ភ្នំពេញ៖ រដ្ឋមន្ត្រីក្រសួងទេសចរណ៍លោក ថោង ខុន បានថ្លែងឱ្យដឹងថា ជើងហោះហើរត្រង់ដោយយន្តហោះ Air China ពីទីក្រុងប៉េកាំងប្រទេសចិនឆ្ពោះមកខេត្តសៀមរាប ជាលើកទីដំបូងកាលពីយប់ថ្ងៃទី០១ ខែធ្នូ កន្លងទៅនេះ វាបានសបញ្ជាក់ឱ្យឃើញថា ប្រជាពលរដ្ឋចិននឹងមានគម្រោងមកធ្វើទស្សនាកម្សាន្តនៅក្នុងព្រះរាជាណាចក្រកម្ពុជា ជាពិសេសនៅតំបន់ខេត្តសៀមរាបនេះ កាន់តែច្រើនឡើងហើយ ប៉ុន្តែដើម្បីទាក់ទាញចំណាប់អារម្មណ៍របស់ភ្ញៀវទេសចរឲ្យកាន់តែខ្លាំងនោះ។
.jpg)
ក្រៅពីតំបន់ប្រាង្គប្រាសាទ និងរមណីយដ្ឋានទេសចរណ៍ ប្រការសំខាន់គឺគ្រប់សេវាកម្មទេសចរណ៍ទាំងអស់ត្រូវប្រកបដោយគុណភាព និងមានតម្លៃសមស្រប ក្នុងខណៈពេលដែលកន្លងមក នៅខេត្តសៀមរាបផ្ទាល់តែម្តង មានភាពមិនប្រក្រតីទៅលើទំនិញគ្មានគុណភាព។
លោករដ្ឋមន្ត្រីក្រសួងទេសចរណ៍បានបញ្ជាក់ថា មូលហេតុ ដែលប្រតិបត្តិករទេសចរទាំងអស់ត្រូវយកចិត្តទុកដាក់ចំពោះភ្ញៀវទេសចរចិននោះ គឺដោយសារប្រជាប្រជាពលរដ្ឋចិនមានគម្រោងផែនការធ្វើដំណើរទស្សនកិច្ចទៅក្រៅប្រទេស ដែលនឹងមានចំនួនជាង២០០លាននាក់នៅក្នុងឆ្នាំ២០២០ ប៉ុន្តែគោលនយោបាយរបស់រាជរដ្ឋាភិបាលកម្ពុជា មិនមានការរើសអើងចំពោះអ្នកទេសចរនោះទេ។
លោកបន្ថែមថា ចាប់ពីឆ្នាំក្រោយទៅប្រទេសកម្ពុជា នឹងទទួលបានភ្ញៀវទេសចរជាជនជាតិចិនកាន់តែច្រើនៗថែមទៀត ប្រសិនបើគ្រប់សេវាកម្មទេសចរណ៍ទាំងអស់នៅក្នុងទូទាំងប្រទេស ប្រកបទៅដោយគុណភាព និងមានតម្លៃសមស្រប។
ទាក់ទងជាមួយនឹងចំណុចខាងលើនេះដែរ មានមគ្គទេសក៍ទេសចរណ៍ជាច្រើននាក់នៅខេត្តសៀមរាប បានប្រាប់ថា ការយកចិត្តទុកដាក់ពីបញ្ហាគុណភាពលើសេវាកម្មទេសចរនេះ គឺជារឿងចាំបាច់បំផុត ដែលមិនអាចមើលរំលងបានឡើយ ជាពិសេសគឺតម្លៃឲ្យបានសមរម្យ ហើយក៏រំពឹងទុកដែរថា ភ្ញៀវទេសចរចិននឹងមានការកើនឡើងចាប់ពីឆ្នាំក្រោយនេះតទៅ។
គួររំលឹកដែរថា ក្នុងចំណោមភ្ញៀវទេសចរបរទេសចំនួនជាង១លាន៦សែននាក់ ដែលចូលមកទស្សនាក្នុងខេត្តសៀមរាប ក្នុងរយៈពេល១០ខែឆ្នាំ២០១៣នេះ ភ្ញៀវទេសចរជនជាតិចិន មានចំនួនជាង២២ម៉ឺននាក់ ឈរនៅលំដាប់លេខ២ បន្ទាប់ពីភ្ញៀវទេសចរជាជនជាតិកូរ៉េ ដែលមានចំនួនជាង២៨ម៉ឺននាក់៕ ដោយ៖ ភីនរ៉ា