ភ្នំពេញ៖ លោក ផាន់ សិទ្ធី នាយកសាលាកម្ពុជា-អូស្រ្តាលី ដែលជាសាលាឈានមុខគេមួយលើផ្នែកបណ្តុះបណ្តាល និងអប់រំធនធានមនុស្សបានលើកឡើងថា សាលារបស់លោកនឹងពង្រឹងគុណភាពនៃការអប់រំដល់សិស្សានុសិស្សឲ្យមានសមត្ថភាពកាន់តែខ្លាំងក្លាជាងមុន ខណៈការប្រកួតប្រជែងលើវិស័យនេះមានភាពផុលផុសកាន់តែខ្លាំង និងម៉្យាងទៀតទីផ្សារសេដ្ឋកិច្ចអាស៊ាននឹងចូលមកដល់នាឆ្នាំ២០១៥ខាងមុខនេះ។
នាយកសាលាកម្ពុជា-អូស្រ្តាលី បានមានប្រសាសន៍ប្រាប់ក្រុមអ្នកសារព័ត៌មាននៅព្រឹកថ្ងៃទី២៥ ខែធ្នូឆ្នាំ២០១៣នេះ ក្នុងឱកាសដែលសាលាកនេះរៀបចំវិធីបុណ្យចូលឆ្នាំសកល(បុណ្យណូអែល) ដើម្បីផ្តល់ភាពសប្បាយរីករាយដល់សិស្សានុសិស្ស ក៏ដូចជាបុគ្គលិកសិក្សារបស់សាលា ។ លោក ផាន់ សិទ្ធី បានប្រាប់ឲ្យដឹងទៀតថា ក្នុងនាមជាកូនខ្មែរម្នាក់ លោកគិតថា បញ្ហាសិក្សាអប់រំនេះគឺពិតជាមានសារៈសំខាន់ខ្លាំងណាស់ ដែលយើងត្រូវតែធ្វើយ៉ាងណាឲ្យកូនខ្មែរមានសមត្ថភាពគ្រប់គ្រាន់ក្នុងការប្រើប្រាស់ភាសាជាតិ និងភាសាអន្តរជាតិ ឲ្យបានស្ទាត់ជំនាញទើបអាចធ្វើការប្រកួតប្រជែងជាមួយគេបាន។
លោកបញ្ជាក់ថា សាលាកម្ពុជា-អូស្រ្តាលីនឹងពង្រឹងគុណភាពអប់រំបន្ថែមទៀតតាមស្តង់ដាជាតិ របស់ក្រសួងអប់រំយុវជននិងកីឡានិងស្តង់ដាអន្តរជាតិដែលមានភាពជឿនលឿន ដល់សិស្សានុសិស្សាដែលកំពុងសិក្សារៀនសូត្រទាំងផ្នែកភាសាអន្តរជាតិ និងខេមរៈភាសារឲ្យកាន់តែខ្លាំងក្លា មានសមត្ថភាពប្រកួតប្រជែង ទន្ទឹមនឹងទីផ្សារសេដ្ឋកិច្ចអាស៊ានដែលនឹងឈានមកដល់ក្នុងពេលឆាប់ៗខាងមុខនេះ។លោកនាយកបានបញ្ជាក់ថា សាលាកម្ពុជា-អូស្រ្តាលី ត្រូវបានបង្កើតឡើងក្នុងឆ្នាំ២០០៩ ដោយមានសិស្សចូលសិក្សារៀនសូត្រតែចំនួន៥០នាក់ ប៉ុណ្ណោះទេ ប៉ុន្តែក្នុងពេលបច្ចុប្បន្ននេះកំណើនសិស្សបានមានការកើនឡើងជាលំដាប់ ដែលរហូតដល់មកដល់ពេលនេះសាលាមានសិស្សចូលរៀនជាង៨០០នាក់ ដោយគិតរួមទាំងសិស្សមត្តេយ្យសិស្សា និងមធ្យមសិក្សា ហើយនៅដើមឆ្នាំ២០១៤ខាងមុខនេះ សាលាមានគម្រោងបើកសាខាមួយទៀត និងចុងឆ្នាំ២០១៤ សាលានឹងបើកសាខាបន្ថែមមួយចំនួនទៀត។
គួរបញ្ជាក់ថា សាលាកម្ពុជា-អូស្រ្តាលី គឺជាសាលាដែលធានាបាននូវគុណភាពសិក្សាអប់រំខ្ពស់ជាគ្រឹះដ៏រឹងមាំសម្រាប់កុលបុត្រ-កុលធីតាបន្តការសិក្សាទៅថ្នាក់ឧត្តមសិក្សា ហើយក៏ជាសាលាដែលជម្រុញការអប់រំធនធានមនុស្សប្រកបដោយសមត្ថភាព គុណភាព សីលធម៌ និងសេចក្តីថ្លែថ្នូរ ៕ ដោយ៖ ស.ស្អាត