សុខភាពៈ អង្ករដំណើបខ្មៅ ទទួលបានការនិយមចូលចិត្តយ៉ាងខ្លាំងនៅទ្វីបអាស៊ី ហើយក៏ត្រូវបានគេយកទៅធ្វើជាអាហារដ៏ពេញនិយមនៅទ្វីបអឺរ៉ុប នាពេលបច្ចុប្បន្ន។ អ្នកស្រាវជ្រាវបានអះអាងថា អង្ករដំណើបខ្មៅ ជាធញ្ញជាតិដែលមានបរិមាណស្ករទាប តែសម្បូរសារជាតិសរសៃដ៏មានប្រយោជន៍សំរាប់សុខភាព និងមានសារជាតិរំញោចដែលមានតួនាទីប្រឆាំងជាមួយជំងឺបេះដូង និងជំងឺមហារីក។
ក្រុមអ្នកស្រាវជ្រាវនៃមហាវិទ្យាល័យនៅរដ្ឋល្វីស្យាណា បានឲ្យដឹងថា អង្កាមរបស់ដំណើបខ្មៅ ដែលដាំនៅភាគខាងត្បូងប្រទេសអាមេរិក ត្រូវបានគេរកឃើញសារជាតិប្រឆាំងអុកស៊ីដរេដុកកម្មanthocyanin។ សារជាតិប្រឆាំងអុកស៊ីដរេដុកកម្មនេះ គឺជាអ្នកបង្កើតពណ៌ត្នោត ពណ៌ខ្មៅ របស់បន្លែផ្លែឈើជាច្រើនប្រភេទ ពិសេសអង្ករដំណើបខ្មៅ។ សារជាតិប្រឆាំងអុកស៊ីដរេដុកកម្មនេះ ក្រៅពីបង្កើតពណ៌ខ្មៅ គឺមាននាទីបោសសម្អាតពពួកម៉ូលេគុលដែលបង្កគ្រោះថ្នាក់ ហើយជួយការពារគែមសរសៃឈាម និងទប់ស្កាត់របួសAND ដែលនាំឲ្យកើតជំងឺមហារីក។
ក្រុមអ្នកស្រាវជ្រាវ បានអះអាងទៀតថា អង្ករដំណើបខ្មៅសម្បូរវិតាមីនជាងអង្ករស ព្រោះវាមានបរិមាណវិតាមីនE និងពពួកសារជាតិប្រឆាំងអុកស៊ីដរេដុកកម្មខ្ពស់ជាង៕ដោយៈភីនរ៉ា