ភ្នំពេញ៖ អ្នកកើតជំងឺអុតស្វាយ អាចប្រឈមនឹងគ្រោះថ្នាក់ធ្ងន់ធ្ងរ ដល់សុខភាព នៅពេលណាអ្នកជំងឺ ខ្វះអនាម័យ និងការថែទាំខ្លួន ឲ្យបានត្រឹមត្រូវទៅតាមវិជ្ជបញ្ជារបស់គ្រូពេទ្យទេនោះ។
មន្រ្តីបច្ចេកទេស ផ្នែកគាំពារមាតា និងទារក នៃមន្ទីរសុខាភិបាលខេត្តកំពង់ឆ្នាំង លោក សោម មេសា បានមានប្រសាសន៍ឲ្យដឹងថា ជំងឺអុតស្វាយ អាចបង្កគ្រោះយ៉ាងថ្នាក់ធ្ងន់ធ្ងរបំផុត ដល់សុខភាពអ្នកជំងឺបានគ្រប់ពេល នៅពេលណាពួកគេ មិនបានថែទាំសុខភាពនិង មានអនាម័យខ្លួនប្រាណឲ្យបានត្រឹមត្រូវ ក្នុងការរស់នៅបានល្អទេនោះ ព្រោះថា ជម្ងឺនេះ អាចធ្វើឱ្យអ្នកជម្ងឺចុះទ្រុឌទ្រោម ហេវហត់ រាងកាយស្គមស្គាំង និងអស់កម្លាំងខ្លាំង។ទន្ទឹមនេះ នៅពេលប្រព័ន្ធសារពាង្គកាយអញនកជំងឺចុះខ្សោយ ពុំមានលទ្ធភាពទប់ទល់នឹងមេរោគទេ វាអាចធ្វើឱ្យអ្នកជំងឺឈានដល់ដំណាក់កាលធ្ងន់ធ្ងរបាន ដែលទាមទារការព្យាបាលទៀតផង។ មួយវិញទៀត ជំងឺនេះ ជាប្រភេទជម្ងឺឆ្លង ដែលកើតនៅលើស្បែកមនុស្ស ភាគច្រើន កើតនៅលើកុមារ ដែលមានអាយុក្រោម១០ឆ្នាំ ជួនកាលវាអាចកើតមាន ចំពោះមនុស្សពេញវ័យផងដែរ។
ជម្ងឺអុតស្វាយ ជាជំងឺមួយដែលបង្កឡើង ដោយមេរោគ Herpes Virus ហើយមេរោគនេះ មិនត្រឹមតែបង្កឲ្យកើតជាជំងឺអុតស្វាយប៉ុណ្ណោះទេ តែនៅដំណាក់បន្ទាប់ វាអាចនឹងបង្កជាជម្ងឺម្យ៉ាងទៀតហៅថា រើម ថែមទៀតផង។មន្រ្តីបច្ចេកទេសរូបនេះបន្តថា ជម្ងឺអុតស្វាយ ឆ្លងពីមនុស្សម្នាក់ ទៅមនុស្សម្នាក់ទៀត តាមផ្លូវដង្ហើម ដូចជា ក្អក និងកណ្ដាស់ជាដើម។ រោគសញ្ញានៃជម្ងឺនេះ គឺចាប់បង្ហាញក្រោយពេលពី ២ ទៅ ៣ សបា្ដហ៍។ចំពោះជម្ងឺនេះ កុមារមិនសូវជាមានរោគសញ្ញាពិសេសណាមួយនោះទេ ប៉ុន្ដែសម្រាប់មនុស្សធំពេញវ័យ ចេញជារោគសញ្ញាមួយចំនួន ដូចជា គ្រុនក្ដៅ ហៀរសម្បោរ ឬ មានអាការប្រហាក់ប្រហែល នឹងជម្ងឺផ្ដាសាយដែរ។ ក្រៅពីនេះ មានរោគសញ្ញាមួយចំនួនទៀត ដែលធ្វើ ឲ្យមានការឈឺខ្លួនប្រាណ ឈឺក្បាលជាដើម។ រយៈពេល២ ឬ ៣ ថ្ងៃក្រោយមក ទើបមានចេញកន្ទួលក្រហមៗនៅលើស្បែក ចេញជាពងទឹកថ្លាៗនៅលើកន្ទួលនោះ ហើយវាក៏វិវត្ដន៍ទៅតាមដំណាក់កាលជាបន្ដបន្ទាប់ ដូចជា ពងទឹកថ្លាៗ ទៅជាខាប់ល្អក់ និងក្រៀម ទៅជាក្រមរ រហូត អាចបង្កជាស្លាកស្នាមជាច្រើនផងដែរ។
ចំពោះវិធីព្យាបាល និងថែទាំវិញ លោកបានលើកឡើងថា វាមិនមានអ្វីពិបាកទេ គឺមិនត្រូវឲ្យអ្នកជំងឺដើរចេញក្រៅផ្ទះ ត្រូវកំដៅថៃ្ង ខ្លាចវាវិវត្តន៍ទៅជាធ្ងន់ធ្ងរ ហើយអ្នកជំងឺ ត្រូវធ្វើអនាម័យខ្លួនប្រាណឲ្យបានស្អាតជាប្រចាំ នៅពេលណាអ្នកជំងឺក្ដៅខ្លួនខ្លាំងគឺត្រូវប្រើឱសថបញ្ចុះកំដៅ និងឲ្យអ្នកជម្ងឺ បរិភោគចំណីអាហារឲ្យបានគ្រប់គ្រាន់និងមានអនាម័យ។ គួរបញ្ជាក់ថា នៅក្នុងប្រទេសមួយចំនួន ពិសេសប្រទេសកម្ពុជាយើង មិនទាន់មានវ៉ាក់សាំង ការពារជម្ងឺះអុតស្វាយនេះនៅឡើយទេ ព្រោះមិនទាន់បានបញ្ចូលវា ទៅក្នុងកម្មវិធីគម្រោងផ្ដល់ថ្នាំបង្ការនៅឡើយដែរ៕
ដោយ៖ សស្អាត