ភ្នំពេញៈ បើតាមមន្រ្ដីជាន់ខ្ពស់ក្រសួងសុខាភិបាលបានអះអាងថា បច្ចុប្បន្ននេះអត្រាមានជំងឺ និងអត្រាស្លាប់ នៃ ជំងឺ​របេង​នៅក្នុងប្រទេសកម្ពុជាមានការថយចុះជាបន្ដបន្ទាប់គួរឲ្យកត់សម្គាល់ ដែលនាំឲ្យ កម្ពុជាប្ដេជ្ញចិត្តថា នឹងខិតខំបន្ដ​ចូលរួមប្រយុទ្ធប្រឆាំង និងកាត់បន្ថយអត្រាឈឺ និងស្លាប់ ដោយ សារជំងឺរបេងនេះនៅត្រឹមឆ្នាំ ២០២០ ខាងមុខនេះ។

លោក ម៉ម ប៊ុនហេង រដ្ឋមន្រ្ដីក្រសួងសុខាភិបាល បានថ្លែងនៅក្នុងពិធីអបអរសាទរទិវាពិភពលោកកម្ចាត់រោគរបេង កាលពី​ព្រឹកថ្ងៃទី ២០ ខែមីនា ឆ្នាំ ២០១៤ ដោយបានចាត់ទុកថា តាមរយៈ យុទ្ធនាការទិវាពិភព​លោកកម្ចាត់ជំងឺ​របេង​នេះ នឹងជួយ​បំផុសឲ្យមនុស្សទាំងឡាយ នៅលើពិ ភពលោក ធ្វើការអំពាវនាវ ព្រមទាំងធ្វើសកម្មភាពដោយផ្ទាល់ ដើម្បី​ប្រយុទ្ធ​នឹងជំងឺ​របេងក្នុងជីវិតរបស់ពួកគេក្នុង គោលបំណងដើម្បីឆ្ពោះទៅកាន់ពិភពលោកមួយ ដែល​គ្មានការ​ឈឺ​ការស្លាប់ និងការរង​ទុក្ខ​ដោយសារជំងឺរបេង ។

លោកបានបញ្ជាក់ថា ដើម្បីឲ្យកម្ពុជា សម្រេចបាន តាមទិសដៅនៃផែនការយុទ្ធសាស្រ្ដថ្មី ក្នុងការចូលរួមប្រយុទ្ធនឹង​ជំងឺរបេងនៅឆ្នាំ ២០២០ ខាង មុខទាមទារឲ្យមានការចូលរួមគាំទ្រ និងផ្ដល់ធនធានថវិកាបន្ថែមពីភាគីពាក់ព័ន្ធ និង​ដៃគូអភិ វឌ្ឍ ពិសេសត្រូវបន្ដអនុវត្តន៍ការងារផ្ដល់សេវាថែទាំ ព្យាបាលតាមយុទ្ធសាស្រ្ដ ដូតស៍ដល់អ្នកជំ ងឺទាំងអស់ មិនថានៅ​តំបន់ឆ្ងាយជិត ឬដាច់ស្រយាលត្រូវពង្រីកនៅទូទាំង ប្រទេស ។

តំណាងអង្គការសុខភាពពិភពលោកប្រចាំកម្ពុជា លោក Momoe Takeuchi ក៏បានសម្ដែងនូវកិច្ច​គាំទ្រចំពោះការ​ខិត​ខំប្រឹងរបស់រាជរដ្ឋាភិបាលកម្ពុជា ក្នុងការចូលរួមធ្វើឲ្យមានចុះ ថយក្នុងអ ត្រាប្រេវ៉ាឡង់អត្រាស្លាប់ និងអត្រាអាំង​ស៊ី​ដង់​​​​​​​​នៃជំងឺរបេង និងបានរក្សាឲ្យមានអត្រា ជាសះ ស្បើយដល់អ្នកជំងឺនៅមានកម្រិតខ្ពស់ដដែលនៅទូទាំងប្រទេស ។

លោកវេជ្ជបណ្ឌិត ម៉ៅ តាន់អ៊ាង នាយកមជ្ឈមណ្ឌលជាតិកម្ចាត់រោគរបេង និង ហង់សិន បានថ្លែងឱ្យដឹងដែរថា ប្រហែល​​​​​ជា ១០ ឆ្នាំចុងក្រោយនេះអត្រាស្លាប់ និងឈឺដោយសារជំងឺ របេងនៅក្នុងប្រទេសកម្ពុជាមានការធ្លាក់​ចុះ​ខ្លាំង​ណាស់​គួរឲ្យ​កត់សម្គាល់ ដែលកត្តាទាំងនេះបណ្ដាលមកពីការរៀបចំផែនការពង្រីកយុទ្ធសាស្រ្ដដូតស៍ នៅ​តាម​សហគមន៍ និង មណ្ឌលសុខ ភាពនៅទូទាំងប្រទេស ។ ហើយអត្រាគ្របដណ្ដប់ការព្យាបាលជំងឺរបេងដោយ យុទ្ធ​សាស្រ្ដដូតស៍ គឺបានបានទទួលជោគជ័យ និងបានពង្រីក ១០០% នៅតាមមណ្ឌលសុខ ភាព និងនៅគ្រប់ស្រុក​ប្រតិ​បត្តិ​ទាំងអស់ ព្រមទាំងជំរុញការអនុវត្តនៅ​តាម​រោងចក្រសហគ្រាស និងតាមពន្ធនាគារ ពិសេសការរៀបចំទិសដៅ​ក្នុង​ផែន​ការយុទ្ធសាស្រ្ដថ្មី ប្រយុទ្ធនឹងជំងឺរបេង របស់ក្រសួងសុខាភិបាល ។

យោងតាមរបាយការណ៍របស់អង្គការសុខភាពពិភពលោក (WHO) បានបង្ហាញថា នៅ ក្នុងឆ្នាំ ២០១២ ប្រជាជន​ទូ​ទាំង​ពិភពលោកមាន ៨.៧ លាននាក់កើតជំងឺរបេង ដែលក្នុងនោះ ប្រមាណ ៣ លាននាក់ពុំបានទទួលសេវា​នៅ​ឡើយ និងប្រមាណ ១.៣ លាននាក់សា្លប់ដោយ ជំងឺរបេង ក្នុងនោះប្រហែល ១/៤ នៃការស្លាប់ទាក់ទងនឹងជំងឺ​​របេង​អេដស៍ ។ ចំណែកនៅក្នុង តំបន់អាស៊ី ប៉ាស៊ីហ្វិកខាងលិចមានប្រជាជនប្រមាណ ៤ ៥០០ នាក់ កើតជំងឺរបេងជារៀង​រាល់ថ្ងៃ និងស្លាប់ ប្រមាណ ៣០០ នាក់ក្នុងមួយថ្ងៃៗ ។

គួរបញ្ជាក់ថា អត្រាស្លាប់នៃជំងឺរបេងនៅកម្ពុជាបានថយចុះពី ១៥៦ ករណីក្នុងចំ ណោម ១០ ម៉ឺននៅក្នុងឆ្នាំ ១៩៩០ មក​ដល់ ៦៣ ករណីក្នុងចំណោម ១០ ម៉ឺននៅឆ្នាំ ២០១២ ។ ចំណែកប្រេ វ៉ាឡង់របេង​គ្រប់សណ្ឋានបានចុះពីកម្រិត ១ ៦៧០ ករណី​មកត្រឹម ៧៦៤ ករណី ហើយរក្សា បានអត្រាជាសះស្បើយលើសពី ៨៥%  និងស្រាវជ្រាវជំងឺ​របេង​បាន​ជាង ៣៨ ០០០ ករណី នៅ ក្នុងឆ្នាំ ២០១៣៕

ដោយ៖ ភីនរ៉ា