ភ្នំពេញ៖ ចំនួននិស្សិតកម្ពុជាទៅសិក្សានៅសហរដ្ឋ អាមេរិក ត្រូវគេកត់សម្គាល់ថាមានការកើនឡើងខ្ពស់គួរឲ្យកត់សម្គាល់។ ស្ថានទូតអាមេរិកប្រចាំនៅកម្ពុជាបានជូនដំណឹងថា ចំនួនសិស្សខ្មែរដែលកំពុងសិក្សានៅសហរដ្ឋអាមេរិករវាងឆ្នាំ២០១២ ដល់២០១៣ មាន៣៩៣នាក់ គឺកើន១៨ភាគរយបើធៀបរវាងឆ្នាំ២០១១ដល់ ២០១២ មានចំនួន៣០៣នាក់ប៉ុណ្ណោះ។
ចំនួននេះត្រូវរបាយការណ៏ប្រចាំឆ្នាំ ២០១៣របស់ Open Doors ស្តីពីការផ្លាស់ប្តូរការអប់រំអន្តរជាតិ ដែលបានចេញផ្សាយកាល ពីថ្ងៃទី១១ ខែ វិច្ឆិកា ឆ្នាំ២០១៣ បានហៅថាជាចំនួនយ៉ាងខ្ពស់។ ជាទូទៅចំនួននិស្សិតអន្តរជាតិដែលសិក្សានៅមហាវិទ្យាល័យ និងសាកលវិទ្យាល័យសហរដ្ឋអាមេរិកមានការកើនឡើងចំនួន៧ភាគរយ ដែលមានចំនួនសរុបប្រមាណ ៨សែន១ម៉ឺន៩ពាន់ ៦៤៤ នាក់ ក្នុងឆ្នាំ២០១២ - ២០១៣ ហើយនិស្សិតអាមេរិកសិក្សានៅបរទេសវិញមានការកើនឡើង ប្រមាណ៣ភាគរយដែលមានចំនួនសរុបប្រមាណ ២សែន៨ម៉ឺន៣០០០នាក់។
ស្ថានទូតសហរដ្ឋអាមរិកនៅក្នុង ប្រទេសកម្ពុជាបានថ្លែងថាគេលើកកំពស់ជំរុញអោយមានការឱកាសនៃការ សិក្សានៅសហរដ្ឋអាមេរិក សំរាប់និស្សិតកម្ពុជា តាមរយៈមជ្ឈមណ្ឌលផ្តល់ប្រឹក្សាស្តីពីការអប់រំនៅអាមេរិក (Education USA Center)ដែលមានទីតាំងស្ថិតនៅសាកលវិទ្យាល័យបញ្ញាសាស្រ្តកម្ពុជានៅ រាជធានីភ្នំពេញ តាមរយៈបណ្ណាល័យអាមេរិកចំនួន៤កន្លែងនៅក្នុងប្រទេសកម្ពុជាតាមរយៈ ពិព័រណ៍អប់រំប្រចាំឆ្នាំរវាងកម្ពុជានិងសហរដ្ឋអាមេរិក និងកម្មវិធីអប់រំជាច្រើនមួយចំនួនទៀត។
ស្ថានទូតនៅបានជូនដំណឹងទៀតថា តាមរយៈពិពរណ៍អប់រំរវាងកម្ពុជា និងអាមេរិក ដែលនឹងបា្ររព្ធធ្វើនៅថ្ងៃទី១៥ កុម្ភៈ ឆ្នាំ២០១៤ មានមហាវិទ្យាល័យនិងសាកលវិទ្យាល័យអាមេរិកចំនួនជាង២០ នឹងចូលរួមផ្តល់ព័ត៌មានស្តីពីការសិក្សានៅសហរដ្ឋអាមេរិកនិងឱកាសនៃ ការផ្តល់អាហារូបករណ៏ដល់សិស្សវិទ្យាល័យនៅកម្ពុជា៕ ដោយ៖ មករា