សុខភាព៖ ទន្តពេទ្យជំនាញរបស់អង់គ្លេស បានរកឃើញវិធីប៉ះធ្មេញ ព្យាបាលធ្មេញពុកបែបថ្មី នឹងជួយឱ្យអ្នកដែលខ្លាចម្ជុលថ្នាំស្ពឹក ឬខ្លាចការរ៉ធ្មេញ លែងខ្លាចការប៉ះធ្មេញ ព្រោះមិនធ្វើឱ្យឈឺស្រៀវធ្មេញទេ។
នៅពេលត្រូវប៉ះធ្មេញ គ្រូពេទ្យធ្មេញ នឹងចាក់ថ្នាំស្ពឹក រួចកោសយកសាច់ធ្មេញដែលពុកចេញ រ៉ធ្មេញ ដើម្បីពង្រាបរន្ធ រួចទើបធ្វើការប៉ះបិទរន្ធ នោះ។ ប៉ុន្តែ តាមរយៈវិធីថ្មីនេះ មិនចាំបាច់កម្ចាត់ សាច់ធ្មេញដែលពុកចេញទេ គឺប្រើគម្របលោហៈ សង្កត់លើតែម្តង ឱ្យជាតិថ្នាំទៅភ្ជិតត្រង់ធ្មេញពុក សម្លាប់បាក់តេរី ដែលធ្វើឱ្យធ្មេញពុក ទើបធ្មេញ មិនពុក មិនឈឺតទៅទៀត។
ក្នុងរយៈពេល ២ឆ្នាំ កន្លងមកនេះ បានសាកល្បងទៅលើកុមារអាយុ ៣-១០ឆ្នាំ ចំនួន១៣២នាក់ ទទួលបានលទ្ធផលល្អមកហើយ។ វិធីប៉ះធ្មេញបែបថ្មីនេះ សមស្របចំពោះធ្មេញ ទឹកដោះរបស់កូនតូច ប៉ុន្តែ មិនទាន់អាចប្រើបាន ចំពោះធ្មេញរបស់មនុស្សពេញវ័យទេ ៕ ដោយ៖ ភីន រ៉ា