ្មានទំនប់លើទន្លេមេនៃទន្លេមេគង្គ”។ ជាពិសេស យើងកំពុងផ្តល់ការយកចិត្តទុកដាក់លើ controversial ទំនប់វារីអគ្គិសនីលើទន្លេមេពីរដងចម្រូងចម្រាស ពោលគឺទំនប់សាយ៉ាប៊ូរី និង ទន្លេដនសាហុង។
៣. រៀបចំសំណើដាក់ជូនរដ្ឋាភិបាលនៃប្រទេសជាប់ទន្លេមេគង្គក្រោមទាំងបួន និង ដៃគូអភិវឌ្ឍន៍ ដើម្បីដាក់សម្ពាធលើរដ្ឋាភិបាលឡាវឲ្យបញ្ឈប់ជាបន្ទាន់នូវការសាងសង់ ទំនប់វារីអគ្គិសនីលើទន្លេមេទាំងពីរនេះ។
សេចក្តីប្រកាសដដែល បានឱ្យដឹងទៀតថា ទំនប់ដនសាហុង ប្រសិនបើត្រូវបានសាងសង់ នឹងគឺជាទំនប់ទីពីរលើទន្លេមេនៃទន្លេមេគង្គ។ ប្រសិនបើដំណើរការតាមផែនការ ទំនប់នេះនឹងធ្វើឲ្យខូចខាតដល់ជលផលទន្លេមេគង្គ និង បំផ្លាញជីវភាពនៅខាងក្រោមខ្សែទឹក ដែលប្រជាជនកម្ពុជាត្រូវទទួលរង។ ទំនប់នេះបានធ្វើឲ្យមានក្តីបារម្ភធ្ងន់ធ្ងរអំពីបរិស្ថាន (ពោលគឺ ជលផល) ផលប៉ះពាល់សេដ្ឋកិច្ចសង្គម និង ជីវភាពរបស់ប្រជាជនក្រីក្រ។ ក្តីបារម្ភទាំង ត្រូវបានលើកឡើងដោយអង្គការមិនមែនរដ្ឋាភិ បាល និង អ្នកវិទ្យាសាស្ត្រ អំពីទន្លេដនសាហុង និង គម្រោងទំនប់ផ្សេងទៀតលើទន្លេមេ។
សូមបញ្ជាក់ថា យុទ្ធនាការយាត្រាសន្តិភាពថ្នាក់ជាតិខាងលើនេះ នឹងធ្វើនៅថ្ងៃទី ២៨ - ៣១ ខែ មីនា ឆ្នាំ ២០១៤ ខាងមុខ នា ខេត្តក្រចេះ ស្ទឹងត្រែង និង កំពង់ចាម ដោយមានអ្នកចូលរួមចំនួន ៦៥០-៧៥០ នាក់ ដែលនៅក្នុងនោះ មានស្ត្រីប្រហែល ៣០% រួមមាន សង្គមស៊ីវិល សហគមន៍ មន្ត្រីរាជរដ្ឋាភិបាល អ្នកយកព័ត៌មាន សិស្ស/និស្សិត គ្រូបង្រៀន ព្រះសង្ឃ និងម្ចាស់ជំនួយ៕ សេរីមករា