(MC):មន្ត្រីជាន់ខ្ពស់ក្រសួងទេសចរណ៍បានអោយដឹងថា ឆ្នាំ២០១៣នេះកម្ពុជាទទួលបានភ្ញៀវទេសចរជាង៤លាននាក់។ចំនួន នេះ ជាក្តីសង្ឃឹមមួយសម្រាប់កម្ពុជា ក្នុងវិស័យទេសចរណ៍ថា អាចនឹងកើនឡើង ទៀតសម្រាប់អនាគត។រដ្ឋលេខាធិការ ក្រសួង ទេសចរណ៍ ឯកឧត្តម ទិត ចន្ថា បានបង្ហាញសុទិដ្ឋិនិយមថា ស្របគ្នានឹងកំណើនទេសចរ តម្រូវការអ្នកបម្រើការ ក្នុងវិស័យទេស ចរណ៍ក៏កើនឡើងដែរ តាមការទស្សន៍ទាញនៅឆ្នាំ២០២០ កម្ពុជានឹងមានកំណើនភ្ញៀវជាង៧លាននាក់។ លំហូនៃ ចូលនៃទេស ចរនេះ គឺជាឱកាសផ្តល់ការងារកាន់តែច្រើនសម្រាប់ប្រជាជនកម្ពុជាផងដែរ។
ក្នុងពិធីបិទវគ្គបណ្តុះបណ្តាលជំនាញទេសចរណ៍ប្រកបដោយប្រសិទ្ធិភាពខ្ពស់ ដែលមាន រយៈពេលបីឆ្នាំក្រោម ជំនួយសហគមន៍ អឺរ៉ុប នៅព្រឹកថ្ងៃសុក្រនេះ ឯកឧត្តម ទិត ចន្ថា បានមានប្រសាសន៍ថា សម្រាប់២០២០ ការងារលើវិស័យទេសចរណ៍ ដូចជាអ្នក ធ្វើការនៅតាមសណ្ឋាគារ ភោជនីយដ្ឋាន និងមគ្គុទេសទេសចរណ៍ជាដើមនោះ នឹងកើនដល់ទៅជាង៨០ម៉ឺននាក់។ដើម្បី ផ្តល់ សេវាល្អក្នុងវិស័យទេសចរណ៍ អង្គការអភិវឌ្ឍន៍ហូឡង់ សហការជាមួយអង្គការមិត្តសម្លាញ់ និងសមាគមភោជនីយដ្ឋានកម្ពុជា បានបណ្តុះបណ្តាល អ្នកបម្រើការក្នុងវិស័យទេសចរណ៍ក្រៅប្រព័ន្ធចំនួន ១៥០០នាក់ ដល់ប្រជាជនកម្ពុជា ។
ឯកឧត្តម ទិត ចន្ថា បានចាត់ទុក ការចូលរួមបណ្តុះបណ្តាលរបស់អង្គការក្រៅរដ្ឋាភិបាលនេះថា ជាការផ្នែកមួយនៃការ ប្រឹងប្រែង របស់រដ្ឋាភិបាលក្នុងការលើកម្ពស់វិស័យទេសចរណ៍ និងផ្តល់ភាពងាយស្រួលក្នុងការចល័តកន្លែងធ្វើ ការរបស់អ្នកធ្វើការក្នុង វិស័យទេសចរណ៍ ក្នុងឆ្នាំ២០១៥ខាងមុខ នៅពេលសមាគមអាស៊ាន ធ្វើសមាហរណកម្មជាសហគមន៍អាស៊ាន នៅពេលនោះ ហើយដែលប្រជាជនអាស៊ានអាចធ្វើការក្នុងប្រទេសណាមួយក៏បាន ក្នុងចំណោមប្រទេសទាំ ង ១០នៃសមាជិកអាស៊ានទាំង មូល។គួរបញ្ជាក់ថា កម្មវិធីបណ្តុះបណ្តាលជំនាញទេសចរណ៍ប្រកបដោយប្រសិទ្ធិភាពខ្ពស់ HITT បានរៀបចំវគ្គបណ្តុះ បណ្តាល ជា សាធារណៈជាង១០០លើក និងបានរៀបចំវគ្គបណ្តុះបណ្តាលគ្រូបង្គោលចំនួន១០វគ្គនៅក្នុងប្រទេសកម្ពុជាយើងនេះ ៕ ដោយ ៖ រតនា