ក្រចេះ៖ កោះទ្រង់ ស្ថិតនៅឆ្ងាយពីរាជធានីភ្នំពេញក៏ពិតមែន តែបច្ចុប្បន្នកោះធម្មជាតិមួយនេះបានក្លាយជារមណីយដ្ឋាន ទាក់ទាញភ្ញៀវទេសចរគួរឱ្យកត់សម្គាល់ ។ភ្ញៀវទេសចរអន្តរជាតិដែលបានទៅដល់កោះទ្រង់សុទ្ធតែបង្ហាញនូវអារម្មណ៍ភ្ញាក់ផ្អើល និងកោតសរសើរចំពោះសម្រស់ធម្មជាតិ និងបរិស្ថានល្អបរិសុទ្ធ។ហេតុដូច្នេះហើយ ទើបភ្ញៀវទេសចរអន្តរជាតិដែលបានទៅទស្សនា និងសម្រាកកម្សាន្តនៅកោះទ្រង់ម្តងហើយ តែងវិលត្រឡប់ទៅម្តងទៀតរួមទាំងប្រមែប្រមូលមិត្តភក្តិឱ្យទៅកម្សាន្តនៅរមណីយដ្ឋានដ៏ ស្រស់ត្រកាលនោះថែមទៀត ។
ដូចនះហើយទើបភ្ញៀវទេសចរអន្តរជាតិបានប្រសិទ្ធនាមកោះទ្រង់ថាជា «កោះនិស្ស័យ» ។ទាក់ទងនឹងរមណីយដ្ឋានកោះទ្រង់ កាលពីពេលថ្មីៗនេះថា ភ្ញៀវទេសចរអន្តរជាតិដែលទៅសម្រាកកម្សាន្តនៅកោះទ្រង់មាន ចំនួនកើនឡើងជាលំដាប់ ជាក់ស្តែងរយៈពេល១០ខែនៃឆ្នាំ២០១៣នេះ ភ្ញៀវទេសចរអន្តរជាតិមានកំណើនរហូតដល់២៥,៧៤% បើប្រៀបធៀបនឹងរយៈពេលដូចគ្នានៃឆ្នាំ២០១២កន្លងទៅ ។
កោះទ្រង់ស្ថិតនៅទល់មុខទីរួមខេត្តក្រចេះ ដែលមានចម្ងាយប្រមាណជាងមួយ គីឡូម៉ែត្រ។ អ្វីដែលធ្វើឱ្យកោះទ្រង់មានសម្រស់ស្រស់ត្រកាល រួមទាំងបរិស្ថានល្អបរិសុទ្ធ និងទាក់ទាញភ្ញៀវទេសចរនោះ គឺស្ថិតនៅកណ្តាលទន្លេមេគង្គតែម្តង ។ កោះទ្រង់ មានធម្មជាតិស្រស់ត្រកាលរស់រវើក រួមទាំងដីស្រែចម្ការ និងប្រពៃណីនៃការរស់នៅរបស់ប្រជាពលរដ្ឋនៅទីនោះ ។ អ្វីដែលធ្វើឱ្យភ្ញៀវទេសចរជាតិ-អន្តរជាតិ ចាប់អារម្មណ៍ខ្លាំងមែនទែននោះ គឺផ្លែក្រូចត្លុងដែលមានរសជាតិផ្អែមឆ្ងាញ់ពិសាហើយបើបានហូបកាលណាប្រាកដជាលាន់មាត់គ្រប់គ្នាថា «ពិតជាឆ្ងាញ់មែន» ។កោះទ្រង់ស្ថិតនៅក្នុងសង្កាត់កោះទ្រង់ ខេត្តក្រចេះ និងមានទំហំផ្ទៃដីចំនួន៩គីឡូម៉ែត្រក្រឡា មានប្រជាពលរដ្ឋរស់នៅចំនួន៣៨៥គ្រួសារ ។ ប្រជាពលរដ្ឋទាំងនោះភាគច្រើនប្រកបរបរនេសាទត្រី និងធ្វើស្រែចម្ការ រួមនឹងដាំបន្លែ និងឈើហូបផ្លែគ្រប់មុខ ព្រមទាំងដំណាំរួមផ្សំ ផ្សេងៗទៀត សម្រាប់ផ្គត់ផ្គង់ភ្ញៀវទេសចរ ដូចជា ចេក ខ្នុរ ល្ហុង ពិសេសក្រូចត្លុង ។
បច្ចុប្បន្ន កោះទ្រង់មានផ្ទះសំណាក់ចំនួន២សម្រាប់ភ្ញៀវទេសចរសម្រាក ដោយរៀបចំជារបៀបផ្ទះសំណាក់សាមញ្ញធម្មតា ប៉ុន្តែមានអាងហែលទឹក និងកន្លែងសម្រាប់លេងកីឡា។តាមធម្មតាភ្ញៀវទេសចរដែលសម្រុកទៅលេងនៅកោះទ្រង់គឺចាប់ពីខែធ្នូ រហូតដល់ខែមេសា ឬខែឧសភាព្រោះជារដូវទឹកស្រកបង្ហាញឆ្នេរខ្សាច់ដ៏ស្រស់ត្រកាល ដែលភ្ញៀវអាចចុះងូតទឹកនិងអាំងថ្ងៃប្រកបដោយផាសុកភាពបំផុត។នាពេលខាងមុខ ឆាប់ៗនេះ រមណីយដ្ឋានកោះទ្រង់នឹងក្លាយជាតំបន់ទេសចរណ៍ដ៏សំខាន់មួយនៅព្រះរាជាណាចក្រកម្ពុជាយើង ហើយភ្ញៀវទេសចរនឹងទៅសម្រាកកម្សាន្តកាន់តែ ច្រើនឡើងៗមិនខាន ព្រោះកោះទ្រង់នឹងប្រែក្លាយខ្លួនឱ្យទៅជាបុប្ផាមួយទងដែលមាន ក្លិនក្រអូបឈ្ងុយឈ្ងប់ ដែលគ្រប់គ្នាប្រាថ្នាចង់ក្រេបគន្ធពិដោរសួគ៌នេះ ៕ ដោយ៖ ភីនរ៉ា