ភ្នំពេញ៖ មន្រ្តីអ្នកនាំពាក្យ និងជារដ្ឋលេខាធិការ នៃទីស្តីការគណៈរដ្ឋមន្រ្តី លោក ផៃ ស៊ីផាន បានថ្លែងកាលពីម្សិល មិញនេះថា បើទោះបីជាស្ថានភាព នៅក្នុងប្រទេសថៃ( ពិសេសក្រុងបាងកក) កំពុងតែស្ថិតក្នុងភាពវឹកវរ ដែលបង្កការរំខានពីក្រុមបាតុករប្រឆាំងថៃ ដែលដឹកនាំដោយ លោក ស៊ូថេប ក្នុងបំណងទម្លាក់រាជរដ្ឋាភិបាល លោកស្រី យីង ឡាក់ស៊ីណាវ៉ាតត្រា ចេញពីដំណែងក៏ដោយ ប៉ុន្តែទំនាក់ទំនង ពាណិជ្ជកម្ម រវាងប្រទេសទាំងពីរ កម្ពុជា-ថៃ នៅតែមានដំណើរល្អ និងរក្សាបានដូចដើម គ្មានអ្វីប្រែប្រួលនោះឡើយ ។
លោក ផៃ ស៊ីផាន បានមានប្រសាសន៍ ប្រាប់ក្រុមអ្នកសារព័ត៌មាន នៅក្រៅអង្គប្រជុំមួយ នៅព្រឹកថ្ងៃទី២៣ ខែមករា ឆ្នាំ២០១៤ នៅទីស្តីការ គណៈរដ្ឋមន្រ្តីថា យើងអត់មានអីទេ កម្ពុជាអនុវត្តតាមរដ្ឋធម្មនុញ្ញ យើងអព្យាក្រឹត្យ យើងគោរពនូវសន្តិសហវិជ្ជមាន ហើយនយោបាយជាការសម្រេចរបស់ប្រជាពលរដ្ឋថៃ ក៏ប៉ុន្តែកាតព្វកិច្ចរបស់យើង ដែលជាកាតព្វកិច្ចនៅក្នុងសមាជិក នៃប្រទេសជាសមាគមអាស៊ាន យើងត្រូវដូចគ្នា ហើយកាតព្វកិច្ចអនុវត្តន៍ជាតិនៅតែបន្តទៀត ហើយទំនាក់ទំនងពាណិជ្ជកម្ម នៅតែបន្តមានជាប្រក្រតីដូចពេលកន្លងមក។
មន្រ្តីអ្នកនាំពាក្សរូបនេះបន្តថា ក្រសួងការបរទេសកម្ពុជា តាមរយៈអគ្គកុងស៊ុល ខ្មែរប្រចាំប្រទេសថៃ តែងតែធ្វើការអប់រំណែនាំប្រជាពលរដ្ឋ ក៏ដូចជាពលករ កុំឲ្យទៅក្បែរកន្លែងប្រមូល ជាពិសេសកន្លែងធ្វើបាតុកម្មរបស់ក្រុមបាតុករថៃ ហើយពួកគាត់ក៏បាន យល់ច្បាស់អំពីបញ្ហានេះដែរ ដោយពួកគាត់បានខិតខំប្រឹងប្រែងធ្វើការងារ មិនបានរវីរវល់អំពីបញ្ហានេះទេ។ លោកបន្តទៀតថា អគ្គកុងស៊ុលនៅទីនោះ បានប្រាប់ពួកគាត់កុំឲ្យជឿតាមពាក្យញុះញុង របស់ជនមួយចំនួន ដែលអាចអូសទាញពួកគាត់ ឲ្យទៅចូលរួមធ្វើបាតុមកម្មផ្សេងៗវាជាអំពើខុសច្បាប់។
គួរបញ្ជាក់ផងដែរថា កាលពីថ្ងៃពុធទី២២ ខែមករាកន្លងទៅនេះ ប្រទេសថៃ បានប្រកាសប្រើច្បាប់គ្រាអាសន្ន ចំនួន៦០ថ្ងៃ ដែលមានសុពលភាព ចាប់ថ្ងៃទី ២២ ខែមករា នោះតទៅ នៅក្នុងក្រុងបាងកក និង តំបន់ជិតខាង ដើម្បីធានាឲ្យមានសន្តិសុខ សណ្តាប់ធ្នាប់នៅក្នុងសង្គម ព្រោះសកម្មភាព របស់ក្រុមបាតុករថៃដែលដឹកនាំដោយ លោក ស៊ូថេប កាន់តែមានភាពអនាធិបតេយ្យ និងបង្ករភាពវឹកវរកាន់តែខ្លាំងឡើងៗពីមួយថ្ងៃទៅមួយថ្ងៃ៕ ដោយ៖ សស្អាត