ព្រះសីហនុ៖ ក្រុមគ្រួសារជនរងគ្រោះក្នុងឧប្បទ្ទវហេតុគ្រោះថ្នាក់ចរាចរណ៍នៅលើកំណាត់ផ្លូវជាតិលេខ៤ ដែលបង្កឡើងដោយរថយន្តកុងតឺន័ររបស់ក្រុមហ៊ុនSK បើកបុករថយន្តតារាចម្រៀងខេមរៈសិរីមន្ត បណ្តាលឲ្យមានមនុស្សស្លាប់យ៉ាងអាណោចអាធមកាលពីរាត្រីថ្ងៃព្រហស្បត្តិទី៧ឈានចូលថ្ងៃទី៨ មីនានោះ បាននាំគ្នាទៅដាក់ពាក្យបណ្តឹងនៅឯការិយាល័យប៉ូលិសចរាចរណ៍ខេត្តព្រះសីហនុហើយ កាលពីថ្ងៃទី១០ខែមីនា បន្ទាប់ពីនិមន្តព្រះសង្ឃប្រារពពិធីសូត្រធម៌បណ្តេញនូវឧបទ្រុបចង្រៃចេញផ្លូវ និងបានដុតធូបឧទិ្ទសហៅព្រលឹងអ្នករងគ្រោះទាំងនោះឲ្យវិលទៅរកផ្ទះសម្បែងវិញនោះ ។
នៅពីមុខរថយន្តថុនត្រារបស់ លោក ខេមរៈ សិរីមន្ត ដែលរងការខូចខាតទាំងស្រុងនោះ តារាកំប្លែងជើងចាស់លោក ជួង ជី ហៅ កុយនិងតារាចម្រៀងអាយ៉ៃឆ្លើយឆ្លង អ្នកស្រី ណយសំណាងបានបង្ហូរទឹកភ្នែកយំយែកសោកសង្រេកជីវិតកូនៗរបស់គាត់នៅពេលមកដល់បានឃើញកន្លែងកើតហេតុលើកំណាត់ផ្លូវជាតិលេខ៤ត្រង់ចំណុចគីឡូម៉ែត្រលេខ២១១-២១២ក្នុងភូមិពូធឿងឃុំបិតត្រាំងស្រុកព្រៃនប់។នៅទីនោះនាយកុយនិងអ្នកស្រី ណយ សំណាងបានដុតធូបឧទិ្ទសហៅព្រលឹងកូនប្រុសរបស់គាត់ឲ្យវិលទៅផ្ទះវិញ។
ដោយឡែកគ្រួសារជនរងគ្រោះផ្សេងទៀតដែលបានស្លាប់ជាមួយគ្នានោះក៏បានដុតធូបឧទ្ទិសហៅព្រលឹងកូនៗរបស់គាត់ឲ្យវិលទៅផ្ទះសម្បែងវិញដោយពួកគាត់មានជំនឿថា វិញ្ញាណអ្នកទាំងនោះ នៅវិលវល់នៅលើរថយន្ត និងកន្លែងកើតហេតុនោះ ។
នៅឯការិយាល័យប៉ូលិសចរាចរណ៍ខេត្តព្រះសីហនុក្រុមគ្រួសារជនរងគ្រោះដែលបានស្លាប់ជាមួយគ្នាក្នុងឧប្បទ្ទវហេតុគ្រោះថ្នាក់ចរាចរណ៍បាននាំគ្នាចូលមកទៅដាក់ពាក្យបណ្តឹងរួចរាល់ហើយ។ប៉ុន្តែអ្វីដែលគួរឲ្យសោកសង្រេងកាន់តែខ្លាំងទៀតក្លានោះគឺគ្រួសារជនរងគ្រោះទាំងនោះបានយករូបថតកូនប្រុសរបស់គាត់ម្នាក់មួយៗមកដុតធូបនៅចំពោះមុខរថយន្តTundra របស់ខេមរៈសិរីមន្តដែលខ្ទេចខ្ទីមើលលែងយល់ទៅហើយនោះដោយសម្រែកយំនិងឧទ្ទិសហៅរកព្រលឹងពួកគេឲ្យវិលទៅរកផ្ទះសម្បែងវិញ និងបានឆាប់ទៅចាប់កំណើតជាថ្មីវិញ។
នាយការិយាល័យចរាចរណ៍ផ្លូវគោកខេត្តព្រះសីហនុលោកព្រហ្មពៅបានប្រាប់នៅល្ងាចថ្ងៃនោះថាក្រុមគ្រួសារជនរងគ្រោះដោយគ្រោះថ្នាក់ចរាចរណ៍ផ្ទួនៗគ្នាទាំងពីរករណីកាលពីព្រលប់ថ្ងៃទី៧មីនានិងពាក់កណ្តាលអធ្រាត្រឆ្លងចូលថ្ងៃទី៨មីនានោះបានចូលខ្លួនមកដាក់ពាក្យបណ្តឹងជាបណ្តើរៗហើយក្នុងនោះមាននាយកុយអ្នកស្រី ណយ សំណាងគ្រួសារខេមរៈសិរីមន្តនិងគ្រួសារជនរងគ្រោះជាមួយគ្នាផ្សេងទៀត។
លោកព្រហ្មពៅបានអះអាងថាលោកនឹងជំរុញកិច្ចការកសាងសំណុំរឿងដ៏សោកសង្រេងនេះទៅសាលាដំបូងខេត្តឲ្យបានយ៉ាងលឿនបំផុតខណៈដែលគ្រួសារជនរងគ្រោះទាំងអស់បានមកដាក់ពាក្យបណ្តឹងគ្រប់គ្រាន់។ដោយឡែកវត្ថុតាងបានប្រមែប្រមូលមកគ្រប់ចំនួនអស់ហើយ។
សូមបញ្ជាក់ផងដែរថាការផ្តួចផ្តើមគំនិត និមន្តព្រះសង្ឃជាងមួយរយអង្គប្រារពពិធីនេះឡើងនោះគឺ លោកខ័ណ្ឌច័ន្ទសុផលប្រធានព័ត៌មានជាតិថ្មីៗដោយសេរីនិងប្រតិកម្មរហ័សលើបណ្តាញព័ត៌មានសង្គម(Facebook) បានសហការជាមួយព្រះសង្ឃក្នុងខេត្តព្រះសីហនុដែលមានព្រះគ្រូមេគណគៀតច័ន្ទធុចជាអ្នកដឹកនាំបានដំណើរការប្រកបដោយជំនឿ និងក្រោមក្រសែភ្នែកងឿងឆ្ងល់ពីអ្នកទេសចរណ៍ជាច្រើនដែលធ្វើដំណើរតាមផ្លូវនោះ ។ ពិធីនោះបានចាប់ផ្តើមដើរថ្មើជើងនិងព្រះសង្ឃសូត្រធម៌បណ្តេញខ្មោចចង្រៃតាមដងវិថីអូរឈើទាលកាត់ទីក្រុងព្រះសីហនុសំដៅមកវិមានឯករាជ្យនិងបន្តជិះរថយន្តសំដៅទៅកន្លែងកើតហេតុក្នុងភុមិ-ឃុំ ដែលជួបគ្រោះថ្នាក់ហើយបានបញ្ចប់នៅល្ងាចថ្ងៃដដែលនោះ៕ ស.ស្អាត