ភ្នំពេញ៖ លោក ម៉ម ប៊ុនហេង រដ្ឋមន្រ្តីក្រសួងសុខាភិបាលថ្លែងដោយអះអាងនៅក្នុងពិធីផ្សព្វផ្សាយសារាចរស្ដីពី «វិធានការហាមជក់ និងបង្ហុយផ្សែងផលិតផល ថ្នាំជក់ នៅកន្លែងធ្វើការ និងនៅកន្លែងសាធារណៈ»ថា ប្រជាពលរដ្ឋ ខ្មែរ ប្រមាណ៣០នាក់ក្នុងមួយថ្ងៃៗ បានស្លាប់បណ្ដាលមកពីជំងឺ ការជក់បារី មិនតែប៉ុណ្ណោះ ទឹកប្រាក់ជិត ១០០ លានដុល្លារ សហរដ្ឋអាម៉េរិក ត្រូវបានប្រើប្រាស់ សម្រាប់ទិញបារីជក់ក្នុង១ឆ្នាំៗនៅកម្ពុជា។
លោករដ្ឋមន្ត្រីក្រសួងសុខាភិបាល បានឲ្យដឹងទៀតនៅព្រឹកថ្ងៃទី១១ខែកុម្ភៈ ថា ក្រៅពីមនុស្សស្លាប់ប្រមាណ ៣០ក្នុងមួយថ្ងៃ និងចំណាយ ទឹកប្រាក់ ទិញថ្នាំជក់ជិត ១០០លានដុល្លារក្នុងមួយឆ្នាំនោះ ប្រជាពលរដ្ឋខ្មែរបានចំណាយទៅលើការព្យាបាលជំងឺ ដែលបង្កដោយការជក់បារីមានទំហំធំជាងប្រាក់ចំណាយទៅលើការទិញបារីឆ្ងាយណាស់។
តំណាងអង្គការសុខភាពពិភពលោកប្រចាំកម្ពុជា លោកវេជ្ជបណ្ឌិត ភីធឺ ជេអឹម វ៉ាន់ម៉ារ៉េ បានលើកឡើងថា ថ្នាំជក់ គឺជាមូលហេតុចម្បងដែលនាំឱ្យមនុស្សគ្រប់រូបកើតជំងឺមហារីក។ ជារៀងរាល់ឆ្នាំ ថ្នាំជក់បានសម្លាប់មនុស្ស៦លាននាក់នៅទូទាំងពិភពលោក ដែលក្នុងនោះមាន៦០០.០០០នាក់ស្លាប់ដោយសាររងការស្រូបផ្សែងបារីពីគេ។
"ប្រសិនបើគ្មានវិធានការដ៏មានប្រសិទ្ធភាពក្នុងការត្រួតពិនិត្យថ្នាំជក់ទេនោះ តួលេខនៃការស្លាប់ដែលបណ្ដាលមកពីការប្រើប្រាស់ថ្នាំជក់ នឹងកើនឡើងដល់៨លាននាក់គិតត្រឹមឆ្នាំ២០៣០"។កសន្និដ្ឋានថា នៅកម្ពុជាជារៀងរាល់ថ្ងៃមានមនុស្សជិត៣០នាក់ស្លាប់ដោយសារជំងឺដែលទាក់ទងនឹងការប្រើប្រាស់ថ្នាំជក់ ដែលភាគច្រើននៃការស្លាប់ទាំងនោះ ស្ថិតក្នុងវ័យកំពុងពេញកម្លាំងពលកម្មក្នុងការអភិវឌ្ឍជាតិ។ ក្នុងន័យនោះ ក្នុងមួយឆ្នាំៗពលរដ្ឋកម្ពុជា បានបាត់បងជីវិតមុនអាយុកាលប្រមាណ១ម៉ឺននាក់ដោយសារការរាតត្បាត ដែលគេអាចបង្ការបានទាំងស្រុង។លោកបន្ថែមថា ការរងផលប៉ះពាល់ដោយសារការស្រូបផ្សែងបារីពីគេនៅតែមានអត្រាខ្ពស់នៅតាម មធ្យោបាយដឹកជញ្ចូនសាធារណៈ និងទីកន្លែងធ្វើការងារដែលស្ថិតក្នុងអគារបិទជិត។ ផ្អែកលើស្ថិតិថ្មី បំផុតនៃការអង្កេតស្រាវជ្រាវស្តីពីថ្នាំជក់ទៅលើមនុស្សពេញវ័យនៅក្នុងប្រទេសកម្ពុជា (NATS) ប្រជាពលរដ្ឋខ្មែរប្រមាណជា ៨៤%រងនូវការស្រូបផ្សែងបារីពីគេនៅតាមភោជនីយដ្ឋាននានានៅទីក្រុង ហើយ ៩០% នៅតាមរោជនីយដ្ឋាននៅតាមទីជនបទ។គួរជម្រាបផងដែរថា ប្រទេសកម្ពុជា មានការរីកចម្រើនឆ្ពោះទៅរកការអនុវត្តមាត្រា ៨នៃអនុសញ្ញា ស្តីពីការត្រួតពិនិត្យថ្នាំជក់របស់អង្គការសុខភាពពិភពលោក ដោយបានចេញសារចរស្តីពីវិធានការ ហាមជក់ និងការបង្ហុយផ្សែងផលិតផលថ្នាំជក់នៅកន្លែងធ្វើការ និងទីសាធារណៈ ភោជនីយដ្ឋាន និងសណ្ឋាគារជាដើម។បើយោងតាមលទ្ធផលស្រាវជ្រាវ របស់ក្រសួងផែនការឆ្នាំ២០១១បច្ចុប្បន្ននេះប្រជាពលរដ្ឋកម្ពុជាជិត៩០ភាគរយកំពុងស្រូបផ្សែងបារីពីគេនៅតាមភោជនីយដ្ឋាន៦០%, ចំណែកឯនៅតាមមធ្យោបាយធ្វើដំណើរសាធារណៈជិត៥០%។ ដោយឡែក តាមលទ្ធផលនៃការវិភាគបឋមខាងមន្ទីរពេទ្យមិត្តភាពខ្មែរ-សូវៀតបានឱ្យដឹងថា ការចំណាយទៅលើការព្យាបាលជំងឺមហារីកមួយត្រូវការថវិកាជាមធ្យម១ម៉ឺនដុល្លារសហរដ្ឋអាម៉េរិក៕ ដោយ៖ ភីន រ៉ា