បើពិនិត្យមើលឱ្យមែនទែនទៅនៅដើមឆ្នាំ២០១៤ ខែមករា កន្លងទៅថ្មីៗនេះកម្ពុជាបាននាំចេញអង្ករសរុបបានចំនួន២១.៥៣៦ តោន ដែលចំនួននេះគឺបានថយចុះ ១៦,២៨ភាគរយ ធៀបទៅនឹងរយៈពេលដូចគ្នាក្នុងឆ្នាំ២០១៣ដែលមានចំនួនតែ ២៥.៧២៦តោន។នេះបើយោងទៅតាមរបាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករនៃក្រុមការងារផ្នែកស្រូវអង្ករនៃវេទិការាជរដ្ឋាភិបាល-ផ្នែកឯកជន។ប្រធានសហព័ន្ធអ្នកនាំចេញអង្ករកម្ពុជា លោក គឹម សាវុធ ធ្លាប់ប្រាប់ក្រុមអ្នកសារព័ត៌មានយើងដែរកាលពីពេលថ្មីៗនេះថាការនាំចេញអង្ករនៅដើមឆ្នាំ២០១៤នេះគឺមានការលំបាក។ លំបាកគឺដោយសារតែប្រទេសភូមាបើកចំហរទីផ្សារសេរីដែលប្រទេសនេះគឺជាគូប្រជែងថ្មីរបស់កម្ពុជា ដោយសារតែភូមាក៏ទទួលបាននូវការអនុគ្រោះពន្ធពីសហគមន៍អឺរ៉ុបដូចកម្ពុជាដែរ។
លោកបានបញ្ជាក់ទៀតថា ក្រៅពីនេះកម្ពុជាក៏មានការលំបាកដោយសារតែ ប្រទេសប៉ាគីស្ថាន និងឥណ្ឌា លក់អង្ករចេញក្នុងតម្លៃថោក ដែលតម្លៃនេះអាចនឹងដណ្ដើមបានទីផ្សារនៅក្នុងតំបន់អាហ្វ្រិក ដោយសារប្រទេសក្នុងតំបន់នេះ មិនសូវរើសប្រភេទអង្ករនោះទេ ឲ្យតែមានតម្លៃថោក។ ដូច្នេះការប្រកួតប្រជែងតម្លៃ និងការចុះថ្លៃអង្ករនៅលើទីផ្សារអន្តរជាតិ គឺបានជះឥទ្ធិពលមកលើការនាំចេញអង្ករពីកម្ពុជា។
របាយការណ៍ដដែលបានបង្ហាញទៀតថាខែមករា ឆ្នាំ២០១៤កន្លងទៅប្រទេសកម្ពុជាបាននាំចេញអង្ករទៅកាន់ទីផ្សារអន្តរជាតិចំនួន ៣២ ប្រទេសតាមរយៈក្រុមហ៊ុនចំនួន ៣៧ដែលក្នុងនោះប្រទេសដែលទិញអង្ករពីកម្ពុជាច្រើនជាងគេគឺ ប្រទេសបារាំងហូឡង់ ប៉ូឡូញ ម៉ាឡេស៊ីហ្គាបុង និងចក្រភពអង់គ្លេស។ ហើយនិយាយពីប្រភេទអង្ករដែលបាននាំចេញច្រើនជាងគេទៅកាន់ទីផ្សារអន្តរជាតិទាំងនោះគឺប្រភេទអង្ករផ្កាម្លិះនិងផ្ការំដួលដែលបាននាំចេញក្នុងបរិមាណ៩៩៨៤.៣ តោនបន្ទាប់មកគឺអង្ករប្រភេទចម្រុះគ្រាប់វែង និងមានប្រភេទអង្ករផ្សេងៗទៀត ក៏ត្រូវបាននាំចេញផងដែរដូចជាអង្ករនាងម្លិះ អង្ករសូម៉ាលី អង្ករសែនក្រអូប អង្ករក្រអូបចម្រុះ អង្ករក្រអូបភ្លឺ អង្ករក្រអូបសរីរាង្គនិងអង្ករចំហុយគ្រាប់វែងជាដើម។
គួររំលឹកថា កាលពីឆ្នាំ២០១៣ កម្ពុជានាំចេញអង្ករបានជាង៣៧ម៉ឺន៨ពាន់តោនកើនឡើងប្រមាណ៨៤ភាគរយលើសឆ្នាំ២០១២។ ប្រទេសថៃ ម៉ាឡេស៊ី និងបណ្ដាប្រទេសនៅអឺរ៉ុប ជាគោលដៅនាំចេញអង្ករសំខាន់របស់កម្ពុជា។កាលពីចុងខែមករាកន្លងទៅថ្មីៗនេះ រដ្ឋាភិបាលប្រទេសអ៊ីតាលី ដែលជាប្រទេសផលិតអង្ករធំជាងគេនៅអឺរ៉ុប បានស្នើឲ្យសហភាពអឺរ៉ុប បញ្ឈប់ការផ្ដល់ការអនុគ្រោះពន្ធលើការនាំចូលអង្ករ ពីកម្ពុជា និងមីយ៉ាន់ម៉ា ដោយលើកហេតុផលថា គោលនយោបាយអនុគ្រោះពន្ធលើការនាំចូលអង្ករនេះ ធ្វើឲ្យប៉ះពាល់ធ្ងន់ធ្ងរដល់ការផលិតអង្កររបស់អឺរ៉ុប៕ ភីន រ៉ា